Ov uverimo kaj o Jehova prostingja tuke

1-2. So kerela o Jehova keda kainaja amen bašo amare grevija? (Dikh hem i slika.)

O CARI o David, džanlja sar i te osetine tut krivo bašo grevija so kergjan len angleder (Ps. 40:12; 51:3, natpis). Ov kergja nesave bare greške ko plo životo. Sepak iskreno kaingja pe hem o Jehova prostingja leske (2. Sam. 12:13). Adaleske, o David džanlja kobor šaj te lokhjarel tuke adava so prostinela o Jehova (Ps. 32:1).

² Isto sar o David, amenge da šaj te lokhjol keda džanaja kaj o Jehova sikavgja amenge milost hem prostingja amenge. But utešinela amen so džanaja kaj o Jehova tano spremno te prostinel amare grevija — čak hem okola soj but bare — ako iskreno kainaja amen, ako priznajnaja len hem ako but trudinaja amen te na kera len palem (Izr. 28:13; Apo. 26:20; 1. Jov. 1:9). Hem, but siem radosna so džanaja kaj keda ov prostinela adava tano sar te phene nikogaš na kergjem adava grevo! (Ezek. 33:16).

3-4. Sar osetingja pe jekh phen otkeda krstingja pe, hem so ka dikha ki akaja statija?

³ Sepak, nesavenge ponekogaš tano pharo te uverinen pe kaj o Jehova prostingja lenge. Baš agjaar osetinela pe sine i Dženifer, koja so barili ko čačipe. Keda sine tinejdžerka počmingja te kerel pogrešna bukja hem te živinel dvolično. Ama nekobor berša pokasno, oj kergja promene hem dengja lafi kaj ka služinel e Jehovaske celo životo hem krstingja pe. I Dženifer vakerela: „Angleder but buti kerava sine seksualno nemoral, makjovava sine, sium sine but holjami hem o pare sine mange nešto najvažno ko životo. Tari Biblija džanava sine kaj adaleske so sine dendi e Hristoseskiri žrtva, o Jehova šaj te prostinel amare grevija. Ama, našti sine te uverinav mlo vilo kaj o Jehova prostingja mange“.

⁴ Dali ponekogaš tuke pharo te uverine tlo vilo kaj o Jehova prostingja o grevija so kergjan len angleder? Ov mangela te ova sigurna kaj tano milostivo, isto sar so sine sigurno o David. Ki akaja statija ka dikha soske valjani te uverina amen kaj o Jehova prostingja amenge hem so šaj te pomožinel amen ko adava.

SOSKE TANO VAŽNO TE UVERINA AMEN KAJ O JEHOVA PROSTINGJA AMENGE?

5. Ko so mangela o Satana te verujna? Vaker primer.

⁵ Ako verujnaja kaj o Jehova mangela amen hem kaj prostingja amenge, nane te pera ki jekh taro stapice e Satanaskere. Ma bistre kaj o Satana ka kerel sa so šaj te čhinavel amen te služina e Jehovaske. Te šaj te uspejnel ki pli cel, o Satana šaj te probinel te čhivel amen te verujna kaj amare grevija tane doborom bare so o Jehova nikogaš nane te prostinel len. Te dikha o primer e manušeskoro taro Korint, kova so sine cidimo taro sobranie adaleske so kergja seksualno nemoral (1. Kor. 5:1, 5, 13). Ov pokasno kaingja pe. Ama, o Satana manglja o phralja hem o phenja taro sobranie te na prostinen leske hem agjaar te avel dži ko adava te na mangen palem te iranen le ko sobranie. Ko isto vreme, o Satana manglja o manuš so kaingja pe te mislinel kaj o Jehova nikogaš ka našti te prostinel leske hem „i but bari žal“ te peravel le so čak ka čhinavel te služinel e Jehovaske. E Satana ponadari da isi le isto cel hem koristinela ista taktike. Ama, „amen but šukar džanaja leskere namere“ (2. Kor. 2:5-11).

