Spremin tlo vilo

Keda proučinaja i Biblija, mangaja e Jehovaskere misle te resen dži ko amaro vilo, javere lafencar te vlijajnen upro amare misle, čuvstvija hem želbe. O Ezra dengja amen šukar primer bašo akava agjaar so „[spremingja] plo vilo te istražinel e Jehovaskoro zakoni“ (Ezra 7:10). Sar šaj amen da te spremina amaro vilo?

Molin tut. Angleder te počmine te proučine, molin tut. Molin e Jehova te pomožinel tuke te haljove hem te primenine adava so sikljovea (Ps. 119:18, 34).

Ov ponizno. O Devel na otkrinela o čačipe okolenge soj gorda hem so mislinena kaj na valjani lenge pomoš te šaj te haljoven i Biblija (Luka 10:21). Ma proučin i Biblija samo te šaj te sikave e javerenge kobor but džanea. Ponizno menin tlo razmisluvanje ako nane ko sklad e Devleskere razmislibaja.

Šun teokratska gilja. I muzika šaj but te vlijajnel upro amare čuvstvija. Adaleske, ako šunaja nesavi taro amare gilja angleder te proučina, adava šaj te pomožinel amenge te spremina amaro vilo.