Pismo taro Vodečko telo
„Oven učitelija“ (Evr. 5:12). Zamislin tuke, o Jehova — o najšukar Učiteli ko univerzum — dengja amenge zadača te sikava e javere manušen baši leste! Amenge tani skapoceno čest hem bari odgovornost te sikava e javeren bašo Jehova, bizi razlika dali keraja adava ki familija, ko sobranie ili ki služba. So ka pomožinel amenge šukar te kera akaja zadača?
O odgovor arakhljovela ko lafija so pišingja len o apostol Pavle e Timoteeske: „Ponadari da koncentririn tut ko javno čitibe, ko ohrabribe e javeren, ko sikajbe“. Palo adava o Pavle vakergja: „Kerindor adava ka spasine hem tut hem adalen so šunena tut“ (1. Tim. 4:13, 16). O šukar haberi so vakeraja le šaj te spasinel e manušengoro životo. Adaleske tano but važno te ova sa pošukar ko čitibe hem sikajbe. Akaja brošura ka pomožinel amenge ko adava. Te dikha nekobor bukja so isi ki late.
Biblisko stiho soj dendo ko početok tari sekoja lekcija. Ov tano povrzimo e glavno poukaja tari lekcija hem isi le nesavo načelo ili primer bašo adava sar šaj te primenina i pouka.
O Jehova tano „o Najbaro Učiteli“ (Isa. 30:20). Iako akaja brošura ka pomožinel tuke te ove sa pošukar ko čitibe hem sikajbe, nikogaš ma bistre kaj o haberi so vakeraja le avela taro Jehova hem kaj ov privlečinela e manušen (Jovan 6:44). Adaleske, redovno molin e Jehova te del tut sveti duh. Koristin i Biblija so šaj poviše. Nikogaš ma vaker tle idee, nego sekogaš pomožin e javerenge te haljoven sar dikhela hem sar razmislinela o Jehova baši nesavi buti. Trudin tut te pomožine e javerenge te mangen e Jehova celo vilea.
Dendi tuke zadača te sikave e javeren bašo najvažno haberi so sine nekogaš dendo e manušenge. Uverime siem kaj ka uspejne ko adava, sa džikote rodea taro Devel te del tut pli sila (1. Pet. 4:11).
Tumare sorabotnikija,
Vodečko telo e Jehovaskere svedokongoro