2. So vakerela amenge i Biblija bašo Jehova?

I Biblija vakerela amenge kaj o Jehova tano o edinstveno čačutno Devel, iako o manuša obožavinena bute javere devlen. Soske šaj te ova sigurna ko akava? Isi nekobor pričine. E Jehova isi le i najbari, javere lafencar i vrhovno vlast hem samo ov tano o „Najbaro upri celo phuv“. (Čitin Psalm 83:18.) Ov tano Semokjno, a adava značinela kaj isi le mokj te kerel sa so mangela. Ov stvoringja sa — o univerzum hem sa soj dživdo ki Phuv (Otkrovenie 4:8, 11). Hem samo o Jehova sekogaš postojnela sine hem ka postojnel (Psalm 90:2).

Adaleske so o Jehova tano amaro Stvoriteli, ov zaslužinela te obožavina samo leste (Otkrovenie 4:11). Akava značinela kaj amen mora te manga hem te obožavina samo le, bizo te koristina nesave idolija, slike ili ikone. (Čitin Isaija 42:8.)

Amaro obožavibe mora te ovel „sveto hem prifatlivo“ e Jehovaske (Rimjanite 12:1). Akava značinela kaj amen valjani te živina sprema leskere zakonija. Na primer, okola so mangena e Jehova, ikerena pe ko leskere merilija bašo brako. Isto agjaar, ola izbeginena štetna navike, sar soj o pušibe cigare hem o zloupotrebibe droga hem alkohol.a