TE ŽIVINA SAR HRISTIJANJA

Neve bukja ko sostanok Amaro životo hem služba

Taro januari 2018 berš, ko sostanok Amaro životo hem služba ka kerel pe lafi bašo poviše informacie, slike hem klipija taro Sveto pismo — prevod Nov svet, onlajn izdanie bašo proučibe (nwtsty-E), čak ako akava izdanie bašo proučibe nane panda ki tli čhib. Akava sigurno but ka pomožinel tut džikote spreminea tut bašo sostanok. A soj považno, ka pomožinel tut panda poviše te dikhe o mangipe amare Dadeskoro, e Jehovaskoro!

POVIŠE INFORMACIE

Objasninena i kultura, o geografska poedinostija hem nesave lafija taro bibliska stihija.

Matej 12:20

O fitili so isi le but hari jag: Ko khera, ko purano vreme sar lamba obično koristinela pe sine jekh tikno phuvjalo čaro pherdo maslinovo maslo. Preku o leneno fitili, o maslo džala sine naupre hem agjaar kerela sine te thabljol i jag. Akava izraz ki grčko čhib šaj značinela fitili so čurinela hem panda isi le žaro, ama i jag samo so na ačhili ili više ačhili. Ko Isaija 42:3 tano prorokujmo kaj e Isuse ka ovel le sočuvstvo. Ov nikogaš nane te ačhavel i najtikni da nadež ko ponizna hem ugnetime manuša.

Matej 26:13

Čačipe: O grčko lafi „amin“ soj prevedimo ko akava stiho sar „čače“ avela taro hebrejsko lafi „amin“, so značinela „agjaar neka ovel“ ili „sigurno“. O Isus but puti koristinela sine akava lafi angleder te vakerel nesavi izjava, proroštvo ili vetuvanje. Agjaar istakninela sine kaj adava so vakergja tano čače agjaar. Mislinela pe kaj samo o Isus koristinela sine akava lafi ko asavko način adaleske so našti te arakhel pe ko javer than ki Biblija ili ko javera religiozna lila. Keda o Isus vakerela sine duj puti adava lafi (amin, amin), sar soj ko lil taro Jovan, prevedimo tano sar „čače, čače“ (Jvn 1:51).

SLIKE HEM KLIPIJA

Ka oven sikavde različna detalija tari Biblija preku slike, crtežija, animacie hem videoklipija bizo glaso.

I Vitfaga, i Maslinsko Gora hem o Erusalim

Ko akava kratko videoklipi tano sikavdo o drumo kova so ingarela dži ko Erusalim taro istok, taro avdisutno gav At-tur (kote so mislinela pe kaj porano arakhljola sine i Vitfaga) dži ko jekh taro najuče delija tari Maslinsko Gora. I Vitanija sine istočno tari Vitfaga, ki istočno strana tari Maslinsko Gora. Keda sine ko Erusalim, o Isus hem leskere učenikija but puti nakhavena sine i rat ki Vitanija. Avdive adathe arakhljola i diz El-Azarija, so ki arapsko čhib značinela „e Lazareskoro than“. O Isus but puti ačhola sine ko kher kote so živinena sine i Marta, i Marija hem o Lazar (Mt 21:17; Mr 11:11; Lk 21:37; Jvn 11:1). Keda taro lengoro kher džala sine ko Erusalim, šaj o Isus nakhela sine taro drumo soj tano sikavdo ko akava videoklipi. Keda ko 9 Nisan 33 berš a.e. o Isus gelo ko Erusalim herea preku i Maslinsko Gora, šaj cidingja tari Vitfaga.

Drumo tari Vitanija dži ki Vitfaga
Vitfaga
I Maslinsko Gora
I dolina e Kedroneskiri
Hramsko planina

Šajka ko kokalo tari peta

Akaja tani slika tari replika taro e petakoro kokalo kote soj kovimi sastrnali šajka dugačko 11,5 santimetrija. O orginali, kova so avela taro rimsko vreme, sine arakhlo ko 1968 berš džikote o istražuvačija randena sine o severno delo taro Erusalim. Akava sikavela kaj najverojatno koristinena sine šajke keda kovinena sine e manušen ko stubo taro kaš keda mangena sine te mudaren len. I šajka šaj tani slično sar o šajke so koristinena sine o rimska vojnikija te šaj te kovinen e Isuse ko stubo. E petakoro kokalo sine arakhlo ko sanduko taro bar, so vikinena le sine kosturnica, kote so čhivena pe sine šuke kokala taro mulo manuš keda ka raspadinel pe o telo. Akava sikavela kaj okola da so sine mudarde ko stubo šaj sine te oven parume (Mt 27:35).