LEKCIJA 29

So ovela amencar keda meraja?

Pečatimo izdanie

Dali mulo tutar nekoj kas so mangljan? Ko asavko pharo periodi šaj pučea tut: „So ovela amencar keda meraja? Dali ka šaj nekogaš palem te dikha amare manglen so mule?“ Ki akaja hem ki sledno lekcija dikh sar o odgovorija so isi ki Biblija bašo akala pučiba dena amen uteha.

1. So ovela amencar keda meraja?

O Isus sporedingja o meribe hor sojbaja. Jekh manuš keda hor sovela ov nane svesno bašo adava so slučinela pe okolu leste. Slično agjaar, keda nekoj merela ov nane svesno bašo ništo, na osetinela nisavi dukh hem na cidela muke. I Biblija jasno vakerela: „O mule na džanena ništo“. (Čitin Propovednik 9:5.)

2. Soske tano šukar te džana so čače ovela keda meraja?

But džene darana taro meribe hem taro mule. Ama, adava so vakerela i Biblija bašo mule šaj te ovel but utešno. O Isus vakergja: „O čačipe ka oslobodinel tumen“ (Jovan 8:32). Sprotivno taro adava so sikavena nesave religie, i Biblija sikavela kaj e manuše nane le duša koja so živinela palo meribe. Adava značinela kaj nikoj na mučinela pe palo meribe. Isto agjaar, adaleske so o mule nane svesna bašo ništo, ola našti ni te povredinen amen. Adaleske na valjani te obožavina e mulen hem na valjani te kera nisave adetija lenge, a ni te molina amen baši lengiri duša.

Nesave manuša vakerena kaj šaj te keren lafi e mulencar. Ama, adava našti te ovel soske, sar so siklilem angleder, „o mule na džanena ništo“. Okola so mislinena kaj kerena lafi e mulencar, ola šaj ustvari kerena lafi e demonencar kola so kerena pe sar o manuša so mule. Adava so džanaja o čačipe bašo mule zaštitinela amen taro demonija. O Jehova predupredinela amen te na probina te ava ko kontakt e mulencar, soske mangela te zaštitinel amen taro demonija. (Čitin 5. Mojseeva 18:10-12.)

DOZNAJN POVIŠE

Sikljov poviše bašo adava so vakerela i Biblija bašo meribe. Adava ka uverinel tut kaj o Devel soj pherdo mangipaja nikogaš na bi mučinela okolen so mule.

Jekh manuš hem leskere duj tikne čhave bešena ki jekh klupa ko parujbe leskere romnjakoro koja soj e čhavengiri daj. O amala hem i familija ale te utešinen len.

3. So čače ovela e mulencar?

E manušen ko celo sveto isi len različna veruvanja bašo adava so ovela amencar keda meraja. Džangjola pe, našti sa adala veruvanja te oven čače.

Savo veruvanje bašo mule tano voobičaeno ko than kote so živinea?

Te šaj te džane so sikavela i Biblija bašo adava so ovela keda meraja, dikh o VIDEOKLIPI.

VIDEOKLIPI: So ovela e manušencar palo meribe? — izvadok (1:19)

Slike: Scene taro videoklipi „So ovela e manušencar palo meribe? — izvadok“. 1. Jekh mulo manuš pašljola ko kreveti ki bolnica. 2. Jekh manuš kova so bešela maškar duj manuša ko vozi sovela džikote vozinela pe.

Čitin Propovednik 3:20, a palo adava keren lafi bašo akala pučiba:

Sprema akava stiho, so ovela e manušea keda merela?
Dali nesavo delo taro manuš živinela palo meribe?

I Biblija vakerela amenge bašo meribe e Lazareskoro, kova so sine paše amal e Isusea. Džikote čitinea Jovan 11:11-14, primetin so vakergja o Isus bašo Lazar kova so mulo. Palo adava keren lafi bašo akala pučiba:

Solea sporedingja o Isus o meribe?
Sar akaja sporedba sikavela amenge ki savi sostojba tane o mule?
Dali tuke logično adava so vakerela i Biblija bašo mule?

4. O čačipe bašo mule oslobodinela amen taro hovavne sikljojba

Ako džanaja o čačipe bašo mule, tegani nane te dara lendar. Čitin Propovednik 9:10, a palo adava keren lafi bašo akava pučibe:

Dali šaj o mule te povredinen amen?

O čačipe tari Biblija isto agjaar oslobodinela amen taro veruvanje kaj valjani te kera nešto bašo mule ili čak kaj valjani te obožavina len. Čitin Isaija 8:19 hem Otkrovenie 4:11, a palo adava keren lafi bašo akava pučibe:

So mislinea, sar osetinela pe o Jehova keda nekoj obožavinela e mulen ili rodela lendar pomoš?

Slike: Običaija so kerena pe bašo mule. 1. Jekh manuš perela ko kočaka hem molinela pe anglo jekh grobo hem angja hajbaske. 2. Trin murša taro jekh pleme khelena uravde ko maske. 3. Jekh parada taro manuša phiravena maske taro kosturi hem ingarena jekh bari figura taro kosturi ko dive e mulengoro. — O čačipe bašo mule oslobodinela amen taro običaija so na mangela len o Jehova

5. O čačipe bašo mule utešinela amen

But džene mislinena kaj palo meribe ka oven kaznime bašo lošna bukja so kergje. Ama, utešno tano adava so džanaja kaj nikoj na mučinela pe palo meribe, čak ni okola so kergje but lošna bukja. Čitin Rimjanite 6:7, a palo adava keren lafi bašo akava pučibe:

I Biblija vakerela kaj keda jekh manuš merela, ov anglo Devel tano oslobodimo taro ple grevija. Sprema akava, so mislinea, dali nekoj otkeda merela tano mučimo bašo grevija so kergja džikote sine dživdo?

Kobor poviše zapoznajnaja e Jehova, doborom poviše haljovaja kaj ov nikogaš na bi mučinela e mulen. Čitin 5. Mojseeva 32:4 hem 1. Jovanovo 4:8, a palo adava keren lafi bašo akala pučiba:

Dali jekh Devel kole so isi le asavke osobine, sar soj spomnime ko akala stihija, ka dozvolinel o mule te oven mučime?
So mislinea, dali o čačipe bašo mule šaj te del tut uteha hem soske?

NESAVE ŠAJ VAKERENA: „Koj džanela so ovela amencar keda meraja? Nikoj na irangja pe adathar pa te vakerel amenge“.