Kobor tano važno e Jehovaskoro anav e Isuseske?

1-2. a) So kergja o Isus i rat angleder te ovel mudardo? b) Kola pučiba ka dikha ki akaja statija?

ČETVRTOK rakjate, ko 14 nisan 33 berš a.e., o Isus ikergja e Gospodareskiri večera zaedno ple verna apostolencar. Ov džanlja kaj panda hari o Juda ka predajnel le, kaj ka ovel mučimo hem palo adava leskere dušmanja ka mudaren le. Adaleske, pali večera ov vakergja nesave ohrabruvačka lafija ple apostolenge. Kratko angleder te džan peske, o Isus vakergja jekh but važno molitva. Adaja molitva, koja so pišingja la o apostol Jovan, arakhljola ko Jovan 17 poglavje.

² Ki akaja statija ka dikha so šaj te sikljova tari e Isuseskiri molitva. Na primer, bašo so sine sekirimo kratko angleder te merel? Hem so sine važno e Isuseske džikote sine ki phuv? Te dikha o odgovor taro akala pučiba.

„VAKERGJUM LENGE TLO ANAV“

3. So phengja o Isus bašo e Jehovaskoro anav, hem so manglja te vakerel adalea? (Jovan 17:6, 26).

³ Ki pli molitva o Isus vakergja: „Vakergjum lenge tlo anav“. Ustvari, ov duj puti spomningja kaj vakergja e Jehovaskoro anav ple učenikonge. (Čitin Jovan 17:6, 26.) So manglja te vakerel adalea? Dali otkringja lenge anav kova so ola na džanena le sine? O učenikija e Isuseskere sine Evreija hem adaleske ola više džanena sine kaj e Devleskoro anav tano Jehova. Ko Hebrejska spisija adava anav pojavinela pe skoro 7.000 puti. Znači, o Isus na mislingja ko adava kaj o Devel vikinela pe Jehova, nego ko adava so pretstavinela leskoro anav. O Isus vakergja e Devleskoro anav ple učenikonge ki adaja smisla so pomožingja lenge pošukar te zapoznajnen e Jehova. Ko adava tane vklučime e Jehovaskiri namera e phuvjaja hem e manušencar, adava so kergja, adava so ka kerel hem leskere osobine. O Isus pendžarela e Jehova pošukar taro bilo koj javer hem adaleske ov najšukar šaj sine te objasninel savi tani i ličnost so phiravela adava anav.

4-5. a) Sar šaj nekaskoro anav te ovel amenge panda považno? Vaker primer. b) Sar e Jehovaskoro anav ulo panda považno e Isuseskere učenikonge?

⁴ Te dikha jekh primer. Zamislin tuke kaj ko tlo sobranie isi jekh starešina so vikinela pe David hem ov tano doktori. Adale phrale džanea le beršencar. Ama jekh dive valjani itno te keren tut operacija. Džaja ki bolnica kote so kerela buti o phral hem ov koristinela ple veštine sar doktori te šaj te spasinel tlo životo. Dali o anav akale phraleskoro akana značinela tuke poviše? Džangjola pe kaj oja. O David nane više samo o starešina kole so pendžarea le nego hem o doktori kova so spasingja tlo životo.

⁵ Slično, e Isuseskere učenikija više džanena sine e Jehovaskoro anav. Ama, adava anav ulo lenge panda považno adaleske so o Isus pomožingja lenge pošukar te zapoznajnen e Jehova. Soske šaj te vakera akava? Adaleske so o Isus sikavela sine ple Dadeskere osobine ko sa adava so vakerela sine hem so kerela sine. Znači, leskere apostolija pošukar zapoznajngje e Jehova taro način sar o Isus sikavela sine hem agjaar so dikhena sine sar postapinela e manušencar (Jovan 14:9; 17:3).

