2 LEKCIJA

Ov prirodno

2. Kor. 2:17

SO TE KERE: Ker lafi prirodno hem iskreno te šaj adala so šunena tut te dikhen kaj čače grižinea tut lenge hem kaj sian uverimo ko adava so vakerea.

SAR TE KERE ADAVA:

Spremin tut šukar hem molin tut angleder te kere adava. Molin e Jehova te pomožinel tuke te koncentririne tut ko adava so ka vakere, a na ki tli trema. Neka oven tut ki godi o glavna misle so valjani te vakere len. Vaker o misle tle lafencar; a na samo te phene taro lafi dži ko lafi adava soj pišimo.

Keda mangea te čitine nešto tari Biblija ili tari javer publikacija, spremin tut angleder te šaj šukar te čitine. Ako tane citirime nekaskere lafija, čitin len čuvstvoncar hem ko način sar normalno so kerena o manuša lafi.
Ker lafi iskreno hem taro vilo. Razmislin soske tano važno o javera te šunen adava so mangea te vakere. Mislin ki lende. Tegani tlo način sar tergjovea, tle gestija hem izrazija ko muj ka sikaven kaj iskreno interesinea tut lenge.

Te ove prirodno na značinela kaj na valjani te pazine sar kerea lafi. Adava so vakerea valjani te ovel dostoinstveno. Adaleske, trudin tut te kere lafi jasno hem točno.
Dikh ko adala so šunena tut. Dikh e javeren ko jakhja keda kerea lafi. Džikote ikerea govor, ponekogaš dikh nekaste tari publika namesto celo vreme te dikhe ko jekh manuš ili samo kratko te nakhe jakhencar e publika.