Rode pomoš taro starešine

1. Sar o Jehova sikavgja kaj leskere bakhre tane skapocena leske?

O JEHOVA mangela ple bakhren, ola tane skapocena leske. O Jehova kingja len e Isuseskere ratea hem ko sobranija čhivgja starešine te šaj te grižinen pe bašo leskoro stado (Apo. 20:28). O Jehova mangela o starešine te postapinen ljubezno leskere bakhrencar. O starešine šunena e Isuseskoro vodstvo agjaar so ohrabrinena e phralen hem e phenjen hem pomožinena lenge te ačhoven verna e Jehovaske (Isa. 32:1, 2).

2. Kaske posebno o Jehova grižinela pe? (Ezekiel 34:15, 16).

² O Jehova but grižinela bašo sa ple sluge, ama posebno mangela te pomožinel len keda cidena muke. O Jehova preku o starešine pomožinela okolenge so mučinena pe adaleske so kergje greške. (Čitin Ezekiel 34:15, 16.) Sepak, ov mangela amen te roda pomoš keda adava valjani amenge. Ko asavke situacie, osven so valjani taro vilo te molina amen e Devleske te pomožinel amen, valjani te roda pomoš taro okola soj „pastirija hem učitelija ko sobranie“ (Ef. 4:11, 12).

3. Sar šaj sarinen amen te ovel amen korist taro adava so ka dikha savi uloga isi e starešinen?

³ Ki akaja statija ka dikha poviše bašo adava sar o Jehova koristinela e starešinen te šaj te pomožinel nekaske so duhovno slabongja. Ka dobina odgovor ko akala pučiba: Keda valjani te roda pomoš taro starešine? Soske valjani te kera adava? Hem sar o starešine pomožinena amen? Čak ako momenti siem duhovno zorale, o odgovor ko akala pučiba ka bajrarel amari blagodarnost bašo adava sar o Jehova koristinela e starešinen hem ka pomožinel amen te doznajna so valjani te kera keda ka valjani amenge lengiri pomoš.

KEDA VALJANI TE VIKINA E STAREŠINEN?

4. Kotar džanaja kaj o stihija taro Jakov 5:14-16, 19, 20 kerena lafi bašo duhovno nasvalipe? (Dikh hem o slike.)

⁴ O učeniko o Jakov objasningja sar o Jehova koristinela e starešinen te šaj te pomožinel amen. O Jakov pišingja: „Ako nekoj tano nasvalo maškar tumende, neka vikinel e starešinen taro sobranie“. (Čitin Jakov 5:14-16, 19, 20.) Taro kontekst šaj te dikha kaj o Jakov kergja lafi bašo duhovno nasvalipe. Na primer, ov vakergja kaj o nasvalo valjani te vikinel e starešinen baši pomoš taro sobranie, a na nesave doktore. Isto agjaar, o Jakov objasningja kaj o nasvalo ka sasljol keda leskere grevija ka oven prostime. O bukja so valjani nekoj te kerel len te šaj duhovno te sasljol tane slična e bukjencar so valjani te kerel len nekoj te šaj fizički te sasljol. Keda nasvaljovaja obično džaja ko doktori hem objasninaja leske so osetinaja hem keraja sar so vakerela o doktori. Slično, keda siem nasvale ko duhovno pogled, valjani te dža ko jekh starešina, te vakera leske amari situacija hem te postapina sprema o bibliska sovetija so dobinaja len.

5. Sar šaj te džana dali amaro amalipe e Jehovaja tano ki opasnost?

⁵ Ko Jakov poglavje 5 siem pottiknime te kera lafi e starešinencar sekogaš keda osetinaja kaj valjani amenge pomoš ko duhovno pogled. Ama, posebno tano važno te roda lendar pomoš angleder te rumina amaro amalipe e Devlea! Mora te ova iskrena korkori amencar. I Biblija predupredinela amen kaj šaj te mislina kaj siem duhovno zorale, a ustvari na siem (Jak. 1:22). Baš akava slučingja pe nesave hristijanenge ko Sard, ama o Isus vakergja lenge kaj ola poviše na kerena e Jehovaskiri volja (Otk. 3:1, 2). Sar šaj te ispitina kobor siem paše e Jehovaja? Jekh način tano agjaar so ka sporedina save čuvstvija sine amen bašo Jehova keda krstingjem amen hem save čuvstvija isi amen baši leste akana (Otk. 2:4, 5). Šaj te puča amen: „Dali panda uživinava te čitinav i Biblija hem hor te razmislinav bašo adava so čitingjum? Dali sium prisutno ko sa o sostanokija hem dali redovno spreminava man baši lende? Dali sium revno ki služba sar angleder? Dali pobaro delo taro vreme trošinava le bašo materijalna bukja ili bašo nešto javer? Dali akana poviše razmislinava bašo adala bukja nego angleder?“ Ako o odgovor ko nesave taro akala pučiba tano oja, adava šaj te ovel znako kaj amaro amalipe e Jehovaja slabongja hem verojatno i situacija ka ovel panda pološno ako na keraja nešto bašo adava. Ako našti korkori te kera amaro amalipe pozoralo e Jehovaja ili ako više phaglem nesave taro e Devleskere merilija, valjani te roda pomoš taro starešine.

