Sar te pobedina ki borba protiv o pogrešna želbe

1. Solea borinena pe sa o nesovršena manuša?

DALI nekogaš sine tut bari želba te kere nešto so o Jehova na mangela? Ako oja, ma mislin kaj tlo iskušenie tano pobaro taro e javerengere iskušenija. I Biblija vakerela: „Sekova iskušenie so isi tumen, sine e javeren da“ (1. Kor. 10:13). Akava značinela kaj bizi razlika save pogrešno želbaja borinea tut, e javeren da isi isto problemi. Tu na sian korkori, o Jehova ka pomožinel tut te pobedine ki adaja borba.

2. Save iskušeniencar šaj borinena pe nesave hristijanja hem o manuša kola so proučinena i Biblija? (Dikh hem o slike.)

² I Biblija isto agjaar vakerela: „Sekova jekh tano iskušimo agjaar so cidela le hem hovavela le leskiri želba“ (Jak. 1:14). Adava soj tano iskušenie jekheske, na značinela kaj tano iskušenie javereske da. Na primer, nesave hristijanja šaj tane ko iskušenie te keren nemoral nekasaja taro sprotivno pol, a javera nekasaja taro isto pol. Okola so čhinavgje te dikhen pornografija, šaj isi len bari želba palem te iranen pe ki adaja navika. But džene so čhinavgje te koristinen droga ili te pien but alkohol, isi len slično problemi. Akala tane samo nekobor želbe kolencar so borinena pe nesave hristijanja hem manuša kola so proučinena i Biblija. Ponekogaš, sekova jekh amendar verojatno osetingja pe sar o apostol Pavle kova so pišingja: „Keda mangava te kerav adava soj šukar, o lošnipe tano ki mande“ (Rim. 7:21).

3. Sar šaj te vlijajnel upri nekaste adava so celo vreme borinela pe nesave pogrešno želbaja?

³ Ako celo vreme borinea tut nesave pogrešno želbaja, šaj mislinea tuke kaj nane tut sila te borine tut protiv o iskušenie, sar te phene našti te kere adava soj ispravno. Isto agjaar, šaj mislinea kaj o Jehova na dikhela šukar ki tute samo adaleske so isi tut asavki pogrešno želba. Ov uverimo kaj nijekh taro akala duj bukja nane točno! Te šaj te objasnina soske, ki akaja statija ka dikha akala duj pučiba: 1) Soske šaj te pojavinen pe asavke čuvstvija? 2) Sar šaj te pobedine ki borba protiv o pogrešna želbe?

SAR MANGELA O SATANA TE OSETINA AMEN

4. a) So mangela o Satana te mislina keda siem ko iskušenie? b) Soske šaj te ova sigurna kaj šaj te ovel amen sila te borina amen protiv o iskušenie?

⁴ O Satana mangela te mislina kaj nane te ovel amen sila te borina amen keda ka arakhljova ko iskušenie. O Isus jasno vakergja kaj o Satana ka probinel te iskušinel amen keda sikavgja ple sledbenikon te molinen pe: „Ma mukh te pera ko iskušenie, nego spasin amen taro Beng“ (Mat. 6:13). O Satana vakerela kaj o manuša nane te oven poslušna e Jehovaske keda ka arakhljoven ko iskušenie (Jov 2:4, 5). Ustvari, ov vakerela agjaar soske ov sine o prvo so dozvolingja leskiri želba te hovavel le hem na manglja te ačhol verno e Jehovaske. Adaleske, ov mislinela kaj amen da siem sar leste — kaj lokhe ka mukha e Jehova keda ka arakhljova ko iskušenie. O Satana mislingja kaj čak e Devleskoro sovršeno Čhavo ka perel ko nesavo iskušenie! (Mat. 4:8, 9). Ama razmislin bašo akava: Dali čače nane amen sila te borina amen protiv o pogrešna želbe? Ni hari nane agjaar! Složinaja amen e lafencar so pišingja len o apostol Pavle: „Sa šaj te kerav, soske pomožinela mange okova so dela man sila“ (Fil. 4:13).

