• Sar tano organizirimo o sobranie?
    Ov bahtalo zasekogaš — biblisko kursi

    • Sar tano organizirimo o sobranie?

      O Jehova tano Devel kova so mangela o redo (1. Korinkjanite 14:33). Adaleske, leskoro narodo tano šukar organizirimo. Sar tano organizirimo o hristijansko sobranie? So šaj amen te kera te šaj te ikerel pe o redo hem o mir ko sobranie?

      1. Koj vodinela o sobranie?

      O Hristos tano poglavari ko sobranie (Efešanite 5:23). Taro nebo ov vodinela e Jehovaskere narodo ko celo sveto. O Isus postavingja jekh tikni grupa taro zrela starešine te služinen sar „verno hem razborito robo“. Akaja grupa tani isto agjaar pendžardi sar Vodečko telo. (Čitin Matej 24:45-47.) O Vodečko telo dela upatstvija sa e sobranienge ko celo sveto, isto sar so kerena sine adava o apostolija hem o starešine ko Erusalim taro prvo veko (Dela 15:2). Ama, akala manuša nane amare vodačija. Ola čitinena i Biblija te šaj te džanen so mangela o Jehova te keren hem isto agjaar tane poslušna ko e Isuseskere upatstvija.

      2. Koja tani i uloga e starešinengiri ko sobranie?

      O starešine tane zrela hristijanska murša kola so sikavena tari Biblija hem grižinena pe e Jehovaskere narodoske agjaar so pomožinena hem ohrabrinena len. Ola na dobinena pare bašo adava so kerena. Namesto adava, ola služinena „dobrovolno sar so mangela o Devel; na alčna te šaj te dobinen nešto, nego celo vilea“ (1. Petrovo 5:1, 2). O sluga-pomošnikija tane murša ko sobranie kola so pomožinena e starešinenge. Palo nesavo vreme, ola šaj te pheren o uslovija te služinen sar starešine.

      O Vodečko telo postavinela nesave starešinen te služinen sar pokrainska nadglednikija. Akala nadglednikija posetinena različna sobranija te den upatstvija hem te ohrabrinen e phralen hem e phenjen. Ola isto agjaar imenujnena e phralen so ispolninena o uslovija te služinen sar starešine hem sluga-pomošnikija (1. Timotej 3:1-10, 12; Tit 1:5-9).

      3. Koja uloga isi sekole Jehovaskere svedoko?

      Sarine ko sobranie falinena e Jehovaskoro anav adalea so učestvujnena ko sostanokija hem propovedinena kobor so šaj sprema ple okolnostija. (Čitin Psalm 148:12, 13.)

      DOZNAJN POVIŠE

      Sikljov savo vodači tano o Isus, sar o starešine džana palo leskoro primer hem sar šaj amen te ova poslušna e Isuseske hem te sorabotina e starešinencar.

      4. O Isus tano grižlivo vodači

      O Isus dela amen jekh but šuži pokana. Čitin Matej 11:28-30, a palo adava keren lafi bašo akava pučibe:

      • Savo vodači tano o Isus hem sar ov mangela te osetina amen džikote vodinela amen?

      Sar o starešine džana palo e Isuseskoro primer? Dikh o VIDEOKLIPI.

      VIDEOKLIPI: O starešine sigate reagiringje palo zemjotres ko Nepal (4:56)

      I Biblija jasno sikavela sar valjani o starešine te keren pumari zadača.

      Čitin Isaija 32:2 hem 1. Petrovo 5:1-3, a palo adava keren lafi bašo akala pučiba:

      • Sar osetinea tut keda džanea kaj o starešine, isto sar o Isus, grižinena pe e javerenge?

      • Ko kola javera da načinija o starešine džana palo e Isuseskoro primer?

      5. O starešine dena šukar primer

      Sar o Isus mangela o starešine te dikhen ki pumari zadača? Dikh o VIDEOKLIPI.

      VIDEOKLIPI: O starešine valjani te predvodinen! (7:39)

      O Isus objasningja sar valjani te ponašinen pe o starešine. Čitin Matej 23:8-12, a palo adava keren lafi bašo akala pučiba:

      • So vakerela i Biblija bašo adava sar valjani te ponašinen pe o starešine? So mislinea, dali o religiozna vodačija ikerena pe ko adava?

      A. Slike: Jekh starešina grižinela pe bašo ple duhovna potrebe hem ple familijakere. 1. Ov molinela pe angleder te proučinel i Biblija. 2. Ov zaedno ple romnjaja sikavela ple tikne čhaja baši Biblija. B. O isto starešina hem leskiri romni posetinena jekhe phenja soj nasvali hem pašljola ko kreveti ki bolnica. V. O isto starešina propovedinela jekhe manušeske ko leskoro kher. G. Slike: 1. O isto starešina ikerela jekh govor ko sostanok. 2. Ov kosela o podi ki dvorana.

      1. 1. O starešine trudinena pe te šaj ola hem lengere familie te ačhoven duhovno zorale

      2. 2. O starešine grižinena pe sarinenge ko sobranie

      3. 3. O starešine redovno propovedinena

      4. 4. O starešine tane učitelija. Ola isto agjaar pomožinena ko čistibe hem ko javera bukja

      6. Amen šaj te sorabotina e starešinencar

      Ki Biblija pišinela jekh važno pričina soske te sorabotina e starešinencar. Čitin Evreite 13:17, a palo adava keren lafi bašo akava pučibe:

      • So mislinea, soske i Biblija ohrabrinela amen te ova poslušna hem podložna okolenge so predvodinena?

      Čitin Luka 16:10, a palo adava keren lafi bašo akava pučibe:

      • Soske valjani sekogaš te ova poslušna e starešinenge, čak ko nesave bukja kolenge so mislinaja kaj nane doborom važno?

      NESAVE ŠAJ VAKERENA: „Na valjani te ovav delo taro sobranie te šaj te ovav paše e Devlea“.

      • So mislinea, soske tano šukar te ove delo taro sobranie?

      SO SIKLILEM

      O Isus tano poglavari ko sobranie, a o starešine tane podložna leske. Amen spremno sorabotinaja lencar soske ola grižinena pe amenge hem dena amen šukar primer.

      Sar ka odgovorine?

      • Koj tano poglavari ko sobranie?

      • Sar o starešine pomožinena ko sobranie?

      • Koja uloga isi sekole Jehovaskere svedoko?

      Cel

      ISTRAŽIN

      Dikh jekh primer bašo adava kobor o Vodečko telo hem o javera starešine grižinena pe bašo o phralja hem o phenja.

      Te zajaknina e phralen kote so amare aktivnostija tane zabranime (4:22)

      Doznajn poviše bašo adava so kerena o pokrainska nadglednikija.

      O životo e pokrainsko nadglednikoskoro ko izolirime thana (4:51)

      Čitin bašo adava savi uloga isi e džuvlen ko sobranie.

      „Dali kaj Jehovinite svedoci i ženite služat kako propovednici?“ (Stražarska kula taro 1 septemvri 2012)

      Doznajn kobor but trudinena pe o starešine te ohrabrinen e phralen hem e phenjen.

      „Starešini — ,naši sorabotnici za da bideme radosni‘“ (Stražarska kula taro 15 januari 2013)