Keda e Isako sine le 40 berš, ženingja pe e Rebekaja. Ov but mangela la sine. Palo nesavo vreme, bijandile lenge duj murša, bliznakija.

Prvo bijandilo o Isav, a posle o Jakov. O Isav but mangela sine te ovel avri, hem ov sine šukar lovdžija. Ama, o Jakov poviše mangela sine te ovel khere.

Ko adava vreme keda ka merel sine o dad, o najbaro čhavo dobinela sine o najbaro delo tari phuv hem taro pare. Adava vikinela pe sine nasledstvo. Ki familija e Isakoskiri, delo taro nasledstvo isto agjaar sine o vetuvanja so dengja le o Jehova e Avraameske. E Isaveske akala vetuvanja na sine but važna, ama e Jakoveske sine važna.

Jekh dive alo peske o Isav but umorno soske sine celo dive ko lov. Keda dikhlja kaj o Jakov kerela sine nešto šukar hajbaske phengja leske: „But sium bokhalo, de man te hav hari tari adaja loli čorba“. O Jakov phengja leske: „Ka dav tut, ama prvo vetin mange kaj ka de man tlo nasledstvo“. O Isav vakergja: „Soj mange gajle bašo nasledstvo? Šaj te le le. Samo de man te hav“. So mislinea, dali adava so kergja o Isav sine mudro? Na, na sine. O Isav mukhlja nešto but vredno, baši jekh obično čorba.

Keda o Isak sine but phuro, valjani sine te blagoslovinel e prvo čhave. Ama, i Rebeka pomožingja e Jakoveske te dobinel ov o blagoslov. Keda o Isav šungja bašo akava, holjangja but hem manglja te mudarel pe phrale e bliznako. Te šaj te zaštitinen e Jakove, o Isak hem i Rebeka vakergje leske: „Dža ko to vujko, ko Lavan, hem ačhov adari sa džikote na smirinela pe o Isav“. O Jakov šungja o sovet ple roditelengoro hem našlja te šaj te spasinel pe.

O Jehova vetingja e Jakoveske kaj ka zaštitinel le isto sar so zaštitingja e Avraame hem e Isako. O Jakov gelo te živinel ko jekh than so vikinela pe sine Haran, adari ženingja pe, sine le bari familija hem ulo but barvalo.

Jekh dive, o Jehova vakergja e Jakoveske: „Iran tut ki tli phuv“. Tegani o Jakov hem leskiri familija cidingje ko baro drumo. Džikote sine panda ko drumo, nesave manuša vakergje e Jakoveske: „To phral o Isav avela akari, hem lea isi 400 murša!“ O Jakov darandilo kaj o Isav ka kerel nešto lošno leske hem leskere familijake. Ov molingja pe e Jehovaske: „Molinava tut spasin man taro mo phral“. O javer dive, o Jakov bičhalgja e Isaveske sar poklonija but bakhre, buznja, gurumnja, kamile hem hera.

Adaja rat, keda o Jakov sine korkori, dikhlja jekh angeli! Adava angeli počmingja te borinel pe lea. Ola boringje pe dži sabajle! Iako o Jakov sine povredimo, ov na čhinavgja te borinel pe. O angeli vakergja: „Mukh man“. Ama, o Jakov vakergja leske: „Nane te mukhav tut džikote na blagoslovinea man“.

Tegani o angeli blagoslovingja le. Agjaar o Jakov džanlja kaj o Jehova nane te mukhel o Isav te kerel leske nešto lošno.

Adava dive sabajle, o Jakov dikhlja dural sar avela o Isav zaedno leskere 400 manušencar. Ov gelo poangle tari pli familija, hem efta puti pokloningja pe anglo po phral. O Isav prastandilo dži ko Jakov hem gušningja le. Tegani o solduj rungje hem smiringje pe. So mislinea, sar sine e Jehovaske keda dikhlja kobor šukar postapingja o Jakov ki akaja situacija?

Palo adava, o Isav irangja pe khere, a o Jakov prodolžingja ko plo drumo. E Jakove sine le 12 murša. O anava lengere sine Ruvim, Simeon, Levi, Juda, Dan, Neftalim, Gad, Aser, Isahar, Zavulon, Josif hem Benjamin. Preku o Josif, o Jehova pokasno spasingja ple narodo. Džanea li sar? Te dikha.