Paše uzo Vavel, sine jekh diz, so vikinela pe sien Ur. Ki adaja diz o manuša služinena sine javere devlenge, a na e Jehovaske. Ama ko Ur živinela sine jekh manuš so služinela sine samo e Jehovaske. Leskoro anav sine Avraam.

O Jehova vakergja e Avraameske: „Dža tuke taro tlo kher hem tari tli familija, hem dža ki phuv so ka sikavav la tuke“. Palo adava, o Devel vetingja leske: „Tutar ka ovel baro narodo, hem preku tute ka kerav šukaripe bute manušenge ki celi Phuv“.

O Avraam na džanlja kote valjani te džal, ama leste sine le doverba ko Jehova. O Avraam, leskiri romni i Sara, leskoro dad o Tara hem o unuko o Lot khedingje pe bukja hem poslušno cidingje ko baro drumo.

O Avraam sine le 75 berš keda ple familijaja reslja ki phuv so manglja o Jehova te sikavel la leske. Adaja phuv vikinela pe sine Hanaan. Adari o Devel vetingja e Avraameske: „Celo akaja phuv so dikhea la, ka dav la tle čhavenge“. Ama, o Avraam hem i Sara sine phure hem na sine len čhave. Sar o Jehova ka ispolninel akava vetuvanje?

O Avraam hem i Sara sine ko brako but berša. Ola mukhle pumaro šužo kher ko Ur hem živinena sine ko šatorija. Ama, i Sara na žalinela pe sine bašo adava soske sine la doverba ko Jehova.

I Sara doborom but mangela sine te ovel la čhavo so vakergja e Avraameske: „Ako mi sluginka i Agara bijanela čhavo, ka ovel sar mlo“. Palo nesavo vreme, i Agara bijangja murš čhavo. Leskoro anav sine Ismael.

Palo but berša, keda e Avraame sine le 99 berš a e Sara 89 berš, ale ki lende trin murša te posetinen len. O Avraam vikingja len te džan te bešen telo jekh kaš te odmorinen pe hem te del len te han. Džanea li koj sine adala? Ola sine angelija! Akala angelija vakergje e Avraameske: „Javer berš akava vreme, tu hem ti romni ka ovel tumen čhavo“. I Sara sine ko šatori, ama šungja len so kerena lafi. Asandili ki peste hem vakergja peske: Sar šaj man te ovel man čhavo keda sium doborom phuri?

Palo jekh berš, i Sara čače bijangja murš, sar so vakergja e Jehovaskoro angeli. O Avraam čhivgja leskoro anav Isak, so značinela „asajbe“.

Keda o Isak sine le okolu pandž berš, i Sara dikhlja sar o Ismael asala leske. Oj manglja te zaštitinel ple čhave, adaleske geli ko Avraam hem vakergja leske te paldel e Agara hem e Ismaele. Ko početok, o Avraam na manglja te kerel adava. Ama, o Jehova vakergja leske: „Šun e Sara. Me ka grižinav man e Ismaeleske. A mle vetuvanja ka ispolninen pe preku o Isak“.