So vakerela i Biblija baši nuklearno vojna?

E svetoske zakaninela pe nuklearno vojna soske o svetska sile khedena sa poviše nuklearno oružje. E manušen isi len pričina te oven sekirime soske kobor poviše nuklearno oružje isi, doborom pobari i opasnost tari nuklearno vojna. O manuša darana isto agjaar kaj ako jekh phuv koristinela čak tikni nuklearno bomba, adava ka uništinel o sveto. O spisanie Bulletin of the Atomic Scientists vakerela kaj amen živinaja „celo vreme ki dar tari nuklearno opasnost“.

Šaj li te počminel nuklearno vojna? Ako oja, dali amari planeta ka ačhol? Hem sar te ikljova ko krajo e sekiracijaja kaj šaj te avel dži ki nuklearno vojna? So vakerela i Biblija?

Ki akaja statija

Dali i Biblija vakergja angleder kaj ka ovel nuklearno vojna?

I Biblija konkretno na spomninela nuklearno vojna. Sepak, i zakana tari nuklearno vojna tani posledica taro stavija hem o nastanija kola so i Biblija prorokujngja len.

Te dikha sar akala bibliska stihija tane povrzime adalea so avdive slučinela pe ko sveto:

Bibliska stihija: O učenikija pučle e Isuse: „Kova ka ovel o znako baši tli prisutnost hem bašo krajo akale svetoskoro?“ O Isus odgovoringja: „Ka borinel pe narodo protiv narodo, hem carstvo protiv carstvo“ (Matej 24:3, 7).

Svetska nastanija: O države maškar kolende soj hem okola so isi len ili so šaj te keren nuklearno oružje, sa poviše tane ko konflikt javere državencar hem koristinena oružje.

„Ko posledna berša, o sveto ovela sa ponasilno, sa poviše hem poviše isi konfliktija“ (Proekti lociribaske vooružena konfliktija hem podatokija bašo nastanija [ACLED]).

Biblisko stiho: „Ko vreme e krajoskoro, o cari taro jug ka borinel pe [e carea taro sever]“ (Daniel 11:40).

Svetska nastanija: O protivnička narodija hem lengere sojuznikija borinena pe, javere lafencar natprevarinena pe bašo adava koj te ovel najmokjno, baš sar so prorokujngja i Biblija. Iako o avdisutne najbare nuklearna sile na napadinena pe jekh jekhea direktno, ola ponadari da proizvedinena sa poviše hem poviše nuklearno oružje.

„Ko posledna deš berš dikhaja kaj sa poviše isi konfliktija maškar o države, maškar kolende so isi slučaija kote so o glavna sile poddržinena o sprotivna strane“ (Programa tari Upsala podatokonge bašo konfliktija [UCDP]).

Bibliska stihija: „Ko posledna dive ka ovel but pharo vreme. Soske o manuša... nane te oven spremna bašo bilo savo dogovor, klevetnikija, nane te kontrolirinen pe, surova“ (2. Timotej 3:1-3).

Svetska nastanija: Isto sar but manuša avdive, o svetska vodačija da but puti na složinena pe jekh jekhea. Hem namesto ko mirno način te arakhen rešenie bašo pumare razlike, nesave probinena te rešinen o konfliktija zakanibaja ili silaja. Asavke postapke panda poviše bajrarena o rizik baši nuklearno vojna.

„Ako na arakhela pe način sar te sorabotinel pe jekh jekhea, o konfliktija ka oven sa poopasna“ (S. Saran hem Dž. Harman, Svetsko ekonomsko forum).

Dali o Devel ka dozvolinel nuklearno vojna?

I Biblija na vakerela. Ama oj vakerela kaj ko amaro vreme o manuša but ka daran, javere lafencar ka slučinen pe bukja so ka daraven (Luka 21:11). Jekh primer bašo adava tano o frdibe atomska bombe ki Dujto svetsko vojna. I Biblija objasninela soske o Devel dozvolinela vojne. Te šaj te doznajne poviše, dikh o videoklipi Soske o Devel panda mukhela te ovel o lošnipe hem o muke?

Dali amari planeta ka ačhol?

Oja. Čak ako o manuš palem koristinela nuklearno oružje, o Devel nane te mukhel i situacija te ovel doborom lošno so ka uništinel pe celo sveto. I Biblija otkrinela amenge kaj amari planeta na samo so nane te ovel uništimi nego hem ka ovel e manušengoro kher zasekogaš.

„I phuv ačhovela zasekogaš“ (Propovednik 1:4).

„O Devel, okova so oblikujngja hem stvoringja i phuv... na stvoringja la džabe, nego kergja la te živinel pe ki late“ (Isaija 45:18).

Nesave mislinena kaj ki idnina ki amari planeta ka živinen samo hari manuša kola so ka mučinen pe te preživinen ki jekh pusto phuv, zagadimi taro jekh nuklearno otpad. I Biblija sikavela isto agjaar kaj sekoja šteta so kergje o vojne e phuvjake, ka ovel celosno popravimi.

„Ka radujnen pe i pustina hem i phuv bizo pani, ka radujnel pe i phuv soj pusto hem ka cvetonel sar šafrani“ (Isaija 35:1).

Manuša so asana zaedno kerena buti ko raj ki phuv. — O Devel mangela te ova srekjna hem te živina ko but šuže uslovija ki phuv

Amaro Stvoriteli kergja i phuv te ovel la jekh posebno sposobnost korkori te šaj te obnovinel pe. Osven adava, o Devel ka koristinel pli mokj te šaj te obnovinel i phuv, oj zasekogaš ka ovel sar jekh but šužo kher e manušenge (Psalm 37:11, 29; Otkrovenie 21:5).

