Šaj li o sovetija tari Biblija te pomožinen mange keda isi man hronično nasvalipe?

So vakerela i Biblija:

Oja, šaj. O Devel grižinela pe ple slugenge keda tane nasvale. Bašo jekh verno sluga e Devleskoro ki Biblija pišinela: „O Jehova nane te bistrel le džikote tano nasvalo ko kreveti“ (Psalm 41:3). Ako tu da sian hronično nasvalo, akala trin bukja šaj te pomožinen tut te ikljove ko krajo adalea:

1. Molin tut baši sila te izdržine. Adava ka pomožinel tuke te dobine „o mir taro Devel, kova soj upreder sekoja misla“ (Filipjanite 4:6, 7). Agjaar nane te ove previše sekirimo hem ka ovel tut sila te izdržine.

2. Ov pozitivno. I Biblija vakerela: „O radosno vilo tano šukar iljači, a o phago vilo lela i sila e manušeskiri“ (Izreki 17:22). Trudin tut te šaline tut soske o asajbe ka pomožinel tuke polokhe te nakhave o phare momentija, a isto agjaar šaj te vlijajnel pozitivno ko tlo sastipe.

3. Dikh pozitivno ki idnina. I sigurno nadež baši idnina ka pomožinel tuke te ove bahtalo iako sian hronično nasvalo (Rimjanite 12:12). I Biblija vakerela kaj ka avel vreme keda „nijekh so živinela ki phuv nane te vakerel: ’Nasvalo sium‘“ (Isaija 33:24). Tegani o Devel ka sasljarel sa okolen soj hronično nasvale — nešto so i avdisutni medicina našti te kerel. Na primer, ki Biblija pišinela kaj o phure manuša palem ka oven terne hem saste. Oj vakerela: „Leskoro telo neka ovel posvežo nego ko ternipe, neka iranel pe ko dive tari pli ternikani sila“ (Jov 33:25).

Zabeleška: Iako džanena kaj o Devel pomožinela ko razna načinija, sepak e Jehovaskere svedokija rodena medicinsko pomoš keda kerela pe lafi bašo hronično nasvalipe (Marko 2:17). Ama amen na preporačinaja nesavo posebno tretmani, nego sekoj lično valjani te odlučinel sar ka lečinel pe.