„Nane te otkažinav man tari mli besprekornost!“

Zamislin tuke sar jekh manuš bešela tele ki phuv korkori, teljarde šerea, khedime pikjencar hem taro šero dži ko pre pherdo ranencar kola so but dukhana. Nane le sila čak ni te brkinel e makhjen kola so khedena pe okolu leste. Bešela ko pravo te šaj te sikavel kaj osetinela bari žal hem dukh, hem našti te kerel ništo osven te harovel pe jekhe kotorea taro phuvjalo čaro. Akava manuš kova so nekogaš sine ugledno hem barvalo, akana o javera dikhena lošno ki leste. Sarine irangje leske dumo — o amala, o komšie hem i familija. O manuša, pa čak o čhave asana sine leske. Ov mislingja kaj leskoro Devel da, o Jehova, tano protiv leste. Ama, adava na sine agjaar (Jov 2:8; 19:18, 22).

Akava manuš vikinela pe Jov. O Devel vakergja kaj „sar leste nane javer ki phuv“ (Jov 1:8). Čak vekoncar palo leskoro meribe, o Jehova na meningja plo mislenje baši leste. Panda dikhela le sine sar jekh taro najpravedna manuša kola so živingje ki Phuv (Ezekiel 14:14, 20).

Dali tute da isi tu pharipa hem nevolje? Ako oja, e Joveskoro primer šaj te del tut bari uteha. Isto agjaar, ka pomožinel tuke panda pošukar te haljove jekh osobina koja so valjani te ovel le sekova verno sluga e Devleskoro. Adaja tani i besprekornost. O manuša sikavena akaja osobina keda ačhovena verna hem poslušna e Devleske, hem prodolžinena te keren leskiri volja iako isi len pharipa. Te dikha so šaj te sikljova taro Jov.

So na džanlja o Jov

O Mojsej, e Devleskoro verno sluga, pišingja o izveštaj bašo Jov najverojatno nesavo vreme palo leskoro meribe. Vodimo taro e Devleskoro sveti duh, o Mojsej opišingja o nastanija ki Phuv kola so vlijajngje upro Jov, ama isto agjaar, otkringja nesave nastanija kola so slučingje pe ko nebo.

Ko početok taro izveštaj čitinaja kaj e Jove sine le bahtalo hem ispolnimo životo. Sine le baro barvalipe hem sine poštujmo taro manuša kola so živinena sine ko Uz, kova so verojatno arakhljovela sine ko severno delo taro Arapsko Poluostrov. O Jov taro vilo pomožinela sine e čorolenge hem okolenge kaske so valjani sine pomoš. Ov hem leskiri romni sine len deš čhave. Soj najvažno, o Jov sine duhovno manuš. Isto sar o Avraam, o Isak, o Jakov hem o Josif, kola so sine leske dur familija, o Jov dela sine sa pestar te šaj te ugodinel e Jehovaske. Sar familijarno poglavari, e Jove sine le uloga sar svešteniko hem redovno dela sine žrtve bašo ple čhave (Jov 1:1-5; 31:16-22).

Taro jekh puti o pisateli e lileskoro Jov, meninela o fokus e raskažibaskoro, hem opišinela so slučingja pe ko nebo — nešto so o Jov našti sine te džanel. Maškar o verna angelija so sine khedime anglo Devel alo o buntovno angeli da o Satana. O Jehova džanlja kaj ov mrzinela e pravedno Jove, hem adaleske koristingja le sar šukar primer bašo adava so značinela te ovel pe besprekorno. O Satana bizi ladž odgovoringja: „Zarem o Jov džabe darala taro Devel? Na čhivgjan li tu ograda so zaštitinela le, leskoro kher hem sa so isi le?“ O Satana hor taro vilo mrzinela e manušen soj tane verna e Jehovaske. Keda služinena celo vilea e Jehovaske, ola sikavena kaj o Satana tano predavniko kova so na mangela nikas. O Beng krivingja e Jove kaj služinela e Devleske taro sebična pričine. Ov sine sigurno kaj, ako o Jov našavela sa so isi le, ka vakerel lošna bukja bašo Devel (Jov 1:6-11).

O Jov na džanlja kaj o Jehova, ustvari dengja le bari čest — te dokažinel kaj o Satana tano hovavno. O Devel dozvolingja e Satanaske te lel taro Jov sa so sine le. Ama, na smejnela sine te vazdel plo vas upri leste. O Satana edvaj adžikergja te kerel plo zlobno plani. Samo jekhe diveske, ov angja nekobor phare nevolje e Joveske. O Jov doznajngja kaj našavgja celo stoka — najprvo e guruven hem e heren, a palo adava e bakhren hem e kamilen. Soj panda pološno, o sluge so arakhena len, sine mudarde. Jekh glasniko vakergja e Joveske kaj „jag taro Devel“, verojatno gromi, mudargja leskere slugen hem bakhren. Panda angleder te ovel le vreme te razmislinel baši akaja bari nevolja, o Jov doživingja i najphari nevolja. Džikote leskere čhave sine khedime ko najphureder phral, taro jekh puti ali bari bavlal koja so rušingja o kher hem sarine mule (Jov 1:12-19).