6. So valjani te keren okola so kergje seriozno grevo?

⁶ Normalno, ako nekoj kergja seriozno grevo bašo kova so šaj te ovel cidimo taro sobranie, valjani te kerel lafi nesave starešinaja (1. Kor. 5:11-13). Sekoleske so ka kerel seriozno grevo, valjani pomoš te šaj palem te ovel amal e Jehovaja. Te šaj te prostinel nekaske o Jehova preku i otkupnina, mora te kerel bukja kolencar so ka sikavel kaj kainela pe (Apo. 26:20). Ko adala bukja tano vklučimo te vakera e starešinenge ako kergjem seriozno grevo.

7. Kaske javereske valjani pomoš taro starešine?

⁷ O starešine na pomožinena samo okolenge so kergje seriozno grevo, nego hem okolenge soj slaba ko duhovno pogled (Apo. 20:35). Na primer, šaj tuke pharo te borine tut e pogrešna želbencar. Šaj tuke posebno pharo ako angleder te ove Svedoko sian sine zavisno tari droga, dikhea sine pornografija ili živinea sine nemoralno životo. Ma mislin kaj korkori valjani te borine tut akale iskušeniencar. Šaj te kere lafi nesave starešinaja kasaja so osetinea tut slobodno ili kaste so isi tut doverba kaj ka šunel tut, ka del tut praktična sovetija hem ka uverinel tut kaj o Jehova but ka radujnel pe ako ponadari da borinea tut protiv o pogrešna želbe (Prop. 4:12). Ako sian razočarimo bašo adava so panda isi tut pogrešna želbe, o starešine ka setinkeren tut kaj o Jehova radujnela pe adaleske so rodingjan pomoš. Adava sikavela kaj tuke važno tlo amalipe e Jehovaja hem kaj nane tut but bari doverba ki tute (1. Kor. 10:12).

8. Dali valjani te kera lafi e starešinencar baši sekoja greška so ka kera la? Objasnin.

⁸ Na valjani te dža ko starešine baši sekoja greška so ka kera la. Na primer, te pretpostavina amenge kaj povredingjan nesave phrale ili phenja, ili šaj čak našti kontroliringjan tli holi ko adava momenti. Namesto te dža ko nesavo starešina, ka ovel šukar te primenine e Isuseskoro sovet hem te smirine tut tle phralea ili tle phenjaja (Mat. 5:23, 24). Šaj te istražine baši osobine sar soj krotkost, strplivost hem samokontrola te šaj te sikave len panda poviše ki idnina. Ama džangjola pe, ako panda našti te rešine o problemi, šaj te rode pomoš taro nesavo starešina. Keda i Evodija hem i Sintihija našti sine te rešinen o problemi so sine len maškar peste, o apostol Pavle zamolingja jekhe phrale taro sobranie te pomožinel len. Slično, šaj te pomožinel tut nesavo starešina taro tlo sobranie (Fil. 4:2, 3).

SOSKE VALJANI TE VIKINA E STAREŠINEN?

9. Soske na valjani te mukha i ladž te čhinavel amen te vikina e starešinen? (Izreki 28:13).

⁹ Valjani amenge vera hem hrabrost te šaj te roda pomoš taro starešine keda kergjem seriozno grevo ili keda našti te borina amen e pogrešna želbencar. Na valjani te mukha i ladž te čhinavel amen te vikina e starešinen. Soske? Adaleske so o Jehova dengja amen e starešinen te šaj te pomožinen amen ponadari da te ovel amen paše amalipe lea. Znači, keda keraja lafi e starešinencar, sikavaja kaj isi amen doverba ko Jehova hem kaj siem leske poslušna. Svesna siem kaj valjani amenge pomoš te šaj ponadari da te kera adava soj ispravno (Ps. 94:18). Ama ako kergjem grevo, šaj te ova sigurna kaj o Jehova ka prostinel amenge ako vakeraja e starešinenge so kergjem hem ako čhinavaja te kera adava soj pogrešno. (Čitin Izreki 28:13.)