6. So ka pomožinel amen te na osetina amen kriva bašo grevija so kergjem len angleder?

⁶ Ako verujnaja kaj o Jehova prostingja amenge, ka čhinava te osetina amen kriva. Keda grešinaja normalno tano te osetina amen kriva (Ps. 51:17). Adava tano šukar, adaleske so ako haljovaja kaj kergjem nešto pogrešno, adava šaj te pottikninel amen te kera promene hem te počmina te kera adava soj ispravno (2. Kor. 7:10, 11). Ama, ako ponadari da osetinaja amen kriva but vreme otkeda kaingjem amen, šaj doborom te obeshrabrina amen so ka čhinava te služina e Jehovaske. Ama, ako verujnaja kaj o Jehova prostingja amenge ka šaj te ovel amen čisto sovest hem bari radost džikote služinaja leske (Kol. 1:10, 11; 2. Tim. 1:3). Ama, sar šaj te uverina amaro vilo kaj o Devel prostingja amenge?

SO ŠAJ TE POMOŽINEL AMEN TE UVERINA AMEN KAJ O JEHOVA PROSTINGJA AMENGE?

7-8. So vakergja o Jehova baši peste hem ko so šaj te ova uverime? (2. Mojseeva 34:6, 7).

⁷ Razmislin bašo adava so o Jehova vakergja baši peste. Na primer, primetin so vakergja o Jehova e Mojseeske ki planina Sinaj.a (Čitin 2. Mojseeva 34:6, 7.) Iako e Jehova isi le but šuže osobine, ov odlučingja te vakerel e Mojseeske kaj tano „Devel soj milostivo hem... pherdo tano verno mangipe“. Dali asavko Devel bi odlučinela te na prostinel nesave slugaske kova so čače kainela pe bašo plo grevo? Adava ni našti te zamislina amenge! O Jehova nikogaš na bi postapinela doborom lošno hem bizo milost.

⁸ Šaj te ova sigurna kaj keda vakerela kaj tano milostivo, o Jehova vakerela o čačipe. Ov nikogaš na hovavela (Ps. 31:5). Adaleske šaj te verujna ko adava so vakerela. Ako tuke pharo te na osetine tut više krivo bašo grevija so kergjan len angleder, puč tut: „Dali verujnava kaj o Jehova čače tano milostivo hem sočuvstvitelno hem kaj ka prostinel sekole jekheske so ka kainel pe bašo ple grevija? Tegani, zarem na valjani te verujnav kaj o Jehova prostingja mange da?“

9. So sikljovaja taro Psalm 32:5 bašo način sar o Jehova prostinela amare grevija?

⁹ Razmislin so sikavela amen o Jehova ki Biblija bašo adava sar prostinela. Na primer, te dikha sar o biblisko pisateli o David opišingja o način sar o Jehova prostinela. (Čitin Psalm 32:5.) Ov vakergja: „Tu prostingjan mli greška hem mle grevija“. O hebrejsko lafi kova so ko akava stiho tano prevedimo e lafea „prostingjan“ isto agjaar šaj te značinel „vazdela“ ili „ingarela“. Keda prostingja e Davideske o Jehova sar te phene vazdingja leskere grevija hem ingargja len. Palo adava, e Davideske lokhilo taro pharipe so osetinela le sine bašo grevo so kergja (Ps. 32:2-4). Amen da šaj te osetina asavko lokhipe. Keda iskreno kainaja amen bašo amare grevija, na valjani te osetina amen više kriva, javere lafencar te phirava o pharipe soske o Jehova vazdingja le hem ingargja le.

10-11. So sikljovaja taro lafija: „Tu Jehova... spremno sian te prostine“? (Psalm 86:5).

