Šaj te ova sigurna kaj o Devel čače interesinela pe amenge. Ov ko plo Lafi vakergja: „Šaj li i daj te bistrel pe maksme hem te na ovel lake žal pe maksmeske so iklilo lakere vogestar? Čak oj da te bistrel le, me tut nane te bistrav tu“.a

Kobor tano šukar te džana akava. E Devleskoro mangipe tano but pobaro taro e dajakoro mangipe, a e dajakoro mangipe tano jekh taro najsilna bukja so šaj te osetinen o manuša. O Devel niked nane te mukhel amen! Ov pomožingja amenge. Sar? Agjaar so sikavgja sar šaj te ovel amen čačutni vera ki Leste, a asavki vera ka kerel amaro dživdipe bahtalo.