Našti ni te zamislina amenge sar osetinela pe sine o Jov. Ov pharavgja ple šeja, čhingja ple bala hem pelo ki phuv. O Jov vakergja: „O Jehova dengja, o Jehova lelja“. Ustvari, o Satana lukavo kergja te dikhjol kaj o Devel kergja leske o nevolje. Iako slučingja pe leske sa adava, o Jov na vakergja lošna lafija bašo Devel, sar so mislingja o Satana. Namesto adava, akava verno manuš vakergja: „Te ovel ponadari da falimo e Jehovaskoro anav!“ (Jov 1:20-22).

O Satana sine uverimo kaj o Jov ka vakerel lošna bukja bašo Devel

O Satana sine but holjamo hem na manglja te otkažinel pe. Keda o angelija khedingje pe anglo Devel, ov palem alo. O Jehova sine vooduševimo džikote kerela sine lafi bašo Jov kova so ačhilo verno hem besprekorno iako o Satana napadingja le ko but načinija. Tegani, o Beng vakergja: „Koža baši koža! O manuš ka del sa so isi le bašo plo životo. Nego, molinava tut, pružin tlo vas hem khuv le ko leskere kokala hem mas, hem sigurno ka vakerel lošna bukja baši tute!“ O Satana sine uverimo kaj o Jov ka vakerel lošna bukja bašo Jehova ako nasvaljovela taro pharo nasvalipe. Adaleske so sine le celosno doverba ko Jov, o Jehova dozvolingja e Satanaske te nasvakerel le, ama na dozvolingja leske te mudarel le (Jov 2:1-6).

Agjaar o Jov arakhlilo ki situacija koja so sine opišimi ko početok. Zamislin tuke kobor sine pharo leskere romnjake. Panda na nakhlja lakiri dukh bašo adava so mule lakere deš čhave, a više dikhela sine ple rome sar borinela pe bare mukencar. Phagji tari dukh vakergja e Joveske: „Zarem panda sian besprekorno? De arman e Devle hem mer!“ Akala lafija ni hari na ličinena sine ki romni kola so o Jov pendžarela la hem mangela la. Edinstveno nešto so šaj sine te vakerel lake tano kaj lakere lafija nane razumna. Sepak, ov na manglja te vakerel lošna bukja ple Devleske (Jov 2:7-10).

Dali džanljan kaj akaja tažno, čačutni prikazna tani povrzimi tuja da? Primetin kaj o Satana na krivingja samo e Jove, nego sa e manušen. Ov vakergja: „O manuš ka del sa so isi le bašo plo životo.“ Javere lafencar, o Satana tano uverimo kaj nijekh manuš nane te ačhovel besprekorno. Ov vakerela kaj tute da nane tut čačutno mangipe sprema o Devel hem kaj sigate ka cide tut lestar te šaj te spasine tlo životo. Ustvari, o Satana vakerela kaj sian sebično isto sar leste! Dali mangea te dokažine kaj tano hovavno? Sekole jekhe amendar isi le adaja čest! (Izreki 27:11). Te dikha solea soočingja pe o Jov ponadari.

Hovavne utešitelija

Trin murša kola so pendžarena sine e Jove — kolenge so o izveštaj vakerela kaj tane leskere „amala“ — šungje bašo e Joveskere nevolje hem patujngje dži ki leste te šaj te utešinen le. Keda dikhle le dural, našti sine te pendžaren le. Sine le bare dukha hem leskiri koža kalili taro čirija, ni hari na ličinela sine sar angleder. Akala trin murša, o Elifaz, o Vildad hem o Sofar, postapingje sar te phene sine lenge but žal bašo e Joveskere nevolje. Ola rungje celo glasoja hem čhivgje peske pravo upro šero. Palo adava, bešle tele ki phuv uzo Jov hem na vakergje ništo. Celo kurko sine uzi leste, dive hem rat, bizo te vakeren nijekh lafi. Na valjani te mislina kaj adava so na kergje lafi značinela kaj sine sočuvstvitelna. Len ni najhari na interesingja len o Jov, adaleske na pučle le nijekh pučibe. Dikhena sine samo adava so dikhjola — leskiri bari dukh (Jov 2:11-13; 30:30).