Sar šaj te ikljove ko krajo ako isi tut „nuklearno anksioznost“?

Nesave manušen šaj isi len „nuklearno anksioznost“, so značinela „dar tari nuklearno vojna hem taro lakere posledice“. O bibliska vetuvanja hem sovetija šaj te pomožinen asavkenge te na daran doborom. Sar?

I Biblija vakerela kaj e phuvja hem okolen so živinena ki late adžikerela but šuži idnina. Adava so ka doznajna nešto poviše baši akaja nadež, koja so ki Biblija tani sporedimi kotvaja, šaj te pomožinel amenge te ova pohari sekirime (Evreija 6:19). Isto agjaar, šaj te ova pohari anksiozna agjaar so ka živina dive diveske hem nane previše te razmislina so sa šaj te slučinel pe ki idnina. Sar so vakergja o Isus, „sekova dive isi le ple problemija“ (Matej 6:34).

Ustvari, važno tano sekova jekh te grižinel pe bašo plo emocionalno sastipe. Adava šaj te kera le agjaar so nane bizi potreba but te čitina, te šuna ili te dikha informacie kola so ki amende bajrarena o sekiracie, sar na primer, diskusie, pretpostavke hem mislenja bašo adava so slučinela pe e najneve nuklearno oružjea. Ama adava na značinela kaj na siem svesna baši realnost. Namesto adava, keraja sa so šaj te na razmislina previše bašo bukja upro kola so nane amen nisavi kontrola hem kola so šaj nikogaš nane te slučinen pe.

„O sekiracie anena pharipe e manušeske ko vilo, a o šukar lafi kerela le radosno“ (Izreki 12:25).

Barem nesavo vreme izbegin lošna vestija hem koncentririn tut ko pozitivna bukja ko tlo životo.

„O Devel, kova so dela nadež, neka del tumen bari radost hem mir soske verujnena“ (Rimjanja 15:13).

Slike: Jekh manuš dikhela angle hem isi le nadež. 1. Pali leste dikhjona scene tari vojna: voeno avioni, nuklearna rakete hem jagalo oblako so ličinela sar pečurka. 2. Angli leste dikhjola jekh čisto phuv planinecar, zelena livade, reka so thavdela hem čiriklja. — I Biblija dela sigurno nadež kaj ka ovel pošukar idnina

Adava so ka doznajne nešto poviše bašo e Devleskere vetuvanja šaj te del tut nadež, radost hem andruno mir.

Dali o Armagedon tano nuklearno vojna?

Nesave mislinena kaj o Armagedon tano globalno nuklearno vojna koja so ka anel katastrofalna posledice.

Ama ki Biblija e lafea „Armagedon“ mislinela pe ki vojna maškar o Devel hem „o carija taro celo sveto“, javere lafencar o manušikane vladea (Otkrovenie 16:14, 16). Ko Armagedon nane te oven pogodime o manuša so nane kriva, sar so sine slučaj ki jekh nuklearno katastrofa. Namesto adava, ko Armagedon o Devel ka uništinel samo e lošnon, hem adava ka anel čačutno mir hem sigurnost (Psalm 37:9, 10; Isaija 32:17, 18; Matej 6:10).

Savo rešenie dela i Biblija bašo vojne?

„Ov čhinavela o vojne ki celi phuv. Phagela o strele hem o kopje, jagaja tharela i voeno kočija“ (Psalm 46:9).

O Jehovab o Devel ka sikavel pli mokj upro narodija so vodinena vojne agjaar so ka čhivel krajo bašo lengere konfliktija hem ka uništinel lengoro oružje. Adava ka kerel le preku plo Carstvo — jekh nebesno vlada koja so ka lel i vlast upri celi phuv (Daniel 2:44).

Keda ka vladinel e Devleskoro Carstvo o manuša ka sikljon te živinen ko mir hem ko jekhipe. Adaleske so ka ovel samo jekh vlada upri celi phuv, nane više te oven konfliktija maškar o narodo, o manuša više nane te sikljoven te borinen pe (Mihej 4:1-3). Ake sar i Biblija opišinela adava vreme: „Sekova jekh ka bešel teli pli drakh hem teli pli smokva hem nikoj nane te daravkerel len“ (Mihej 4:4).

a Dikh i statija „Što e Armagedon?“

b Jehova tano o anav e Devleskoro (Psalm 83:18). Dikh i statija „Koj tano o Jehova?“

Dali o biblisko lil Otkrovenie kerela lafi baši nuklearno vojna?

Nesave mislinena kaj o biblisko lil Otkrovenie kerela lafi baši nuklearno katastrofa koja so ka uništinel celo phuv (Otkrovenie 6:14; 8:7-12; 16:1-21). Agjaar mislinena soske spomninela pe jag koja so ka hulel taro nebo ki phuv (Otkrovenie 13:11-13). Ama e Jehovaskere svedokija haljovena kaj akalea na mislinela pe ki nuklearno vojna so ka slučinel pe ko celo sveto, nego ko koristibe atomska bombe ki Dujto svetsko vojna.

Iako o lil Otkrovenie prorokujnela akala nastanija leskiri cel nane te khuvel dži ko detalija te šaj te daravkerel e manušen. Keda čitinea o lil Otkrovenie neka oven tut ki godi akala bukja:

O lil koristinela but znakija, javere lafencar simbolija kola so na valjani te haljoven pe doslovno (Otkrovenie 1:1).
E lile nane le cel te daravkerel e čitatelen. Namesto adava, leskoro haberi anela radost okolenge so haljovena le hem primenine le (Otkrovenie 1:3).

Bašo poviše informacie, dikh i statija „Možeme li da ja razbereme bibliskata kniga Otkrovenie?“