10. So šaj te slučinel pe ako probinaja te garava amare grevija?

¹⁰ Keda vakeraja e starešinenge o grevija so kergjem len, o Jehova šaj te prostinel amenge hem šaj palem te ova amala lea. Ama ako probinaja te garava amare grevija, i situacija šaj te ovel samo pološno. Keda o cari o David probingja te garavel ple grevija, mučinela pe sine ko duhovno, emocionalno pa čak hem ko fizičko pogled (Ps. 32:3-5). Sar so jekh povreda ili nasvalipe ko fizičko pogled but puti šaj te ovel pološno ako na keraja nešto odma, isto šaj te slučinel pe ako isi amen problemija ko duhovno pogled. O Jehova na mangela te slučinel pe adava, adaleske ov pottikninela amen „te rasčistina lea“ agjaar so ka kera lafi e starešinencar kolen so ov koristinela len te šaj te pomožinen amen te sasljova ko duhovno pogled (Isa. 1:5, 6, 18).

11. Sar šaj te vlijajnel upro javera ako na vakeraja e starešinenge bašo nesavo seriozno grevo?

¹¹ Ako garavaja kaj kergjem seriozno grevo, adava šaj te vlijajnel lošno upro javera. O Jehova šaj te na del više plo blagoslov ko sobranie, a isto agjaar šaj te ana ki opasnost o mir ko sobranie (Ef. 4:30). Tari javer strana ako doznajnaja kaj nekoj taro sobranie kergja seriozno grevo valjani te pottiknina le te kerel lafi e starešinencar bašo adava. Ako dikhaja kaj na kerela adava ko nesavo razumno vreme, tegani amen valjani te vakera e starešinenge. Ako na keraja adava, amen da ka ova kriva anglo Jehova (3. Moj. 5:1). O mangipe hem i vernost sprema o Jehova valjani te pottikninen amen te dža ko starešine hem te vakera lenge o čačipe. Agjaar ka pomožina o sobranie te ačhol čisto, a okoleske so kergja grevo pomožinaja palem te ovel amal e Jehovaja.

SAR POMOŽINENA AMEN O STAREŠINE?

12. Sar o starešine pomožinena okolenge soj slaba ko duhovno pogled?

¹² I Biblija pottikninela e starešinen te pomožinen okolenge soj slaba ko duhovno pogled (1. Sol. 5:14). Ako kergjan nesavo grevo o starešine šaj ka pučen tut pučiba te šaj te haljoven sar osetinea tut hem sar razmislinea (Izr. 20:5). Šaj nane tuke lokho te kere lafi e starešinencar adaleske so sian ladžutno ili šaj tuke nezgodno bašo adava so slučingja pe. Ama, šaj te pomožine lenge ako iskreno vakerea lenge solea borinea tut. Ma dara kaj ka vakere nešto kova so o javera ka haljoven le pogrešno (Jov 6:3). O starešine nane sigate te osudinen adava so vakerea, nego ola ka trudinen pe šukar te šunen tut hem te ovel len i celosno slika angleder te den tut sovet (Izr. 18:13). O starešine tane svesna kaj valjani vreme te šaj te pomožinen nekaske. Adaleske džanena kaj ponekogaš ka valjani te keren tuja lafi poviše puti te šaj te pomožinen tuke.

13. Sar o starešine šaj te pomožinen amenge pumare molitvencar hem e sovetencar tari Biblija? (Dikh hem o slike.)

¹³ Keda ka vikine e starešinen, ola ka trudinen pe te na keren te osetine tut panda poviše krivo bašo adava so kergjan. Namesto adava, ola ka molinen pe tuke. Šaj ka iznenadine tut kobor „bari sila“ šaj te ovel lengere molitven. Isto agjaar, ola ka pomožinen tut „agjaar so ka makhen [tut] masloja e Jehovaske ko anav“ (Jak. 5:14-16). Akava „maslo“ tano o čačipe taro e Devleskoro Lafi. Adalea so šukar ka koristinen i Biblija, o starešine šaj te smirinen tut, te utešinen tut hem te pomožinen tuke palem te ove paše e Jehovaja (Isa. 57:18). O sovetija so ka den tut tari Biblija šaj te keren te ove panda poodlučno ponadari da te kere adava soj ispravno anglo Jehova. Preku o starešine šaj te šune e Jehovaskoro glaso sar vakerela tuke: „Adava tano o drumo, džan ki leste!“ (Isa. 30:21).