Ko krajo, o Jov mora sine te počminel te kerel lafi. O Jov sikavgja kobor bare mukhe sine le keda dengja arman o dive keda bijandilo. A palo adava vakergja jekh taro glavna pričine soske osetinela pe agjaar. O Jov mislingja kaj o Devel tano adava so kerela leske akala nevolje (Jov 3:1, 2, 23). Iako ov sine manuš kole so sine le bari vera, sine le bari potreba nekoj te utešinel le. Ama, palo kratko vreme otkeda leskere „amala“ počmingje te keren lafi, o Jov halilo kaj pošukar sine keda na vakergje ništo (Jov 13:5).

O Elifaz, kova so verojatno sine o najphuro lendar hem sine but pophuro taro Jov, počmingja prvo te kerel lafi. A palo adava, kergje lafi hem o javera duj. Šaj te vakerel pe kaj ola bizo te razmislinen kergje lafi isto sar o Elifaz. Povtorinena sine bukja kola so o manuša često vakerena sine bašo Devel hem kola ko početok dikhjona kaj tane točna, na primer, kaj ov tano najbaro, hem kaj kazninela e lošna manušen a nagradinela e šukar manušen. Ama, panda taro početok dikhjola pe sine kaj ni hari na haljovena e Jove. Adava so vakergja o Elifaz izgledinela sine sar logično, ama ov na lelja ko predvid nesave važna čačipa. Iako vakergja nešto soj tano točno, kaj o Jehova tano šukar hem kazninela okolen soj lošna, ko krajo alo ko pogrešno zaklučok — ako o Jov tano kaznimo, tegani sigurno grešingja e Devleske (Jov 4:1, 7, 8; 5:3-6).

Na iznenadinela amen adava so o Jov na složingja pe adalea so vakergje. Ov odlučno braningja pe (Jov 6:25). Ama, adava kergja panda poviše leskere trin hovavne utešitelija te mislinen kaj o Jov kergja nesavo pharo grevo hem kaj adaleske zaslužingja sa o lošnipe so doživinela. O Elifaz krivingja le kaj tano gordo, lošno hem kaj nane le nisavo poštovanje sprema o Devel (Jov 15:4, 7-9, 20-24; 22:6-11). O Sofar vakergja leske te čhinavel te kerel lošnipe hem te na grešinel (Jov 11:2, 3, 14; 20:5, 12, 13). A o Vildad posebno dukhavgja e Jove keda vakergja kaj leskere čhave sigurno kergje nesavo grevo hem adaleske zaslužingje te meren! (Jov 8:4, 13).

Leskiri besprekornost čhivdi ko ispit!

Akala trin manuša kergje nešto soj panda pološno. Osven so angje ko pučibe e Joveskiri besprekornost, ola vakerena sine kaj ni hari na vredinela nekoj te trudinel pe te ovel verno samo e Devleske. Panda taro početok o Elifaz opišingja jekh strašno situacija, kaj kergja lea lafi jekh duho. Tari adaja situacija e demonea, o Elifaz alo dži ko jekh opasno zaklučok kaj, o Devel „na verujnela ple slugenge hem krivinela ple angelen kaj kerena grevo“. Sprema akala lafija, o manuša našti nikogaš te ugodinen e Devleske. Palo adava, o Vildad vakergja kaj e Devleske nane važno e Joveskiri vernost, kova so anglo leskere jakhja sine sar jekh obično kirmo (Jov 4:12-18, fusnota; 15:15; 22:2, 3; 25:4-6).

Dali nekogaš probingjan te utešine nekas so nakhela taro pharo periodi ko životo? Adava nane ni hari lokho. Ama, šaj but te sikljova taro hovavne utešitelija e Joveskere — glavno bašo adava so na valjani te vakera. Ola vakergje but lafija kola so ko početok dikhjona sine kaj tane hor hem točna, ama ustvari sine čuče hem na sine točna. Osven adava, ni jekh puti na vikingje le ko anav. Ola na razmislingje baši e Joveskiri dukh koja so phiravela la sine ko vilo hem na mislingje kaj valjani te sikaven leske sočuvstvo.a Ako nekoj tano obeshrabrimo, trudin tut te ove ljubezno, sočuvstvitelno hem sikav kaj grižinea tut leske. Pomožin leske te kerel pozorali pli vera hem ohrabrin le, isto agjaar pomožin leske te ovel le doverba ko Jehova hem ko leskoro baro šukaripe, milost hem pravda. O Jov baš agjaar ka postapinel sine ple amalencar te oven sine ko leskoro than (Jov 16:4, 5). A sar reagiringja ov džikote ola uporno napadinena le sine baši leskiri besprekornost?