¹⁰ Čitin Psalm 86:5. Akate o David vakerela: „Tu Jehova... spremno sian te prostine“. Akava značinela ka o Jehova na holjanela odma keda keraja greške hem kaj ov mangela sekogaš te prostinel okolenge so kainena pe. Soske tano asavko? O javer delo taro stiho objasninela: „Baro tano tlo verno mangipe sprema sa okolende so rodena tu“. Tari angluni statija siklilem kaj o Jehova vetingja kaj ka sikavel verno mangipe okolenge so mangena le hem kaj nikogaš nane te mukhel len. Asavko mangipe pottikninela le spremno te prostinel sekole grešnikoske so kainela pe (Isa. 55:7). Ako tuke pharo te verujne kaj o Jehova prostingja tuke, šaj te puče tut: „Dali verujnava kaj o Jehova spremno prostinela sarinenge so kainena pe hem molinena le baši milost? Tegani na valjani li te verujnav kaj prostingja mange da keda molingjum le baši milost?“

¹¹ Ki Biblija isto agjaar pišinela kaj o Jehova but šukar džanela sostar siem kerde hem kaj siem nesovršena. Akava but šaj te utešinel amen (Ps. 139:1, 2). Adava but šukar dikhjola taro jekh javer psalm so pišingja le o David, kova so isto agjaar šaj te pomožinel amen te uverina amen kaj o Jehova spremno prostinela.

MA BISTRE ADAVA SO O JEHOVA NA BISTRELA

12-13. Sprema Psalm 103:14, so na bistrela o Jehova hem ko so pottikninela le adava?

¹² Čitin Psalm 103:14. Bašo Jehova, o David vakergja „ov... na bistrela kaj siem taro pravo“. Akale lafencar, o David objasningja koja tani jekh pričina soske o Jehova tano spremno te prostinel ple slugenge so kainena pe: Ov nikogaš na bistrela kaj siem nesovršena. Te šaj pošukar te haljova akava, te dikha podetalno e Davideskere lafija.

¹³ O David vakergja kaj o Jehova „šukar džanela sostar siem kerde“. Ov kergja e Adame „taro pravo e phuvjakoro“. Adava značinela kaj o Jehova but šukar džanela kaj e sovršena manušen isi len ograničuvanja — na primer, ola mora te han, te soven hem te dišinen (1. Moj. 2:7). Ama keda o Adam hem i Eva grešingje, o manuša ule pravo ko javer da način. Adaleske so avaja lendar, amen siem pravo hem ki adaja smisla kaj bijangjovaja sar nesovršena hem mora te borina amen protiv adava te na kera pogrešna bukja. O Jehova na samo soj svesno baši amari nesovršenost, nego o David baši leste vakergja kaj ni „na bistrela“ adava. O hebrejsko lafi soj koristimo akate šaj hem te značinel kaj na samo so na bistrea nešto, nego hem kerea nešto bašo adava. Znači, so manglja te vakerel o David akale lafencar? O Jehova džanela kaj adaleske so nasledingjem o grevo, ponekogaš ka kera greške. Ama keda dikhela kaj čače kainaja amen, ov tano pottiknimo te sikavel amenge milost hem te prostinel amenge (Ps. 78:38, 39).

14. a) So javer vakergja o David bašo način sar o Jehova prostinela? (Ps. 103:12). b) So šaj te sikljova taro način sar o Jehova prostingja e Davideske? (Dikh hem i ramka „Sar o Jehova prostinela hem bistrela“.)

¹⁴ So javer šaj te sikljova taro 103 Psalm bašo način sar o Jehova prostinela? (Čitin Psalm 103:12.) O David vakerela kaj keda o Jehova prostinela, ov cidela amendar amare greške „kobor soj dur o istok taro zapad“. O istok tano najdur so šaj taro zapad. Ola o duj nikogaš našti te aven paše. So vakerela amenge akava bašo grevija so prostinela len o Jehova? Povrzimo akale stihoja, jekh lil objasninela kaj o Devel doborom but dujrarela amare grevija amendar, so lendar ni na ačhola belego. Znači, šaj te ova sigurna kaj ov nikogaš više nane te mislinel ki lende, a ni palem nane te setinel amen ki lende. Ponekogaš, čak hem samo nesavo miris šaj te setinel amen ko nešto so slučingja pe angleder. Ama, otkeda o Jehova ka prostinel amenge nesavo grevo, ništo našti te čhivel le palem te setinel pe ki leste, hem adaleske te krivinel amen ili te kazninel amen (Ezek. 18:21, 22; Apo. 3:19).

