So značinela te poštujne te dade hem te daja?
So vakerela i Biblija:
Ko but thana ki Biblija dendi tani i zapoved: „Poštujn te dade hem te daja“ (2. Mojseeva 20:12; 5. Mojseeva 5:16; Matej 15:4; Efešanite 6:2, 3). Te dikha štar načinija sar šaj te kera adava.
Ov lenge blagodarno. Poštujnea te dade hem te daja keda sian lenge blagodarno bašo sa so kergje tuke. Šaj te sikave kaj ceninea len agjaar so ka šune lengere sovetija hem pouke (Izreki 7:1, 2; 23:26). I Biblija ohrabrinela amen te dičina amen amare roditelencar (Izreki 17:6).
Poštujn lengoro avtoriteti. Posebno keda tano nekoj terno, sikavela kaj poštujnela pe dade hem pe daja ako prifatinela o avtoriteti so dengja len o Devel. O Kološanite 3:20 phenela e ternenge: „Tumen čhavalen, šunen tumare roditelen ko sa, soske agjaar mangela o Gospodari“. Čak o Isus keda sine čhavo sine poslušno pe roditelenge (Luka 2:51).
Sikav kaj poštujnea len (3. Mojseeva 19:3; Evreite 12:9). Adava but puti šaj te dikhel pe taro tle lafija hem taro način sar vakerea len. Točno tano adava kaj nesave roditelija ponekogaš postapinena ko način kova so kerela e čhavenge te ovel pharo te poštujnen len. Ama, čak tegani, o čhave šaj te sikaven kaj poštujnena len agjaar so nane te vredžinen len ni lafencar ni postapkencar (Izreki 30:17). I Biblija sikavela amen kaj tani but seriozno buti ako amare lafencar vredžinaja amare roditelen (Matej 15:4).
Grižin tut lenge. Keda te roditelija ka oven phure, šaj ka valjani lenge pomoš. Ka sikave kaj poštujnea len ako dea tutar sa te ovel len sa soj lenge potrebno (1. Timotej 5:4, 8). Na primer, kratko angleder te merel, o Isus mukhlja nekoj te grižinel pe leskere dajake (Jovan 19:25-27).
Pogrešno mislibe bašo adava so značinela te poštujnen pe o roditelija
Pogrešno mislibe: Ako poštujnea te dade hem te daja, mora te mukhe ola te kontrolirinen tlo brako.
Čačipa: I Biblija vakerela kaj o brako valjani te ovel považno taro o javera familijarna vrske. Ki 1. Mojseeva 2:24 pišinela: „Adaleske o manuš ka mukhel pe daja hem pe dade hem ka spojnel pe ple romnjaja“ (Matej 19:4, 5). Normalno, o bračna parija šaj te ovel len korist taro sovetija so dena len lengere roditelija (Izreki 23:22). Ama, o rom hem i romni isi len pravo te odlučinen dži ki koja mera ka dozvolinen e roditelenge hem e javere familijake te mešinen pe lenge ko brako (Matej 19:6).
Pogrešno mislibe: E roditelen isi len najbaro avtoriteti.
Čačipa: O Devel dengja odredeno avtoriteti e roditelenge. O avtoriteti soj dendo e manušenge tano ograničimo hem nane pobaro taro e Devleskoro. Na primer, keda e Isuseskere učenikija sine anglo sudo hem sine lenge naredimo te na šunen e Devle, ola odgovoringje: „Mora poviše te šuna e Devle, nego e manušen“ (Dela 5:27-29). Isto agjaar, o čhave valjani te oven „poslušna ple roditelenge ko Gospodari“, adava značinela te oven lenge poslušna ko sa soj tano sprema e Devleskere zapovedija (Efešanite 6:1).
Pogrešno mislibe: Ako poštujnea te roditelen, ka prifatine lengere veruvanja.
Čačipa: I Biblija pottikninela amen te ispitina adava so vakerena amenge o javera te šaj te dikha dali adava tano čače (Dela 17:11; 1. Jovanovo 4:1). Nekoj so kerela adava šaj ka prifatinel veruvanja kola so razlikujnena pe taro veruvanja leskere roditelengere. I Biblija spomninela bute verna slugen e Devleskere kola so na prifatingje i religija ple roditelengiri, sar soj o Avraam, i Rut hem o apostol Pavle (Isus Navin 24:2, 14, 15; Rut 1:15, 16; Galatite 1:14-16, 22-24).
Pogrešno mislibe: Ako poštujnea te dade hem te daja, ka ikere o adetija so kerena pe e mulenge.
Čačipa: I Biblija vakerela: „E Jehova, te Devle, obožavin le hem služin samo leske“ (Luka 4:8). Ako nekoj kerela adetija e mulenge, tegani kerela nešto so na mangela o Devel. Osven adava, ki Biblija pišinela kaj „o mule na džanena ništo“. Ola nane svesna so kerela pe ki lengiri čest, a isto agjaar našti ni te pomožinen ili te keren šteta e dživdenge (Propovednik 9:5, 10; Isaija 8:19).