„TLO ANAV KOVA SO DENGJAN MAN“

6. Ki koja smisla o Jehova dengja e Isuseske plo anav? (Jovan 17:11, 12).

⁶ Ki jekh prilika, o Isus molingja pe bašo ple učenikija akale lafencar: „Arakh len bašo tlo anav kova so dengjan man“. (Čitin Jovan 17:11, 12.) Dali akava značinela sine kaj e Isuseske ka ovel dendo o anav Jehova? Na. Primetin kaj o Isus molingja pe e Jehovaske e lafencar: „Arakh len bašo tlo anav“. Znači, e Jehovaskoro anav na ulo e Isuseskoro anav. Tegani, so manglja te vakerel o Isus keda vakergja kaj sine leske dendo e Jehovaskoro anav? Prvo, o Isus pretstavinela sine e Jehova hem kerela sine lafi ko leskoro anav. Ov alo pe Dadeske ko anav hem kergja mokjna bukja ko adava anav (Jovan 5:43; 10:25). Dujto, o anav Isus značinela „o Jehova tano spasenie“. Znači, e Devleskoro anav tano paše povrzimo e Isuseskere anavea.

7. Soske o Isus šaj sine te kerel lafi e Jehovaske ko anav? Vaker primer.

⁷ Razmislin bašo akava primer. Adaleske so jekh ambasadori tano pretstavniko jekhe pretsedateleskoro, ov šaj te kerel lafi ko anav adale pretsedateleske. Adaleske, keda kerela lafi o ambasadori, le isi le o isto avtoriteti sar e pretsedatele. Slično, o Isus pretstavinela sine e Jehova hem kerela sine lafi e manušencar leske ko anav (Mat. 21:9; Luka 13:35).

8. Soske o Jehova vakergja kaj o Isus phiravela sine leskoro anav panda angleder ov te avel ki phuv? (2. Mojseeva 23:20, 21).

⁸ Ki Biblija, o Isus tano vikimo o Lafi soske o Jehova koristinela le sine te šaj te prenesinel informacie hem upatstvija e angelenge hem e manušenge (Jovan 1:1-3). Verojatno o Isus sine o angeli kole so o Jehova bičhalgja te šaj te grižinel pe e Izraelconge džikote ola sine ki pustina. Keda vakergja e Izraelconge te oven poslušna adale angeleske, o Jehova vakergja: „Ov phiravela mlo anav“.a (Čitin 2. Mojseeva 23:20, 21.) O Jehova vakergja akava soske o Isus kerela sine lafi leske ko anav hem adaleske so ov tano i glavno ličnost koja so dokažinela kaj sa adava so kerela o Jehova tano ispravno hem kaj ov tano sveto.

„MO DAD KER TLO ANAV TE OVEL FALIMO“

9. Kobor sine važno e Jehovaskoro anav e Isuseske? Objasnin.

⁹ Sar so više dikhlem, panda angleder o Isus te avel ki phuv, e Jehovaskoro anav sine leske najvažno. Adaleske, nane čudno so džikote sine ki phuv, sa adalea so kergja sikavgja kobor leske važno e Jehovaskoro anav. Ko krajo tari pli služba, o Isus ki molitva rodingja taro Jehova: „Mo Dad ker tlo anav te ovel falimo“. Leskoro Dad odma odgovoringja leske silno glasoja taro nebo: „Me falingjum mo anav hem ka kerav palem mo anav te ovel falimo“ (Jovan 12:28).

10-11. a) Sar o Isus falingja e Jehovaskoro anav? (Dikh hem i slika.) b) Soske ko e Jehovaskoro anav valjani sine te dikhel pe sar sveto hem te čistinel pe tari ladž koja so sine leske andi?

¹⁰ O Isus da falingja ple Dadeskoro anav. Sar? Jekh način tano agjaar so vakerela sine e javerenge kobor šuže osobine isi e Jehova hem kobor šukar bukja kerela. Ama valjani sine nešto javer da te šaj te falinel pe adava anav. Ko e Jehovaskoro anav valjani sine te dikhel pe sar sveto hem te čistinel pe tari ladž so sine leske andi. O Isus sikavgja kobor tano važno akava keda sikavgja ple sledbenikon sar te molinen pe. Ov vakergja: „Amaro Dad so sian ko nebo, te dikhen sarine ko tlo anav sar sveto“ (Mat. 6:9, fus.).