15. So šaj te kera ako celo vreme osetinaja amen kriva bašo grevija so kergjem len angleder?

¹⁵ Sar šaj o lafija e Davideskere taro 103 Psalm te uverinen amen kaj o Jehova prostingja amenge? Ako celo vreme osetinaja amen kriva bašo grevija so kergjem len angleder, šaj te puča amen: „Dali bistrava adava so o Jehova na bistrela, javere lafencar, dali bistrava kaj ov but šukar džanela kaj sium nesovršeno hem kaj ka prostinel jekhe grešnikoske so kainela pe sar me? Isto agjaar, dali pamtinava adava so o Jehova odlučingja te bistrel, javere lafencar dali pamtinava o grevija kola so o Jehova prostingja len mange hem kolenge so nikogaš više nane te krivinel man ili te kazninel man?“ O Jehova na koncentririnela pe ko amare grevija so kergjem len angleder, adaleske na valjani amen da (Ps. 130:3). Ako čače verujnaja kaj o Jehova prostingja amenge, nane više te osetina amen kriva hem ponadari da ka služina leske radosno.

16. Vaker primer so sikavela kaj tano opasno celo vreme te mislina ko grevija kola so prostingja len amenge o Jehova. (Dikh hem i slika.)

¹⁶ Te vakera jekh primer. Ako celo vreme osetinaja amen kriva bašo grevija so kergjem len angleder, adava tano sar te phene mangaja te vozina vrda džikote celo vreme dikhaja ko retrovizor. Šukar tano ponekogaš te dikha ko retrovizor soske agjaar ka šaj te reagirina ako pojavinela pe nesavi opasnost pali amende. Ama te šaj te vozina bezbedno, mora te koncentririna amen ko drumo soj angli amende. Slično, šaj te koristinel amenge ako ponekogaš setinaja amen ko greške so kergjem len angleder. Šaj te sikljova lendar hem te ova panda poodlučna te na kerea len palem. Ama ako celo vreme mislinaja ko greške so o Jehova prostingja len amenge, ka našava amari radost hem ka našti te da leske amaro najšukar. Namesto adava, ponadari da te koncentririna amen ko drumo soj angli amende. Amen siem ko drumo so ingarela ko životo so vetingja le o Devel, kote so o lošna bukja so slučingje pe angleder „nane ni te setina amen“ (Isa. 65:17; Izr. 4:25).

PONADARI DA UVERIN TLO VILO

17. Soske valjani ponadari da te uverina amaro vilo kaj o Jehova mangela amen hem kaj prostingja amenge?

¹⁷ Valjani ponadari da te uverina amaro vilo kaj o Jehova mangela amen hem kaj prostingja amenge (1. Jov. 3:19). Soske? Adaleske so o Satana ponadari da ka probinel te čhivel amen te verujna kaj o Jehova na mangela amen hem kaj nikogaš nane te prostinel amenge. Bizi razlika sar hem te ovel, leskiri cel tani isto — te kerel te čhinava te služina e Jehovaske. Sar so avaja popaše ko krajo, šaj te očekujna kaj o Satana ka probinel panda poviše te kerel adava soske džanela kaj ačhilo le panda but hari vreme (Otk. 12:12). Na smejnaja te dozvolina leske te pobedinel!

18. So šaj te kere te šaj panda poviše te uverine tlo vilo kaj o Jehova mangela tut hem kaj prostingja tuke?

¹⁸ Te šaj panda poviše te uverine tut kaj o Jehova mangela tut, primenin o predlogija tari angluni statija. Te šaj te uverine tlo vilo kaj o Jehova prostingja tuke, razmislin bašo adava so ov vakergja baši peste. Odvojn vreme hor te razmisline so sikavela amen o Jehova ki Biblija bašo adava sar prostinela. Ma bistre kaj ov šukar džanela kaj sian nesovršeno hem kaj ka sikavel tuke milost. Isto agjaar, ma bistre kaj keda ov prostinela adava kerela le celosno. Tegani ka ove radosno soske ka ove sigurno kaj o Jehova sikavgja tuke milost hem isto sar o David, ka šaj te vakere: „Blagodarno sium tuke Jehova ‘so prostingjan mli greška mle grevija’“! (Ps. 32:5).