Pučiba taro čitatelija

Soske nane dozvolimo te objavinen pe amare publikacie ko javera internet-stranice ili socijalna mreže?

Nesave manuša mislinena kaj šaj slobodno te kopirinen ili te objavinen amare bibliska publikacie ko javera internet-stranice ili socijalna mreže adaleske so daja len bizo pare. Ama, akava šaj te kerel seriozna problemija hem phagela o Uslovija koristibaske taro amare internet-stranice.a (Dikh i fusnota.) Ko akala Uslovija jasno pišinela kaj nane dozvolimo „te objavinen pe crtime slike, elektronska publikacie, anava hem znakija soj zaštitime, muzika, slike, video ili statie tari akaja stranica ko Internet (ki bilo koja internet-stranica, stranica delibaske fajlija, stranica delibaske videomaterijalija ili socijalna mreže)“. Soske valjani te ovel asavko pravilo?

Sa so isi ko amare internet-stranice tano zaštitimo avtorska pravencar. Akava tano važno soske agjaar nane te koristinen pe ko pogrešno način. Nesave otpadnikija hem javera protivnikija ponekogaš čhivena amare publikacie ko lengere internet-stranice te šaj te privlečinen e Jehovaskere svedokon hem e javeren. Ama, ko adala stranice isi materijali kova so čhivela sumnje e manušenge ki godi (Ps. 26:4; Izr. 22:5). Javera koristingje amaro znako jw.org ili materijali taro amare publikacie ko reklame, ko aplikacie bašo mobilna uredija hem ko proizvodija bikibaske. Ama, adaleske so amaro materijali hem amaro znako tane zaštitime zakonea, šaj te dža ko sudo hem te čhinava len te na keren agjaar (Izr. 27:12). Ama, ako svesno mukhaja e manušenge, čak amare phralenge, te objavinen amare publikacie ko javera internet-stranice ili te koristinen o zaštitimo znako jw.org te šaj te bikinen nesave proizvodija, o sudie nane te poddržinen amen keda mangaja te čhinava e protivnikon hem e javeren te keren adava.

Opasno tano ako peravaja amare publikacie taro javera thana osven tari jw.org. O Jehova dela amen duhovno hrana samo preku o „verno hem razborito robo“ (Mat. 24:45). Adava „robo“ dela duhovno hrana samo preku o oficijalna internet-stranice — www.jw.org, tv.jw.org hem wol.jw.org. Isto agjaar, isi amen samo trin oficijalna aplikacie bašo mobilna uredija — JW Lan­guage^®, JW Li­brary^® hem JW Li­brary Sign Lan­guage^®. Ko akala stranice hem aplikacie, nane te arakha reklame ili bilo so taro e Satanaskoro sveto. Ama, ako i duhovno hrana laja la taro javer than, nane garancija kaj nane te ovel menimi ko nesavo način (Ps. 18:26; 19:8).

Osven adava, ako čhivaja amare publikacie ko internet-stranice kote so šaj te komentarinel pe, adava dela prilika e otpadnikon hem e javeren te kritikujnen e Jehovaskere organizacija. Nesave phralja počmingje te akošen pe adale manušencar ko Internet, ama adava angja panda pobari ladž e Jehovaske. Asavke diskusie ko Internet nane o ispravno način te menina nekaskoro razmisluvanje hem te pomožina leske te haljovel o čačipe (1. Tim. 6:3-5; 2. Tim. 2:23-25). Isto agjaar, nesave manuša kergje hovavne profilija ko socijalna mreže hem hovavne internet-stranice ko anav e organizacijake hem ko anav e phralengoro taro Vodečko telo. Ama, nijekh členi taro Vodečko telo nane le pli internet-stranica, ili profili ki nesavi socijalno mreža.

Keda vakeraja e manušenge te džan ki jw.org, pomožinaja te širinel pe „o šukar haberi“ (Mat. 24:14). Amare internet-stranice hem aplikacie ovena sa pošukar. Mangaja sarinen te ovel len korist lendar. Adaleske, šaj preku mejl te bičhala publikacie ko elektronsko formati ili link taro materijali kova so arakhljovela ki jw.org. Adalea so vakeraja e manušenge te džan ko amare oficijalna internet-stranice, povrzinaja len e edinstveno kanalea preku kova so o Jehova dela duhovno hrana — „o verno hem razborito robo“.