5. Kotar džanaja kaj o Jehova tano uverimo kaj šaj te pobedina ki borba protiv o pogrešna želbe?

⁵ Sprotivno taro Satana, o Jehova tano celosno uverimo kaj šaj te borina amen protiv o pogrešna želbe. Kotar džanaja adava? O Jehova prorokujngja kaj jekh baro mnoštvo manuša ka ačhoven verna hem ka preživinen i bari nevolja. Razmislin so značinela akava. O Jehova kova so našti te hovavel, vakergja kaj but manuša — a na samo nekobor džene — ka khuven ko raj „uravde ko parne šeja“, javere lafencar ka oven čista (Otk. 7:9, 13, 14). Akava sikavela amenge kaj o Jehova na mislinela kaj nane amen sila te borina amen protiv o pogrešna želbe.

6-7. So javer o Satana mangela te mislina?

⁶ Osven o Satana so mangela te mislina kaj nane amen sila te borina amen protiv o iskušenie, ov isto agjaar mangela te mislina kaj o Jehova na dikhela šukar ki amende samo adaleske so isi amen pogrešna želbe. Ama ma te bistra soske ov ustvari mangela amen te mislina agjaar. O Satana tano adava kaste so o Jehova nikogaš nane te dikhel šukar hem kaske so sudingja kaj ov na zaslužinela večno životo (1. Moj. 3:15; Otk. 20:10). Šaj te ova sigurna kaj o Satana mangela te mislina kaj o Jehova amende da na dikhela šukar, posebno adaleske so amen isi amen prilika te dobina o blagoslov kova so ov našavgja le. Ama amen ni najhari na siem ki isto situacija sar leste. Ustvari, i Biblija uverinela amen kaj o Jehova mangela te pomožinel amenge, a na te osudinel amen. Ov „na mangela nikoj te ovel uništimo nego sarinen te ovel len prilika te kainen pe“ (2. Pet. 3:9).

⁷ Znači, ako mislinaja kaj nane amen sila te borina amen protiv o pogrešna želbe ili kaj o Jehova na dikhela šukar ki amende adaleske so isi amen pogrešna želbe, tegani razmislinaja agjaar sar so mangela o Satana te razmislina. Adava so ka haljova akava, ka pomožinel amen te ova panda poodlučna te protivina amen leske (1. Pet. 5:8, 9).

SAR ŠAJ TE OSETINA AMEN ADALESKE SO SIEM NESOVRŠENA

8. So javer šaj te kerel te mislina kaj nane amen sila te borina amen protiv o pogrešna želbe hem kaj o Jehova na dikhela šukar ki amende? (Psalm 51:5; dikh hem „Objasnimo lafi“.)

⁸ Osven o Satana, isi panda jekh buti soske šaj te mislina kaj nane amen sila te borina amen protiv o pogrešna želbe hem kaj o Jehova na dikhela šukar ki amende. Soj tano adava? O grevo kova so sarine nasledingjem le taro amare prva roditelijaa (Jov 14:4; čitin Psalm 51:5).

9-10. a) Sar vlijajngja o grevo upro Adam hem i Eva? (Dikh hem i slika.) b) Sar vlijajnena o grevo hem i nesovršenost upri amende?

⁹ Razmislin sar o grevo vlijajngja upro Adam hem i Eva. Otkeda grešingje e Jehovaske ola garavgje pe hem probingje te učharen pumaro telo. Bašo akava ko Uvid ko Sveta lila pišinela: „Otkeda kergje grevo, počmingje te osetinen pe kriva, te sekirinen pe, te oven nesigurna hem te ladžan“. Adava sine sar te phene o Adam hem i Eva sine phanle ko jekh kher ki koleste so isi samo akala štar sobe. O Adam hem i Eva šaj sine samo te džan tari jekh soba ki javer, ama našti sine te ikljon avri taro kher. Ola našti sine te našen tari pli nesovršenost.

¹⁰ Džangjola pe, amen na siem ki skroz isto situacija sar so sine o Adam hem i Eva. I otkupnina — koja so na važinela lenge — šaj te čistinel amen taro grevo hem te del amen čisto sovest (1. Kor. 6:11). Sepak, amen nasledingjem o grevo hem i nesovršenost. Adaleske, na iznenadinela amen adava so amen da osetinaja amen kriva, sekirime, nesigurna hem ladžaja. Ustvari, i Biblija vakerela kaj o grevo ponadari da but vlijajnela upro manuša. Adava tano slučaj čak okolencar kola „so na grešingje sar so grešingja o Adam“ (Rim. 5:14). Kobor hem te obeshrabrinel amen akaja buti, na valjani te mislina kaj nane amen sila te borina amen hem kaj o Jehova na dikhela šukar ki amende. Amen šaj te otfrlina asavke negativna čuvstvija. Sar?