14. Sprema Galatjanja 6:1, sar o starešine pomožinena nekaske so gelo ko pogrešno drumo? (Dikh hem o slike.)

¹⁴ Čitin Galatjanja 6:1. Keda jekh hristijani džala „ko pogrešno drumo“, ov na postapinela sprema e Devleskere pravedna merilija. Keda nekoj džala ko pogrešno drumo, adava šaj te značinel kaj angja nesavi odluka so nane mudro ili kaj kergja nesavo seriozno grevo. Adaleske so o starešine mangena adale phrale ili phenja, ola trudinena pe te isprajnen le „ko jekh krotko način“. O grčko lafi soj prevedimo sar „isprajnen“, koristinela pe sine te šaj te opišinel sar jekh doktori isprajnela jekh phago kokalo te šaj pravilno te sasljol. Jekh šukar doktori ka pazinel but keda probinela te isprajnel o kokalo te šaj so pohari te dukhal e paciente džikote kerela adava. Slično, keda o starešine probinena te isprajnen jekhe phrale kova so gelo ko pogrešno drumo, ola na mangena te keren leske panda pobari dukh. Namesto adava, ola kerena sa so šaj te den sovet e phraleske ko jekh ljubezno način. Isto agjaar, i Biblija vakerela e starešinenge te pazinen ki peste džikote kerena adava. Džikote pomožinena nekaske te primeninel o biblisko sovet, o starešine nikogaš na bistrena kaj ola da tane nesovršena hem kerena greške. Namesto te mislinen kaj ola tane popravedna adalestar so grešingja hem koleske so probinena te pomožinen, o starešine trudinena pe te oven ponizna hem te sikaven sočuvstvo (1. Pet. 3:8).

15. So šaj te kera ako isi amen nesavo problemi?

¹⁵ Šaj te ovel amen doverba ko starešine taro amaro sobranie. O Jehova sikavgja len kaj na valjani te vakeren e javerenge bašo amare lična bukja. Isto agjaar, ola siklile te den sovet tari Biblija namesto te vakeren amenge so ola mislinena kaj tano ispravno. Hem siklile kaj valjani ponadari da te pomožinen amen te ikljova ko krajo amare problemencar (Izr. 11:13; Gal. 6:2). Sekole starešina isi le različna osobine hem iskustvo, ama šaj te kera lafi bilo kole starešinaja keda isi amen nesavo problemi. Džangjola pe, amen nane te dža taro starešina ko starešina hem te roda sovet sa džikote na arakhaja nekas so ka vakerel amenge adava so mangaja te šuna. Ako keraja adava, ka ova sar okola kola so poviše mangena o javera te vakeren lenge „adava so ola ka mangen te šunen“, namesto te šunen „o korisno sikljojbe“ taro e Devleskoro Lafi (2. Tim. 4:3). Keda ka kera lafi jekhe starešinaja bašo nesavo problemi, šaj ov ka pučel amen dali više kergjem lafi javere starešinencar bašo adava hem savo sovet dengje amen. A i skromnost šaj ka pottikninel adale starešina te rodel sovet taro javer starešina (Izr. 13:10).

AMARI ODGOVORNOST

16. Savi odgovornost isi amen?

¹⁶ Iako grižinena pe amenge sar Devleskere bakhrenge, o starešine na vakerena amenge so te kera. Sekova jekh amendar tano odgovorno ple životoja te sikavel kaj tano verno samo e Devleske. Sekoj amendar ka odgovorinel anglo Devel bašo ple lafija hem postapke, a ov ka pomožinel amenge te ana mudra odluke hem te ačhova leske verna (Rim. 14:12). Adaleske, o starešine na vakerena amenge so te kera, nego koristinena i Biblija te šaj te pomožinen amenge te haljova sar o Jehova dikhela ki nesavi buti, a palo adava mukhena korkori te ana odluka. Keda razmislinaja bašo bibliska sovetija so dena amen hem primeninaja len, amen sikljovaja te koristina amari sposobnost te razmislina te šaj te ana mudra odluke (Evr. 5:14).

17. Ko so valjani te ova odlučna?

¹⁷ But siem blagodarna e Jehovaske bašo adava so mangipaja grižinela pe amenge, sar jekh šukar pastiri so grižinela pe ple bakhrenge! O Jehova bičhalgja e Isuse, e šukar pastire, te platinel i otkupnina baši amenge te šaj te živina večno (Jovan 10:11). Isto agjaar, o Jehova dengja amen starešine ko sobranija kola so grižinena pe amenge, baš sar so vetingja: „Ka dav tumen pastirija sprema mlo vilo hem ola ka parvaren tumen pendžaribaja hem haljojbaja“ (Erem. 3:15). Adaleske, keda duhovno siem slaba ili nasvale, na valjani te mislina amen dali te roda pomoš taro starešine. Te ova odlučna te koristina celosno i pomoš so dela amen o Jehova preku o starešine ko sobranie.