O Jov ačhilo besprekorno

O Jov više sine but razočarimo keda počmingja akava baro razgovor. Panda ko početok ov priznajngja kaj tano but razočarimo hem kaj ponekogaš kerela lafi bizo te razmislinel (Jov 6:3, 26). Nane pharo te haljova soske. Leskere lafija sikavena sine kobor bari dukh sine le ko vilo. Taro leskere lafija dikhjola pe kaj na sine le celosno slika bašo adava so slučinela pe. O Jov hem leskiri familija taro jekh puti doživingje but nevolje, kola so dikhjona sine sar te phene tane taro natprirodna sile. Adaleske, o Jov mislingja kaj avena taro Jehova. Na sine svesno bašo nesave važna bukja so slučingje pe, hem adaleske alo dži ko zaklučok so temelinela pe sine ko leskere pogrešna pretpostavke.

Sepak, o Jov sine manuš kole so sine le silno vera. Leskiri vera dikhjola pe sine taro adava so vakergja ko razgovor ple „amalencar“. Leskere lafija sine šuže, čačutne hem zajakninena amen da avdive. Keda kergja lafi bašo bukja soj kerde ko čudesno način, ov dengja falba e Jehovaske ko jekh posebno način. Našti sine te kerel adava ako o Devel na otkrinela sine leske nesave detalija. Na primer, o Jov vakergja kaj o Jehova „ikerela i Phuv te visinel ko ništo“, nešto so o naučnikija doznajngje but vekija pokasnob (Jov 26:7). A keda kergja lafi baši idnina, sikavgja kaj isi le i isto nadež sar e javere verna slugengiri taro purano vreme. O Jov verujnela sine kaj ako merela, ka falinel e Devleske hem kaj ov nane te bistrel le nego jekh dive palem ka iranel le ko životo (Jov 14:13-15; Evreite 11:17-19, 35).

A so šaj te vakerel pe baši besprekornost? O Elifaz hem leskere duj amala ponadari da insistirinena sine kaj e Devleske nane važno dali nekoj tano besprekorno. Dali o Jov verujngja ko akava zlobno hovajbe? Ni najhari! Ov vakerela sine kaj i besprekornost tani važno e Devleske. E Jove sine le doverba ko Jehova hem adaleske vakergja: „O Devel ka pendžarel mli besprekornost“ (Jov 31:6). Osven adava, ov halilo kaj leskere hovavne amala vakergje hovavne bukja te šaj te čhiven ko ispit leskiri besprekornost. Adava pottikningja le te ikerel plo najbaro govor kolea so phanlja o muj akale trine muršengoro.

O Jov halilo kaj i besprekornost dikhjola pe taro adava sar nekoj kerela lafi hem sar postapinela ko životo. Adaleske braningja pe agjaar so objasningja ko kola načinija sikavgja kaj tano besprekorno. Na primer, pazinela pe sine taro idolopoklonstvo, poštujnela sine e javeren hem sine lencar ljubezno, ačhilo moralno čisto, ceninela sine o brako hem, najvažno taro sa, sine verno samo e jekhe čačutne Devleske, e Jehovaske. Adaleske, o Jov šaj sine taro vilo te vakerel: „Sa džikote na merava, nane te otkažinav man tari mli besprekornost“ (Jov 27:5; 31:1, 2, 9-11, 16-18, 26-28).

Sikav sar e Joveskiri vera

Dali tuke da i besprekornost tani doborom važno sar so sine e Joveske? O Jov džanela sine kaj nane dovolno o manuš samo te vakerel kaj tano besprekorno — valjani te sikavel adava ple postapkencar. Sikavaja kaj siem celosno verna e Devleske agjaar so siem leske poslušna hem sekogaš keraja adava soj ispravno anglo leskere jakhja, čak keda borinaja amen phare problemencar da. Ako keraja agjaar, sigurno ka kera bahtalo e Jehova hem, isto sar o Jov, ka sikava kaj leskoro dušmani, o Satana, nane ko pravo. Adava tano o najšukar način te sikava kaj isi amen sar e Joveskiri vera.

Ama, akava nane krajo baši e Joveskiri prikazna. Ko jekh momenti, o Jov kergja lafi bizo te razmislinel. Ov doborom but mangela sine te sikavel kaj tano pravedno so bistergja te braninel ple Devle. Valjani leske sine nekoj te ispravinel le hem te pomožinel le te šaj te dikhel ko bukja sar o Jehova. Ama, sar šaj sine te utešinel pe akale manuše kova so doživingja but pharipa hem sine phago tari dukh hem tuga? So kergja o Jehova bašo plo verno hem besprekorno sluga? O odgovorija taro akala pučiba ka dobina len ki nesavi javer statija tari akaja rubrika.