11. Sar valjani te reagirina keda mislinaja kaj nane amen sile uspešno te borina amen protiv o pogrešna želbe, hem soske? (Rimjanja 6:12).

¹¹ Keda mislinaja kaj nane amen sile uspešno te borina amen protiv o pogrešna želbe, ko adava šaj te dikha sar te phene amari nesovršenost „vakerela“ amenge adava, a la na valjani te šuna la. Soske? I Biblija vakerela kaj šaj te čhinava o grevo ponadari da „te vladinel sar cari“ upri amende. (Čitin Rimjanja 6:12.) Akava značinela kaj amen šaj te birina te na postapina sprema o pogrešna želbe (Gal. 5:16). O Jehova tano uverimo kaj šaj te borina amen protiv o iskušenija. Te na ovel sine adava agjaar, o Jehova na bi rodela sine adava amendar (5. Moj. 30:11-14; Rim. 6:6; 1. Sol. 4:3). Jasno tano kaj isi amen sile te borina amen protiv o pogrešna želbe.

12. Sar valjani te reagirina keda mislinaja kaj o Jehova na dikhela šukar ki amende, hem soske?

¹² Slično, keda mislinaja kaj o Jehova na dikhela šukar ki amende, sar te phene osudinela amen samo adaleske so isi amen pogrešna želbe, šaj ko adava te dikha sar te phene amari nesovršenost „vakerela“ amenge adava, a la na valjani te šuna la. Soske? I Biblija vakerela kaj o Jehova haljola kaj siem grešna (Ps. 103:13, 14). Ov džanela sa baši amende, ov isto džanela sar upro sekole jekheste amende vlijajnela o grevo kova so nasledingjem le (1. Jov. 3:19, 20). Sa džikote borinaja amen protiv o pogrešna želbe hem te na kera adava soj pogrešno, o Jehova ka dikhel amen sar čista. Soske šaj te ova uverime ko adava?

13-14. Dali adava so isi amen pogrešna želbe značinela kaj našti te ova amala e Jehovaja? Objasnin.

¹³ I Biblija kerela razlika maškar o pogrešna postapke (kola so šaj te kontrolirina len) hem o pogrešna želbe (kola so šaj te pojavinen pe amenge taro jekh puti). Na primer, nesave taro prva hristijanja ko Korint angleder sine homoseksualcija. O Pavle pišingja: „A nesave tumendar sine asavke“. Dali akava značinela kaj len nikogaš više na sine len želba bašo homoseksualna odnosija? Adava na bi ovela sine realno, adaleske so asavke želbe but puti mukhena hor korenija ki nekaste. Ama e hristijanen so sine len samokontrola hem na postapinena sine sprema ple želbe, o Jehova prifatingja len sar ple amala. Ov ki lende dikhela sine sar čista (1. Kor. 6:9-11). O isto šaj te važinel tuke da.

¹⁴ Bizi razlika save pogrešna želbencar borinea tut, tu šaj te pobedine len. Čak hem ako na uspejnea celosno te cide len, šaj te sikave samokontrola hem te na kere adava so mangela o telo hem o misle (Ef. 2:3). Sar šaj te kere adava hem agjaar te pobedine ki borba protiv o pogrešna želbe?

SAR TE POBEDINE

15. Ako mangaja te pobedina i borba protiv o pogrešna želbe, soske valjani te ova iskrena korkori amencar?

¹⁵ Te šaj te pobedine ki borba protiv o pogrešna želbe, valjani te ove iskreno korkori tuja bašo tle slabostija. Ma hovav tut (Jak. 1:22). Ako tiknjarea o problemi, agjaar so mislinea: „O javera piena poviše mandar“, ili krivinea e javeren agjaar so vakerea: „Na bi ovava sine ko iskušenie te dikhav pornografija ako mi romni sikavela mange poviše mangipe“, adava ka kerel samo polokhe te pere ko iskušenie. Adaleske ma opravdin tle pogrešna postapke čak ni ko tle misle. Prifatin i odgovornost bašo tle postapke (Gal. 6:7).

16. Sar šaj te ove panda poodlučno te kere adava soj ispravno?

¹⁶ Osven so ka ove iskreno korkori tuja bašo tle slabostija, valjani hem te ove panda poodlučno te na pere ki lende (1. Kor. 9:26, 27; 1. Sol. 4:4; 1. Pet. 1:15, 16). Primetin kola bukja anena tuke opasnost hem keda. Adava šaj te ovel nesavo iskušenie kolea soj tuke pharo te borine tut. Ili šaj tuke popharo te borine tut e iskušeniea ko odredeno vreme taro dive, na primer keda sian umorno ili kasno rakjate. Očekujn o iskušenie hem odlučin sar ka postapine. Najšukar vreme te kere akava tano angleder te pojavinel pe o iskušenie (Izr. 22:3).

