Kova tano o šukar haberi?

1. Kova tano o šukar haberi taro Devel?

O Devel mangela o manuša te uživinen ko dživdipe. Adaleske so mangela e manušen Ov kergja i Phuv hem sa so isi ki late. Panda hari Ov ka anel pošukar dživdipe sa e manušenge ki celi Phuv. Ka čhinavel sa o bukja so anena dukha. Čitin Eremija 29:11.

Nijekh vlada dži akana na čhinavgja o nasilstvo, o nasvalipe hem o meribe. Ama, isi jekh šukar haberi. Panda hari, e Devleskoro Carstvo ka cidel sa o manušikane vlade. Tegani okola so mangena ov te vladinel ka uživinen ko mir hem ko šukar sastipe. Čitin Isaija 25:8; 33:24; Daniel 2:44.

2. Soske tano važno te džana o šukar haberi?

Keda o Devel ka uništinel e lošna manušen tegani nane te oven dukha (Sofonija 2:3). Keda ka ovel adava? I Biblija angleder vakergja kaj avdive ka ovel pharo te dživdinel pe. O lošna bukja so ovena avdive sikavena kaj panda hari o Devel ka anel lenge krajo. Čitin 2. Timotej 3:1-5.

3. So valjani te kera?

Valjani te sikljova bašo Devel taro leskoro Lafi, i Biblija. Oj tani sar lil so jekh dad pišingja ple mangle čhavenge. Oj vakerela amenge sar te dživdina pošukar avdive hem sar te ovel amen večno dživdipe. Čače i adava kaj nesave nane te mangen so tu sikljovea tari Biblija. Ama, o večno dživdipe tano najbari nagrada, ma mukh nikoj te čhinavel tu te dobine la. Čitin Izreki 29:25; Otkrovenie 14:6, 7.