Sar so nakhela sine o vreme, o Izraelcija palem čhinavgje te služinen e Jehovaske hem počmingje te obožavinen hovavne devela. Efta berš o Madijamcija čorena sine e Izraelcongere životnen hem uništinena sine sa so sine len sadimo ko nive. Te šaj te našen taro Madijamcija, o Izraelcija mora sine te garaven pe ko peštere hem ko planine. Ola but molinena sine e Jehova te spasinel len. Adaleske o Jehova bičhalgja jekhe angele ko terno Gedeon. O angeli vakergja leske: „O Jehova biringja tut te spasine e narodo“. O Gedeon pučlja: „Sar ka spasinav e Izraelcon? Koj sium me te kerav adava?“

O Gedeon manglja te uverinel pe kaj o Jehova čače biringja leste. Adaleske, ov čhivgja bakhrani koža ki phuv hem vakergja e Jehovaske: „Tajsa sabajle ako sine i koža sapani a i phuv šuki, ka džanav kaj mangea me te spasinav e Izraelcon“. O tajsutno dive, i koža sine but sapani, a i phuv šuki. Ama, o Gedeon rodingja panda nešto taro Jehova. Ov vakergja leske tajsa sabajle i koža te ovel šuki a i phuv sapani. Agjaar ulo da. Akava uveringja e Gedeone kaj o Jehova biringja le. Adaleske, khedingja ple vojska te šaj te borinen pe e Madijamconcar.

O Jehova vakergja e Gedeoneske: „Ka pomožinav e Izraelconge te pobedinen“. Ama, isi tut but vojnikija tuja, šaj te mislinen tumenge kaj korkori pobedingjen len. Adaleske, vaker sarinenge so darana te džan peske khere“. Tegani, 22.000 vojnikija gele peske khere, a 10.000 ačhile. O Jehova vakergja: „Panda sien but vojnikija. Ingar len ki reka hem vaker lenge te pien pani. Le tuja samo adalen so, džikote piena pani dikhena pe strane te na avel lenge nesavo dušmani“. Samo 300 vojnikija piena sine pani agjaar. O Jehova vetingja kaj akala hari džene ka pobedinen e madijamsko vojska koja so sine la 135.000 manuša.

Adaja rat o Jehova vakergja e Gedeoneske: „Akana napadin e Madijamcon“. O Gedeon dengja pe manušenge šinga hem bare khore kote so sine thare fakelija. Tegani vakergja lenge: „Dikhen me so kerava hem keren tumen da agjaar“. O Gedeon phudingja ki šing, phaglja o khoro, vazdingja o fakeli hem vikingja ko celo glaso: „O mači e Jehovaskoro hem e Gedeoneskoro!“ Odma palo adava, o 300 vojnikija kergje isto agjaar. O Madijamcija but darandile hem počmingje te našen ko sa o strane. Doborom sine bunime so počmingje te mudaren pe maškar peste. O Jehova akava da puti pomožingja e Izraelconge te pobedinen ple dušmanen.

Jekh Izraelco kova so vikinela pe sine Elkana sine le duj romnja — i Ana hem i Fenina. Ama, ov mangela sine poviše e Ana. I Fenina celo vreme asala sine e Anake hem ponižinela la adaleske so na sine la čhave, a e Fenina sine la but čhave. Sekova berš o Elkana ingarela sine pe familija ko Silo, kote so sine o šatori bašo obožavanje, te den žrtva e Jehovaske. Jekh puti, džikote sine ko Silo, ov primetingja kaj i Ana, kola so but mangela la, sine but tažno. O Elkana vakergja: „Ma rov, Ana. Ake me sium tuja hem me mangava tut“.

Pokasno i Ana geli korkori ko šatori bašo obožavanje te molinel pe. Oj našti sine te čhinavel e rojbaja džikote molinela sine e Jehova te pomožinel lake. Oj dengja lafi: „Jehova ako dengjan man murš čhavo, me ka dav le tuke te služinel celo plo životo“.

O prvosvešteniko o Ilij dikhlja sar i Ana kerela korkori pea lafi ama glaso na šungjola latar hem mislingja kaj tani mati. Ama, oj vakergja leske: „Na sium mati, gospodare, nego isi man baro problemi hem aljum te vakerav le e Jehovaske“. O Ilija halilo kaj grešingja hem vakergja e Anake: „Neka del tut o Devel adava so rodea lestar“. I Ana osetingja pe pošukar hem irangja pe ki pi familija. O javer berš i Ana bijangja murš hem čhivgja o anav leskoro Samoil. Šaj li te zamisline tuke kobor sine radosno i Ana?

I Ana na bistergja so dengja lafi e Jehovaske. Samo so čhinavgja te del e Samoile thud, oj ingargja le ko šatori bašo obožavanje te služinel e Jehovaske. Oj vakergja e Ilijaske: „Ake o čhavo baši kaste so molingjum e Jehova te del le mange. Dava le e Jehovaske te služinel leske celo plo životo“. O Elkana hem i Ana sekova berš džana sine te posetinen e Samoile hem ingarena leske sine po jekh nevi nametka. O Jehova dengja e Ana panda trin murša hem duj čhaja.