17. So šaj te sikljova taro e Josifeskoro primer? (1. Mojseeva 39:7-9; dikh hem o slike.)

¹⁷ Razmislin sar reagiringja o Josif keda e Petefrijaskiri romni probingja te zavedinel le. Ov odma reagiringja hem odlučno odbingja la. (Čitin 1. Mojseeva 39:7-9.) So sikavela akava? Panda angleder e Petefrijaskiri romni te probinel te zavedinel le, o Josif sine odlučno te kerel adava soj ispravno. Slično, šaj te ove panda poodlučno te kere adava soj ispravno panda angleder te arakhljove ki situacija te ove ko iskušenie. Adava ka kerel tuke polokho te postapine agjaar sar so više odlučingjan.

REDOVNO ISPITIN TUT

18. Sar šaj te pobedine ki borba protiv o pogrešna želbe? (2. Korinkjanja 13:5).

¹⁸ Te šaj te pobedine ki borba protiv o pogrešna želbe ka valjani te ispitine korkori tut. (Čitin 2. Korinkjanja 13:5.) Redovno dikh bašo so razmislinea hem sar postapinea hem ker o promene so valjani te kere len. Na primer, čak hem keda ka uspejne te borine tut nesave iskušeniea, šaj te puče tut: „Kobor vreme valjangja mange te vakerav ’na‘?“ Ako haliljan kaj na sian sine odlučno te vakere odma „na“, ma obeshrabrin tut. Namesto adava, razmislin sar šaj javer puti pošukar te postapine. Šaj te puče tut akala pučiba: „Keda ka pojavinen pe mange pogrešna misle, dali šaj posigate te cidav len? Dali i zabava so birinava la kerela mange popharo te borinav man e iskušeniea? Keda ka pojavinel pe nesavi nemoralno scena, dali odma cidava mle jakhja? Dali haljovava kaj e Jehovaskere merilija tane sekogaš mle šukaripaske, čak keda rodela pe mandar but te trudinav man te sikavav samokontrola?“ (Ps. 101:3).

19. Sar šaj o tikne odluke so mislinaja kaj nane doborom važna te keren amenge pharo te borina amen protiv o pogrešna želbe?

¹⁹ Isto agjaar, ma probin te opravdine tle pogrešna postapke. I Biblija vakerela: „O vilo tano pohovavno taro bilo so javer hem spremno tano ko sa“ (Erem. 17:9). O Isus vakergja kaj lestar „ikljona lošna misle“ (Mat. 15:19). Na primer, nekoj so čhinavgja te dikhel pornografija, palo nesavo vreme šaj te mislinel peske kaj nane opasno te dikhel slike kola so bajrarena o seksualna želbe samo adaleske so ki lende nane nangje manuša. Ili šaj te mislinel peske: „Nane ništo pogrešno ko adava te fantazirinav mange bašo pogrešna bukja sa džikote na kerava len“. Ako razmislinela ko asavko način, leskoro hovavno vilo angleder planirinela sar te zadovolinel o želbe e teloskere (Rim. 13:14). Sar šaj te na kere adava? Pazin te na ane tikne odluke so nane mudra kola so ka ingaren tut dži ko adava te ane bare odluke so nane mudra, sar na primer te počmine te postapine pogrešno.b Cide tutar sa o „lošna misle“ kola so šaj te anen tut dži ko adava te opravdine o pogrešno postapibe.

20. So ka slučinel pe e pogrešna želbencar ki idnina, hem savi pomoš isi amen panda avdive?

²⁰ Sar so dikhlem, keda o Jehova pomožinela amen, ka ovel amen sila te borina amen e iskušeniencar. Isto agjaar, adaleske so o Jehova sikavela amenge milost, isi amen nadež bašo večno životo ko nevo sveto. Kobor šukar ka ovel te služina e Jehovaske čisto gogjaja hem vilea! Dži tegani, ma mislin kaj nane tut sila te borine tut protiv o pogrešna želbe hem kaj o Jehova na dikhela šukar ki tute. Šaj te ova sigurna kaj adaleske so o Jehova dela amen plo blagoslov, šaj te pobedina ki adaja borba!