¹¹ Soske ko e Jehovaskoro anav valjani sine te dikhel pe sar sveto hem te čistinel pe tari ladž koja so sine leske andi? Adaleske so ki edensko gradina o Satana o Beng vakergja hovajba bašo Jehova o Devel. O Satana vakergja kaj o Jehova hovavela hem kaj čhinavela nešto šukar e Adamestar hem e Evatar (1. Moj. 3:1-5). Adalea o Satana, ustvari, manglja te vakerel kaj o Jehova na postapinela ispravno. O hovajba e Satanaskere kaljargje e Jehovaskoro anav, javere lafencar leskoro ugled. Pokasno, ko vreme e Joveskoro, o Satana vakergja kaj adala so služinena e Jehovaske kerena adava samo adaleske so dobinena lestar nešto. Isto agjaar, adava klevetniko vakergja kaj nijekh manuš na mangela dovolno e Jehova te šaj te prodolžinel te služinel leske keda ka arakhljovel ko pharipa (Jov 1:9-11; 2:4). Valjani sine vreme te šaj te dokažinel pe koj hovavela — o Jehova ili o Satana.

„DAVA MLO ŽIVOTO“

12. So sine spremno te kerel o Isus adaleske so mangela e Jehovaskoro anav?

¹² Adaleske so mangela e Jehova o Isus manglja te kerel sa so šaj te šaj te sikavel kaj e Jehovaskoro anav tano sveto hem te čistinel le tari ladž so sine leske andi. Ov vakergja: „Dava mlo životo“ (Jovan 10:17, 18). Znači, o Isus sine spremno čak te merel bašo e Jehovaskoro anav.b O prva duj sovršena manuša, o Adam hem i Eva, irangje dumo e Jehovaske hem gele tari strana e Satanaskiri. Pojaver lendar, o Isus sine spremno te avel ki phuv hem te dokažinel kaj mangela e Jehova. O Isus kergja adava agjaar so ačhilo poslušno e Jehovaske ko sa (Evr. 4:15; 5:7-10). Ov ačhilo verno celo plo životo dži ko plo meribe ko stubo mučibaske (Evr. 12:2). Adalea dokažingja plo mangipe sprema o Jehova hem sprema leskoro anav.

13. Soske o Isus šaj sine najšukar te sikavel kaj o Satana hovavela? (Dikh hem i slika.)

¹³ Adalea sar živingja, o Isus celosno dokažingja kaj o Satana hovavela, a na o Jehova! (Jovan 8:44). O Isus džanlja e Jehova pošukar taro bilo koj javer. Ako nešto taro adava so vakergja o Satana sine čače, o Isus ka džanel sine bašo adava. Ama, o Isus sine odlučno te braninel e Jehovaskoro ugled, javere lafencar leskoro anav. Čak keda izgledinela sine kaj o Jehova mukhlja le, o Isus sine spremno poprvo te merel nego te iranel dumo ple mangle Dadeske (Mat. 27:46).c

„ZAVRŠINGJUM I BUTI SO DENGJAN MAN TE KERAV LA“

14. Sar o Jehova nagradingja e Isuse baši leskiri vernost?

¹⁴ Ki molitva so vakergja i rat angleder te merel, o Isus šaj sine te vakerel: „Završingjum i buti so dengjan man te kerav la“. Ov sine uverimo kaj o Jehova ka nagradinel le baši leskiri vernost (Jovan 17:4, 5). Adava so o Isus sine le doverba ko plo Dad na sine džabe. O Jehova na dozvolingja ov te ačhol ko grobo (Apo. 2:23, 24). Ov voskresningja e Isuse hem dengja le pobari položba ko nebo (Fil. 2:8, 9). Pokasno, o Isus počmingja te vladinel sar Cari ko e Devleskoro Carstvo. So ka kerel adava Carstvo? O odgovor arakhaja ko dujto delo tari primer molitva: „Te avel tlo Carstvo. Te ovel tli volja, [e Jehovaskiri] sar ko nebo agjaar ki phuv da“ (Mat. 6:10).

