I bezbednost e džuvlengiri—So vakerela i Biblija

„Keda sium sine tikni, mo phral sekova dive maltretirinela man sine hem fizički hem lafencar. Otkeda ženingjum man, mi sasuj da kerela sine mange o isto. Hem oj hem mo sastro dikhena sine ki mande sar robo. Mangava sine te mudarav man.“ (Madu,a Indija)

„Ko celo sveto isi nasilstvo upro džuvlja“ vakerela i Svetsko zdravstveno organizacija. Proceninela pe kaj skoro sekoja trito džuvli, nekogaš ko plo životo, sine fizički ili seksualno maltretirimi.

Ako adava slučingja pe tuke da šaj daraja kaj palem ka ove fizički, lafencar hem seksualno maltretirimi kote hem te dža. Adaleske so isi asavko nasilstvo upro džuvlja šaj mislinea tuke kaj bute dženenge o džuvlja nane važna. Ama dali o džuvlja tane važna e Devleske?

Sar dikhela o Devel ko džuvlja?

Biblisko stiho: „O Devel... kergja len murš hem džuvli“ (1. Mojseeva 1:27).

So značinela akava: O Devel kergja e muršen hem e džuvlen. Ov mislinela kaj o solduj zaslužinena te oven poštujme. Isto agjaar ov adžikerela taro rom „te mangel ple romnja sar korkori pes“, a na te trudinel pe te kontrolirinel la lošna lafencar ili nasilstvoja (Efešanja 5:33; Kološanja 3:19). Jasno dikhjola kaj i bezbednost e džuvlengiri tani but važno e Devleske.

„Keda sium sine tikni, sium sine seksualno zloupotrebimi tari mi familija. Keda sine man 17 berš, mlo šefi zakaningja pe mange kaj ka del man otkaz ako na sovava lea. Pokasno, sium sine ponižimi taro mo rom, me roditelija hem o komšie. Ama palo nesavo vreme doznajngjum o čačipe bašo Jehova,b o Stvoriteli. Ov poštujnela e džuvlen. Adava uveringja man kaj mangela man hem kaj sium leske skapoceno.“ (Maria, Argentina)

So ka pomožinel tuke te počmine te ove pošukar ko emocionalno pogled?

Biblisko stiho: „Isi hem amala kola soj tane popaše taro phral“ (Izreki 18:24).

So značinela akava: O čačutno amal ka poddržinel tut. Vaker sar osetinea tut nekaske kaste so isi tut doverba, ako mislinea kaj adava ka pomožinel tut.

„Sium sine seksualno zloupotrebimi hem 20 berš na vakergjum nikaske. Adaleske na sium sine srekjno hem sium sine preterano sekirimi hem sine man depresija. Ama keda vakergjum taro so nakhljum nekaske kaste so sine man doverba, lokhilo mange.“ (Elif, Turcija)

Biblisko stiho: „Sa tumare griže frden [e Devleske], soske ov grižinela pe tumenge“ (1. Petareskoro 5:7).

So značinela akava: Keda molinea tut, o Devel čače šunela tut (Psalm 55:22; 65:2). Adaleske so grižinela pe tuke, ov ka pomožinel tut te haljove kobor sian leske čače skapoceno.

„Adava so sikljovava sine bašo Jehova pomožingja man te sasljarav mle emocionalna rane so sine man. Akana šaj te molinav man e Devleske hem te phenav leske sar osetinava man. Ov tano sar jekh amal so čače haljola sar osetinava man.“ (Ana, Belise)

Dali o Devel nekogaš ka čhivel krajo bašo maltretiribe e džuvlengoro?

Biblisko stiho: „Jehova... ka ane pravda e čhavenge bizo dada hem okolenge soj mučime, te šaj nikoj te na daral taro manuš so merela“ (Psalm 10:17, 18).

So značinela akava: O Devel panda hari ka čhivel krajo bašo sa o nepravde, sar soj o maltretiribe hem o nasilstvo upro džuvlja.

„Sine mange sar melemi ki rana keda doznajngjum kaj o Jehova panda hari ka čhivel krajo bašo maltretiribe e romnjengoro hem e čhajengoro. Adava dengja man andruno mir.“ (Roberta, Meksiko)

Te šaj te doznajne poviše bašo adava savi nadež dela i Biblija, soske šaj te ovel tut doverba ko lakere vetuvanja hem sar e Jehovaskere svedokija avdive pomožinena e javerenge agjaar so koristinena i Biblija, rode besplatno poseta.

Perav akaja statija ko pečatimo formati.