O Josif sine jekh taro potikne čhave e Jakoveskere. Leskere pophure phralja dikhle kaj lengoro dad najviše mangela le. So mislinea sar osetinena pe sine leskere phralja bašo adava? Ola sine ljubomorna e Josifeske hem mrzinena le sine. Keda o Josif dikhlja nesave čudna sune, vakergja len pe phralenge. Akala sune značinena sine kaj jekh dive ola ka pokloninen pe leske. Adaleske ola mrzinena le sine panda poviše!

Jekh dive e Josifeskere phralja arakhena sine e bakhren paše uzi diz Sihem. O Jakov bičhalgja e Josife te dikhel dali tane šukar. Keda dikhle le dural sar avela vakergje: „Ake avela akava so dikhela sune, ajde te mudara le!“ Keda alo, astargje le hem frdingje le ki jekh hor dupka. Ama, o Juda, jekh taro leskere phralja, vakergja: „Ma mudaren le, pošukar tano te bikina le sar robo“. Agjaar bikingje le bašo 20 srebrenikija nesave trgovconge taro Madijam kola so džana sine ko Egipet.

Palo adava, e Josifeskere phralja topingje leskere šeja ko rat tari buzni, bičhalgje len ko lengoro dad hem vakergje: „Akala nane li o šeja te čhaveskere?“ Tegani o Jakov mislingja peske kaj nesavo divo životno mudargja e Josife. Adaleske sine but tažno. Nikoj našti sine te utešinel le.

Ko Egipet, o Josif sine bikimo sar robo jekhe važno manušeske so sine službeniko, o anav leskoro sine Petefri. Ama, o Jehova ponadari da sine e Josifea. O Petefri dikhlja kaj o Josif šukar kerela pi buti hem kaj šaj te ovel le doverba ki leste. Palo kratko vreme, ov čhivgja le te ovel glavno upro sa so sine le.

I romni e Petefrijaskiri dikhlja kaj o Josif sine šužo hem silno. Sekova dive pučela sine e Josife te sovel laja. So kergja o Josif? Ov odbingja la hem vakergja: „Na! Adava nane šukar. Mo gospodari isi le doverba ki mande, a tu sian leskiri romni. Ako sukjum tuja, ka grešinav e Devleske!“

Jekh dive, e Petefrijaskiri romni probingja silaja te čhivel e Josife te sovel laja. Astargja le taro šeja, ama ov našlja. Keda o Petefri alo khere, oj vakergja leske kaj o Josif napadingja la. Ama, adava na sine čače. O Petefri sine but holjamo, hem naredingja te čhiven e Josife ko zatvor. Ama, o Jehova na bistergja e Josife.

Džikote o Josif sine ko zatvor, o faraoni, o cari taro Egipet, dikhlja sune so nikoj našti sine te vakeren leske so značinena. Jekh leskoro sluga vakergja leske kaj o Josif šaj te vakerel leske so značinena o sune so dikhlja len. O faraoni vakergja odma te anen leske e Josife.

O faraoni pučlja le: „Šaj li te objasnine mange so značinena o sune so dikhljum len?“ O Josif vakergja e faraoneske: „Ko Egipet ka ovel efta berš but hrana, a palo adava efta berš ka ovel baro bokhalipe. Birin nesave mudro manuše kova so ka khedel but hrana, agjaar nane te meren o manuša taro bokhalipe“. O faraoni vakergja: „Ov tu adava manuš! Tu ka ove o dujto najmokjno manuš ko Egipet“. Kotar džanlja o Josif so značinena sine o sune e faraoneskere? O Jehova pomožingja le ko adava.

Palo adava, efta berš o Josif khedela sine hrana. Keda nakhle adala efta berš, ki celi Phuv sine bokhalipe, baš agjaar sar so vakergja o Josif. O manuša taro razna thana avena sine te kinen hrana taro Josif. Keda leskoro dad, o Jakov, šungja kaj isi hrana ko Egipet, bičhalgja deš taro ple čhave te džan hem te kinen hrana.

Keda e Jakoveskere čhave gele ko Josif, ov odma pendžargja len. Ama leskere phralja na pendžargje le. Ola pokloningje pe leske, baš agjaar sar so dikhlja o Josif ko suno keda sine poterno. O Josif manglja te džanel dali leskere phralja tane panda lošna. Adaleske vakergja lenge: „Tumen sien špionja. Mangena te dikhen kote amari phuv nane zaštitimi“. Ola vakergje: „Na, nane agjaar! Amen siem 12 phralja taro Hanaan. Jekh amaro phral mulo, a o najtikno ačhilo khere amare dadea“. Tegani o Josif vakergja lenge: „Anen tumare najtikne phrale akate hem ka verujnav tumenge“. Tegani ola irangje pe khere ko pumaro dad.

Keda e Jakoveskiri familija ačhili bizi hrana, ov palem bičhalgja pe čhaven te džan ko Egipet. Ama, akava puti, lele pea e najtikne phrale, e Benijamine. Te šaj te dikhel dali leskere phralja meningje pe, o Josif vakergja te čhiven leskiri srebreno čaša ki torba e Benjamineskiri kote so sine giv, a palo adava ov vakergja kaj ola čorgje la. Keda o sluge e Josifeskere arakhle i čaša ki torba e Benjamineskiri, o phralja leskere našti sine te verujnen. Tegani počmingje te molinen e Josife te kazninel len, a na e Benijamine.

O Josif dikhlja kaj leskere phralja meningje pe. Ov našti sine više te izdržinel. Počmingja te rovel hem vakergja lenge: „Me sium o Josif, tumaro phral. Dali mo dad tano panda dživdo?“ Leskere phralja sine but iznenadime. Adaleske vakergja lenge: „Ma sekirinen tumen bašo adava so kergjen mange. O Devel angja man akate te šaj te spasinel tumen. Akana džan posigate hem anen me dade akate“.

Ola irangje pe khere hem vakergje pe dadeske sa so ulo hem sarine zaedno gele ko Egipet. Palo but berša, o Josif hem o dad leskoro sine palem zaedno.