Sar te sikavel pe mangipe ko brako?

Sar so nakhena o berša, nesave bračna parija sa pohari sikavena mangipe jekh jekheske. Ako akava ovela ko tumaro brako da, valjani li te sekirinen tumen bašo adava?

• So valjani te džane

• So šaj te kere

So valjani te džane

O mangipe tano potrebno te šaj o brako te ovel zoralo. Sar amen so našti te ova saste hem zorale bizo hrana hem pani, agjaar našti ni o brako te ačhol zoralo hem stabilno ako o rom hem i romni na sikavena mangipe maškar peste. Čak palo but berša brako, o rom hem i romni valjani sekova dive te uverinen jekh jekhe kaj mangena pe hem grižinena pe jekh jekheske.

O čačutno mangipe nane sebično. Nekoj so čače mangela, tegani ov kerela sa te šaj o javer te ovel bahtalo. Ako o bračna partnerija tane obzirna, nane te sikaven peske mangipe samo keda isi len potreba taro adava. Namesto adava, ola lena ko predvid o potrebe pumare bračna partnerengere hem trudinena pe te zadovolinen lengere potrebe.

E romnjenge obično valjani te sikavel pe poviše vnimanie nego e romenge. Jekh rom šaj te mangel iskreno ple romnja. Ama ako adava sikavela le samo ko početok taro dive hem ko krajo, ili samo angleder te ovel len odnosija, tegani i romni šaj te osetinel kaj nane čače mangli. But pošukar tano keda o rom sekova dive koristinela sekoja prilika te vakerel lake kaj mangela la.

So šaj te kere

Sikav mangipe lafencar. Ednostavna lafija sar soj „mangava tut“ ili „but značinea mange“ ka uverinel tle bračno partnere kaj tano manglo.

Biblisko načelo: „O muj vakerela adava solea tano pherdo o vilo“ (Matej 12:34).

Sovet: Adava so osetinea šaj te vakere le ko javera da načinija. Na primer, šaj te pišine jekh kratko pismo, imejl ili poraka.

Sikav mangipe postapkencar. Jekh gušibe, jekh čumibe ili samo astaribe taro vas sikavela kaj o lafija „mangava tut“ tane iskrena. Isto agjaar, iskreno te grižine tut šaj te sikavel pe nežno galibaja ili dikhibaja, a ponekogaš hem poklonencar. O rom šaj te kerel nesave praktična bukja ple romnjake —sar soj te phiravel lake o phare kjese, te phravel lake o udar, te thovel lake čare, te čhivel o šeja ki mašina thojbaskiri ili te kerel hajbaske. Bute romnjenge adava nane samo praktično pomoš, nego adalea sikavela pe mangipe!

Biblisko načelo: „Te na manga amen samo lafencar ili samo čhibjaja, nego postapkencar“ (1. Jovanovo 3:18).

Sovet: Ponašin tut tle bračno partnerea sar keda sien sine ki vrska.

Odvojnen vreme jekh jekheske. Keda odvojnea vreme te ove korkori tle bračno partnerea, tu sikavea leske kaj mangea le hem kaj mangea te ove uzi leste, a agjaar kerea pozoralo o brako. Točno, adava šaj te ovel pharo keda isi tut čhave ili but obvrske so valjani te završine len. Ama, šaj te keren nešto ednostavno, na primer redovno te phiren tumenge zaedno.

Biblisko načelo: „Te proceninen soj tano najvažno“ (Filipjanite 1:10).

Sovet: Nesave bračna parija so kerena but buti hem isi len but obvrske redovno odvojnena vreme te džan ko večere ili ikljona vikendija te šaj te oven zaedno.

Pendžar šukar tle bračno partnere. Sekova manuš tano posebno hem isi le potreba ko različna načinija te sikavel pe leske mangipe. Adaleske ker lafi tle bračno partnerea bašo adava sar mangela te sikave leske mangipe hem dali valjani panda poviše te kere adava. Palo adava de tutar sa te kere adava so rodela tutar tlo bračno partneri. Ma bistre kaj o mangipe tano but potrebno te šaj o brako te ovel zoralo.

Biblisko načelo: „O mangipe... na rodela pli korist“ (1. Korinkjanite 13:4, 5).

Sovet: Namesto te adžikere samo tlo bračno partneri te sikavel tuke pobaro mangipe, puč tut: „So šaj te kerav te šaj panda poviše te mangel man?“