So valjani te kere te šaj te živine ko nevo sveto?

Ko anglune statie dikhlem kaj o Devel panda hari ka čhivel krajo e lošna manušenge ki phuv hem ka rešinel sa o problemija. Amen šaj te ova sigurna kaj ka ovel akava. Soske? Adaleske so ko e Devleskoro Lafi, ki Biblija, isi akava vetuvanje:

„O sveto nakhela“ (1. JOVANOVO 2:17).

Šaj te ova sigurna kaj ka oven manuša so ka preživinen soske ko dujto delo taro isto stiho pišinela:

„A okova so kerela e Devleskiri volja ačhola zasekogaš“.

Znači te šaj te preživina, valjani te kera e Devleskiri volja. A te šaj te džana soj tani leskiri volja, najangle mora šukar te pendžara le.

PENDŽAR E DEVLE TE ŠAJ TE PREŽIVINE O KRAJO

Slike: 1. Jekh medicinsko sestra bešela ko podi ki bolnica, umorno hem razočarimi. 2. Oj bešela ki kafeterija hem primetinela sar jekh lakiri koleška radosno čitinela jekh spisanie. 3. Lakiri koleška čitinela lake jekh biblisko stiho hem dela la jw.org vizit-kartička.

O Isus vakergja: „Te šaj te ovel len večno životo valjani šukar te pendžaren tut, e jekhe čačutne Devle, hem okole so bičhalgjan le, o Isus Hristos“ (Jovan 17:3). Te šaj te preživina hem te živina zasekogaš valjani te pendžara e Devle. Akava značinela poviše nego samo te džana kaj postojnela ili te džana samo nekobor bukja baši leste. Valjani te ova amala lea. Te šaj te ova nekasaja šukar amala, valjani te odvojna leske vreme. O isto tano hem e Devlea. Te dikha nesave čačipa tari Biblija so ka pomožinen amen te ova e Devleskere amala hem te ačhova lea paše.

Čačipa kola so sikljovaja len tari Biblija

Sikljovaja kaj e Devleskiri namera sine amen te živina ko raj.

O Devel stvoringja e prva manušen, e Adame hem e Eva, hem čhivgja len ki jekh but šuži gradina koja so vikinela pe sine Eden. Ola sine sovršena hem o Devel dengja len sa so valjani sine lenge te oven bahtale. Ola šaj sine te živinen večno. Te ačhoven sine e Devleskere amala, nikogaš nane te meren. Ama, ola na šungje jekh ednostavno zapoved so dengja len o Devel.

Sikljovaja soske cidaja muke.

Adalea so na šungja e Devle, o prvo manuš, o Adam, našavgja i prilika te živinel zasekogaš, ama na samo ov nego sa o manuša. Ki Biblija pišinela: „Preku jekh manuš o grevo khuvgja ko sveto hem preku o grevo o meribe, hem agjaar o meribe širingja pe ko sa o manuša“ (Rimjanite 5:12). Sar jekh čhavo so šaj te nasledinel nesavo nasvalipe taro ple roditelija, agjaar e Adameskere čhave nasledingje lestar i nesovršenost. Adaleske, amen da phujrovaja hem meraja.

Sikljovaja so kergja o Devel te šaj te pomožinel amen.

Ki Biblija pišinela: „O Devel doborom but manglja o sveto so dengja ple edinstveno bijame Čhave, te šaj sekoj so ka verujnel ki leste te na ovel uništimo, nego večno te živinel“ (Jovan 3:16). O Devel bičhalgja e Isuse ki Phuv te del plo životo amenge. Jekh manuš tari Indija kova so isi le 86 berš bašo akava vakergja: „Taro akava dikhava kobor but mangela man o Jehovaa. Leskoro mangipe dela man nadež te živinav večno“.

Sikljovaja sar te sikava kaj ceninaja adava so kergja o Devel baši amende.

I Biblija vakerela kaj šaj te sikava amaro cenenje bašo adava so kergja o Devel baši amende adalea so ka „ikera leskere zapovedija“ (1. Jovanovo 2:3). O Jehova mangipaja sikavela amenge so šaj te kera te šaj panda akana te ovel amen šukar životo (Isaija 48:17, 18). O Devel na mangela te cida muke. Ov vetinela kaj ako šunaja leskere sovetija, nane samo akana te ova bahtale, nego ka ovel amen prilika te živina večno.

ČITIN SEKOVA DIVE E DEVLESKORO LAFI, I BIBLIJA

I medicinsko sestra ki pauza čitingja i Biblija hem dikhela ko nebo. — Tu šaj te preživine o krajo akale svetoskoro agjaar so ka moline e Devle te pomožinel tuke hem te kere leskiri volja

Amen redovno haja maro te šaj te ačhova dživde. Ama, o Isus vakergja: „O manuš na živinela samo taro maro, nego hem taro sekova lafi so ikljola taro e Jehovaskoro muj“ (Matej 4:4).

Avdive, e Devleskere lafija arakhaja len ki Biblija. Džikote proučinea i Biblija, ka sikljove so kergja o Devel ko purano vreme, so kerela akana hem so ka kerel ki idnina.

MOLIN E DEVLE TE POMOŽINEL TUT

So šaj te kere ako mangea te šune e Devle, ama pharo tuke te čhinave te kere adava soj tano pogrešno? Tegani, adava so šukar ka pendžare e Devle, šaj te pomožinel tuke.

Razmislin baši jekh romni koja so vodinela sine nemoralno životo. Keda počmingja te proučinel i Biblija, doznajngja baši e Devleskiri zapoved: „Našen taro seksualno nemoral“ (1. Korinkjanite 6:18). Oj molingja pe e Devleske te del la sila hem adaleske šaj sine te čhinavel te kerel akala lošna bukja. Ama, ponadari da mora te borinel pe akale iskušeniencar. Oj vakerela: „Keda avena mange nemoralna misle ki godi, iskreno molinava man e Jehovaske soske džanava kaj korkori našti te borinav man. I molitva kergja te ovav popaše e Jehovaja“. Isto sar akaja romni, milionja manuša zapoznajnena e Devle. Ov dela len i sila soj lenge potrebno te šaj te keren promene ko životo hem te živinen sprema leskiri volja (Filipjanite 4:13).

Kobor poviše sikljovea bašo Devel, doborom popaše ka ovel tuja (Galatite 4:9; Psalm 25:14). Tegani ka šaj te živine ko e Devleskoro nevo sveto. Ama savo ka ovel o životo ko nevo sveto? I sledno statija kerela lafi bašo adava.

a I Biblija otkrinela kaj e Devleskoro anav tano „Jehova“.