1. Kova tano e Devleskoro anav, hem soske šaj te ova sigurna kaj ov mangela te džana adava anav?

Ki Biblija, o Devel otkrinela amenge nesave bukja baši peste. Ov vakerela: „Me sium o Jehova. Adava tano mlo anav“. (Čitin Isaija 42:5, 8.) O anav Jehova, kova so avela tari hebrejsko čhib, najverojatno značinela „Ov kerela te ovel“. O Jehova mangela te džana leskoro anav (2. Mojseeva 3:15). Soske šaj te ova sigurna ko akava? Ov dengja ki Biblija leskoro anav te ovel pišimo poviše taro 7.000 puti!a O anav Jehova pripadinela „e čačutne Devleske upre ko nebo hem tele ki phuv“ (5. Mojseeva 4:39).

2. Sar valjani te obožavina e Jehova?

Adaleske so o Jehova tano amaro Stvoriteli, ov zaslužinela te obožavina samo leste (Otkrovenie 4:11). Akava značinela kaj amen mora te manga hem te obožavina samo le, bizo te koristina nesave idolija, slike ili ikone. (Čitin Isaija 42:8.)

Amaro obožavibe mora te ovel „sveto hem prifatlivo“ e Jehovaske (Rimjanite 12:1). Akava značinela kaj amen valjani te živina sprema leskere zakonija. Na primer, okola so mangena e Jehova, ikerena pe ko leskere merilija bašo brako. Isto agjaar, ola izbeginena štetna navike, sar soj o pušibe cigare hem o zloupotrebibe droga hem alkohol.a