16. a) So ulo e korpaja? (Dikh i trito slika ko početok tari statija.) b) Kote ingargje i korpa o džuvlja e phakencar?

¹⁶ Palo adava o Zaharija dikhlja duj džuvlja so sine len zorale phaka sar štrkoskere phaka. (Čitin Zaharija 5:9-11.) Akala džuvlja sine but pojaver tari lošno džuvli so sine ki korpa. Ola ale, vazdingje i korpa e „Lošnipaja“ hem letingje. Kote ingargje i korpa? „Ki phuv Senar“, ili ko Vavilon. Soske ingargje la adari?

17, 18. a) Soske o Vavilon sine than so odgovorinela bašo „Lošnipe“? b) So sian odlučno te kere?

¹⁷ Ko vreme e Zaharijaskoro e Izraelconge sine lokho te haljoven soske o „Lošnipe“ sine ingardo ko Vavilon. Ola džanena sine kaj adaja lošno diz tani pherdi nemoral hem idolopoklonstvo. O Zaharija hem o javera Evreija so živinena sine adari sekova dive borinena pe sine protiv o pagansko vlijanie. Adaleske, akaja vizija sine garancija kaj o Jehova nane te dozvolinel i čačutni religija te meljargjovel.

¹⁸ I vizija isto agjaar setinkergja e Evreen kaj len da isi len odgovornost te ačhoven duhovno čista. E Devleskere sluge na smejnena hem nane te mukhen te ovel lošnipe maškar lende. O Jehova angja amen ki leskiri čisto organizacija, kote so osetinaja leskoro mangipe hem zaštita. Sekova jekh amendar isi le odgovornost te pomožinel oj te ačhovel čisto. Maškar e Devleskoro narodo nane than bašo lošnipe.