O Mojsej živingja ko Madijam 40 berš. Adari ženingja pe hem sine le čhave. Jekh dive, džikote arakhela sine e bakhren uzi planina Sinaj, dikhlja nešto čudno. Jekh grmuška sine la jag, a na thabljol sine! Keda o Mojsej gelo popaše te dikhel soj adava, ov šungja glaso tari grmuška sar vakerela leske: „Mojsej! Ma ava popaše. Ikal te sandale soske tergjovea ko sveto than“. Adava sine o Jehova so kerela sine lafi preku jekh angeli.

O Mojsej darandilo, hem adaleske učhargja po muj. O glaso phengja: „Me dikhljum kobor tane mučime o Izraelcija. Me ka spasinav len taro Egipkjajna hem ka ingarav len ki šukar phuv. Tu ka ikale mle narodo taro Egipet“. So mislinea, dali o Mojsej iznenadingja pe keda šungja akava?

O Mojsej pučlja: „So ka vakerav keda o manuša ka pučen man koj bičhalgja man?“ O Devel odgovoringja leske: „Vaker lenge kaj bičhalgja tut o Jehova, o Devel e Avraameskoro, o Devel e Isakoskoro, hem o Devel e Jakoveskoro“. Ama, o Mojsej phengja: „So ako o manuša na šunena man?“ Tegani o Jehova kergja čudo te šaj te dokažinel e Mojsejeske kaj ka pomožinel le. Ov phengja e Mojsejeske te frdel o kaš ki phuv. Tegani, o kaš ulo sap! Keda o Mojsej astargja e sape tari porik, ov ulo palem kaš. O Jehova vakergja: „Keda ka dikhen o manuša akava, ka verujnen kaj me bičhalava tut“.

O Mojsej vakergja: „Ama me na kerava šukar lafi“. Adaleske o Jehova vetingja leske: „Me ka vakerav tuke so te vakere, hem ka bičhalav te phrale e Arone te pomožinel tut“. Adaleske so džanlja kaj o Jehova tano lea, o Mojsej lelja ple romnja hem ple čhaven, hem gelo ko Egipet.

O Izraelcija sine robija hem mora sine te keren phari buti. O Jehova bičhalgja e Mojseje hem e Arone ko faraoni te vakeren leske: „Mukh me narodo te džal ki pustina te del mange žrtva“. O faraoni gordo vakergja: „So interesinela man so vakergja o Jehova. Nane te mukhav e Izraelcon“. Tegani, o faraoni čhivgja len te keren panda pophari buti. Alo vreme o Jehova te sikavel e faraoneske koj tano o Devel. Džanea li sar kergja adava? Ov kergja ko Egipet te oven deš nevolje. O Jehova vakergja e Mojsejeske: „O faraoni na šunela man. Tajsa, rano sabajle, ov ka ovel ki reka Nil. Dža ki leste hem phen leske kaj adaleske so na šungja man hem na mukhlja me narodo te ikljol tari akaja phuv, celo pani ki reka Nil ka ovel rat“. O Mojsej šungja le hem gelo ko faraoni. O faraoni dikhlja sar o Aron khuvela e kaštea ko Nil, hem i reka uli rat. I reka počmingja te khandel, o mačhe ki late mule, hem poviše našti sine te piel pe latar pani. Ama, o faraoni panda na mukhela sine e Izraelcon te džan peske.

Palo efta dive o Jehova palem bičhalgja e Mojseje ko faraoni te vakerel leske: „Ako na mukhea me narodo te džal peske tegani celo Egipet ka ovel pherdo žambencar“. O Aron vazdingja o kaš hem celo phuv počmingja te phergjol žambe. O manuša arakhena sine žambe ko lengere khera ko krevetija hem ko činie. Segde sine žambe! O faraoni vakergja e Mojsejeske te molinel e Jehova te čhinavel akaja nevolja. Ov vetingja kaj ka mukhel e Izraelcon te džan peske. Agjaar, o Jehova čhinavgja i nevolja, hem o Egipkjajna khedingje sa o žambe so mule ko kupe. I phuv počmingja lošno te khandel. Ama, o faraoni palem na mukhlja e Izraelcon te džan peske.

Tegani o Jehova vakergja e Mojseske: „O Aron valjani te khuvel e kaštea ki phuv, hem i prašina ka ovel komarcija“. Taro jekh puti segde letinena sine komarcija. Nesave taro e faraoneskere sluge vakergje leske: „Akaja nevolja tani taro Devel“. Ama, o faraoni akava da puti na manglja te mukhel e Izraelcon te džan peske.