Sar izgledinela o biblisko kursi so nudinena e Jehovaskere svedokija?
E Jehovaskere svedokija nudinena biblisko kursi kote so šaj te sikljove so sikavela i Biblija. Akava biblisko kursi šaj te pomožinel tuke:
Te ovel tut srekjno životo
Te ove e Devleskoro amal
Te doznajne so vetinela i Biblija baši idnina
Akate ka doznajne:
Ako prifatinava biblisko kursi, ka valjani li te ovav e Jehovaskoro svedoko?
Ako angleder proučingjum i Biblija e Jehovaskere svedokoncar, dali šaj palem te proučinav?
Dali šaj korkori te proučinav i Biblija bizo nekoj te sikavel man?
Sar izgledinela jekh biblisko kursi?
Jekh taro e Jehovaskere svedokija ka pomožinel tuke te zapoznajne tut pošukar e Biblijaja, agjaar so ka dikhen tema po tema. E publikacijaja Ov bahtalo zasekogaš ka šaj hari pohari te doznajne so sikavela i Biblija hem sar šaj oj te pomožinel tuke. Ako mangea poviše te doznajne, dikh akava videoklipi.
Dali valjani te platinav bašo akava biblisko kursi?
Na. E Jehovaskere svedokija ikerena pe ko lafija so vakergja len o Isus ple učenikonge: „Dobingjen bizo pare, bizo pare den“ (Matej 10:8). Isto agjaar, besplatna tane i Biblija hem i publikacija Ov bahtalo zasekogaš, kola so koristinena pe bašo biblisko kursi.
Kobor vreme trajnela o kursi?
Bašo celo kursi isi 60 lekcie. Tutar zavisinela kobor sigate ka obrabotinen o lekcie. Bute dženenge odgovorinela te proučinen jekh ili poviše lekcie ko kurko.
Sar te rodav biblisko kursi?
1. Pher o onlajn formulari. Tle lična podatokija ka koristina len samo te šaj jekh taro e Jehovaskere svedokija te kontaktirinel tut.
2. Nekoj taro e Jehovaskere svedokija ka kontaktirinel tut. Ov ka objasninel tuke nešto poviše bašo kursi hem ka odgovorinel ko pučiba so isi tut.
3. Tu hem okova so ka proučinel tuja šaj te dogovorinen tumen keda hem kote te proučinen. Šaj te dogovorinen tumen te arakhen tumen lično ili te proučinen preku telefoni, video konferencija, pismo ili imejl. O kursi šaj te trajnel okolu jekh saati, ama šaj te ovel hem pohari ili poviše, zavisinela sar tuke ka odgovorinel.
Dali šaj prvo te dikhav sar izgledinela o kursi?
Oja. Bašo adava valjani te phere o onlajn formulari. Keda jekh taro e Jehovaskere svedokija ka kontaktirinel tut, vaker kaj mangea prvo te dikhe sar izgledinela o biblisko kursi hem te dikhe dali ka svidžinel pe tuke. Ov ka koristinel i brošura Ov bahtalo zasekogaš, koja so isi la trin lekcie. Palo adava ka dikhe dali ka mange te prodolžine te proučine.
Ako prifatinava biblisko kursi, ka valjani li te ovav e Jehovaskoro svedoko?
Na. E Jehovaskere svedokija mangena te sikaven e javeren baši Biblija, ama nikogaš silaja na čhivena nekas te avel ki lengiri religija. Namesto adava, objasninena so vakerela i Biblija hem poštujnena sekaskoro pravo te odlučinel ko so ka verujnel (1. Petrovo 3:15).
Šaj li te koristinav mli Biblija?
Oja, šaj te koristine kova mangea prevod tari Biblija. Amen koristinaja o prevod Nov svet, kova soj tano točno hem polokho haljojbaske. Ama, svesna siem kaj but džene mangena te koristinen prevod kova so ola pendžarena.
Šaj li te kaninav javeren ko kursi?
Oja. Šaj te ovel prisutno nekoj tari tli familija ili bilo kova amal so ka kanine le.
Ako angleder proučingjum i Biblija e Jehovaskere svedokoncar, dali šaj palem te proučinav?
Oja. Ustvari akana šaj panda poviše te uživine ko proučibe, soske sa tano kerdo sprema adava soj tano potrebno e manušeske hem isi but videoklipija.
Dali šaj korkori te proučinav i Biblija bizo nekoj te sikavel man?
Oja. Iako poviše taro adala so proučinena i Biblija mangena nekoj te pomožinel lenge ko adava, sepak nesave mangena korkori te proučinen. Ko delo Pomoš proučibaske i Biblija isi bukja istražibaske kola so ka pomožinen tuke korkori te proučine i Biblija. Ake nesave lendar:
Bibliska videoklipija. Akala kratka videoklipija sikavena nesave osnovna bibliska sikljojba.
Odgovor bašo bibliska pučiba. Ko akala statie ka arakhe but odgovorija kola so arakhljovena ki Biblija.