15. So javer ka kerel o Isus?

¹⁵ Panda hari o Isus ka borinel pe protiv e Devleskere dušmanja hem ka uništinel e lošnon ko Armagedon (Otk. 16:14, 16; 19:11-16). Odma palo adava, ov ka frdel e Satana „ki bezdna“ kote so ka ovel sar mulo (Otk. 20:1-3). Džikote ka trajnen o milja berša kote so ka vladinel o Isus, ov ka iranel o mir hem ka pomožinel e manušenge te oven sovršena. Ov ka voskresninel e mulen hem ka kerel celi phuv raj. E Jehovaskiri namera ka ispolninel pe (Otk. 21:1-4).

16. Savo ka ovel o životo otkeda ka završinen o milja berša kote so ka vladinel o Isus?

¹⁶ Savo ka ovel o životo otkeda ka završinen o milja berša kote so ka vladinel o Isus? O manuša poviše nane te oven grešna hem nesovršena. Ola poviše nane te valjanel te molinen te prostinen pe lengere grevija preku i otkupno žrtva. Isto agjaar, poviše nane te valjanel lenge i svešteničko služba taro 144.000, a ni palem e Isuseskiri zadača sar lengoro Prvosvešteniko te šaj te ovel len šukar odnos e Jehovaja. Osven adava, „sar posledno dušmani o meribe ka ovel uništimo“. O mule ka oven voskresnime. Sarine ki phuv ka oven sovršena (1. Kor. 15:25, 26).

17-18. a) So ka slučinel pe otkeda ka završinen o milja berša? b) So ka kerel o Isus keda ka završinel leskoro vladibe? (1. Korinkjanja 15:24, 28; dikh hem i slika.)

¹⁷ So javer ka slučinel pe otkeda ka završinen o milja berša kote so ka vladinel o Isus? Nešto but posebno — ka ovel rešimo o sporno pučibe kote soj vklučimo te dikhel pe sar sveto ko e Jehovaskoro anav. Soske? Ki edensko gradina o Satana vakergja kaj o Jehova hovavela hem kaj na vladinela e manušencar adaleske so mangela len. Ottegani pa sa dži akana, ko leskoro anav sekova puti dikhela pe sar sveto taro okola so sikavena leske čest hem poštujnena le. Znači, otkeda ka završinen o milja berša kote so ka vladinel o Isus, e Jehovaskoro anav ka ovel celosno čistimo tari ladž koja so sine leske andi. Ov celosno ka dokažinel kaj tano nebesno Dad pherdo mangipaja!

¹⁸ Konečno, sarine ka džanen kaj adava so vakergja o Satana bašo Jehova tano hovajbe. So ka kerel o Isus keda ka završinel leskoro vladibe? Dali ka džal palo e Satanaskoro primer hem ka buninel pe protiv o Jehova? Na! (Čitin 1. Korinkjanja 15:24, 28.) O Isus ka del o Carstvo ple Dadeske hem ka podložinel pe ko leskoro vladibe. Porazlično taro Satana, o Isus tano spremno te otkažinel pe taro sa adaleske so mangela e Jehova.

19. Kobor tano važno e Jehovaskoro anav e Isuseske?

¹⁹ Nane čudno so o Jehova sine spremno te del plo anav e Isuseske! O Isus sovršeno sikavgja savo tano leskoro Dad. Taro adava so dikhlem ki akaja statija, so šaj te vakera bašo adava kobor tano važno e Jehovaskoro anav e Isuseske? Adava tano leske najvažno taro sa. Ov sine spremno te merel bašo adava anav hem ko krajo taro milja berša taro leskoro vladibe spremno ka del sa e Jehovaske. Sar šaj te dža palo e Isuseskoro primer? O odgovor taro akava pučibe ka dikha le ki javer statija.