Mudro birin tle amalen

Sarine amen mangaja te oven amen šukar amala kola so ka oven amencar ko šukar hem ko phare momentija taro životo. Ama, i Biblija predupredinela amen kaj našti bilo koj te ovel amenge šukar amal hem adaleske pottikninela amen mudro te birina amare amalen. Sar šaj te kera adava? O odgovor ka dobina ki akaja lekcija.

1. Sar vlijajnena o amala upri amende?

Amen ovaja sar o manuša kolencar so družinaja amen. Ola vlijajnena ili šukar ili lošno upri amende, bizi razlika dali ka nakhava lencar vreme lično ili preku socijalna mreže. Baš sar so vakerela i Biblija: „Koj džala mudra manušencar, mudro ka ovel, a kas isi buti okolencar so nane gogjaver [okola so na mangena e Jehova], lošno ka nakhel“ (Izreki 13:20). O amala so mangena e Jehova hem so služinena leske, pomožinena tuke te ove paše lea hem te ane šukar odluke. Tari javer strana, o amala so na mangena e Jehova hem na služinena leske, šaj te ciden tut lestar. Adaleske na čudinela amen so i Biblija pottikninela amen mudro te birina amare amalen! Keda amare amala mangena e Jehova hem služinena leske, ola ka šaj šukar te vlijajnen upri amende hem amen da ka šaj šukar te vlijajna upri lende. Tegani, ka šaj te ohrabrina amen maškar amende hem te pomožina amenge jekh jekhea (1. Solunjanite 5:11).

2. Sar o Jehova osetinela pe keda dikhela koj tane amare amala?

O Jehova vnimatelno birinela ple amalen. Ki Biblija pišinela kaj ov „paše amal tano okolencar soj tane česna“ (Izreki 3:32). Sar bi osetinela pe o Jehova ako birinaja amenge amala kola so na mangena le? Ov bi ovela but razočarimo! (Čitin Jakov 4:4.) Tari javer strana, o Jehova ka ovel bahtalo hem ka birinel amen sar ple amala, ako cidaja amen taro lošno društvo hem ako trudinaja amen te ova paše lea hem okolencar so mangena le (Psalm 15:1-4).

DOZNAJN POVIŠE

3. Arakh tut taro lošno društvo

O manuša kola so na mangena e Devle hem leskere merilija tane lošno društvo. Dikh o VIDEOKLIPI, a palo adava keren lafi bašo akava pučibe:

VIDEOKLIPI: Cide tut taro lošno društvo (6:17)

• Sar šaj te pera ki zamka te ova ko lošno društvo bizo te ova svesna bašo adava?

Čitin 1. Korinkjanite 15:33, a palo adava keren lafi bašo akava pučibe:

• So mislinea, kola manuša šaj te oven tuke lošno društvo hem soske?

Čitin Psalm 119:63, a palo adava keren lafi bašo akava pučibe:

• Save amala valjani te birina amenge?

4. Šaj te ova šukar amala okolencar soj tane različna amendar

Ki Biblija opišimo tano o amalipa taro duj manuša ko purano Izrael — o David hem o Jonatan. O Jonatan sine but pophuro taro David hem ov sine o čhavo e careskoro. A o David arakhela sine bakhren. Iako sine akala bare razlike maškar lende, ola ule šukar amala. Čitin 1. Samoilova 18:1, a palo adava keren lafi bašo akava pučibe:

• Soske amare amala ne mora te oven ko ista berša sar amende ili te oven len o ista okolnostija sar amende?

Čitin Rimjanite 1:11, 12, a palo adava keren lafi bašo akava pučibe:

• Sar šaj o amala kola so mangena e Jehova te ohrabrinen pe jekh jekhea?

Ko akava videoklipi, dikh sar jekh terno phral arakhlja amala adathe kote so na očekujngja. Dikh o VIDEOKLIPI, a palo adava keren lafi bašo akala pučiba:

VIDEOKLIPI: Arakh amala adathe kote so na očekujngjan (5:06)

• Soske e Akileskere roditelija sine sekirime keda šungje kasaja družinela pe ki škola?

• Soske o Akil manglja te družinel pe adale amalencar tari škola?

• So pomožingja leske te na osetinel pe korkori?

5. Sar šaj te razvine šukar amalipa?

VIDEOKLIPI: Soj tano čačutno amal? (4:14)

Čitin Izreki 18:24 hem 27:17, a palo adava keren lafi bašo akala pučiba:

• Sar pomožinena peske o čačutne amala?

• Dali isi tut asavke šukar amala? Ako na, sar šaj te arakhe asavke amala?

Čitin Filipjanite 2:4, a palo adava keren lafi bašo akava pučibe:

• Ako mangea te oven tut šukar amala, najangle tu valjani te ove šukar amal. Sar šaj te kere adava?

SO SIKLILEM

Keda mudro birinaja amare amalen, tegani o Jehova ka ovel bahtalo hem adava ka ovel amare šukaripaske.

Sar ka odgovorine?

• Soske e Jehovaske tano važno save amala isi amen?

• Save manušencar na valjani te ova amala?

• Sar šaj te arakhe čačutne amala?

ISTRAŽIN

Dikh sar šaj o čačutne amala te pomožinen amenge ko pharo vreme.

„Ker tuke zorale amalipa angleder te avel o krajo“ (Stražarsko kula taro noemvri 2019)

Čitin bašo praktična sovetija so ka pomožinen tuke te arakhe šukar amala.

„Kako da najdam dobri prijateli?“ (Mladite prašuvaat — delotvorni odgovori (tom 1), poglavje 8)

So valjani te džane bašo amalipa ko socijalna mreže?

Nemoj da se zapletkaš vo socijalnite mreži (4:12)

Ko iskustvo e naslovea „Kopneev po tatko“, čitin soske jekh manuš meningja plo društvo.

„Biblijata menuva životi“ (Stražarska kula taro 1 april 2012)

1. Bašo so valjani te razmislina angleder te birina zabava?

So obično kerea keda mangea te opuštine tut? Nesave mangena te nakhaven pumaro slobodno vreme bešindor khere hem te čitinen lil, te šunen muzika, te dikhen nesavo filmi ili nešto ko internet. A javera poviše mangena te ikljoven te phiren pumare amalencar hem te sportujnen. Bizi razlika so poviše mangaja te kera, valjani te ova sigurna kaj adava so keraja ko amaro slobodno vreme tano „prifatlivo e Gospodareske“ (Efešanite 5:10). Adava tano važno soske ko pobaro delo tari zabava avdive, isi bukja kola so o Jehova mrzinela sar na primer, nasilstvo, seksualno nemoral ili spiritizam. (Čitin Psalm 11:5.) So ka pomožinel amenge mudro te birina amari zabava?

Ako isi amen amala so mangena e Jehova, ola šaj šukar te vlijajnen upri amende hem upro adava savi zabava ka birina. Sar so siklilem ki 48 lekcija i Biblija vakerela: „Koj džala mudra manušencar, mudro ka ovel“. Tari javer strana, koj redovno družinela pe manušencar kola so na mangena e Devleskere merilija, „lošno ka nakhel“ (Izreki 13:20).