O Izraelcija palem mukhle e Jehova hem počmingje te obožavinen hovavne devela. Keda o Amoncija napadingje e Izraelcon, o hovavne devela našti sine te pomožinen lenge. O Izraelcija but berša cidena sine muke. Ko krajo ola vakergje e Jehovaske: „Grešingjem. Molinaja tut spasin amen taro amare dušmanja“. Tegani uništingje pumare idolija hem počmingje palem te služinen e Jehovaske. O Jehova našti sine više te dikhel len sar cidena muke.

O Jehova biringja jekh vojniko kova so vikinela pe sine Jeftaj te vodinel e narodo ki vojna protiv o Amoncija. Ov vakergja e Jehovaske: „Ako pomožingjan amenge te pobedina ki akaja vojna, vetinava tuke kaj keda ka iranav man khere adava so ka ikljol prvo taro mlo kher, ka dav le tuke“. O Jehova šungja e Jeftajeskiri molitva hem pomožingja leske te pobedinel.

Keda irangja pe o Jeftaj khere, prvo taro udara iklili leskiri čhaj, koja so sine leske edinstveno čhavo. Oj khelela sine hem khuvela sine ko dajre. Keda dikhlja la o Jeftaj setingja pe ko plo vetuvanje hem vakergja lake: „O mi čhaj! Mora li sine prvo tu te ikljove angli mande? Vetingjum e Jehovaske hem te šaj te kerav adava so vetingjum mora te bičhalav tu ko šatori bašo obožavanje ko Silo“. Ama, i čhaj leskiri vakergja leske: „Mo dad, ako vetingjan nešto e Jehovaske mora te ispolnine le. Samo mukh man prvo te džav duj masek ki planina me amalinkencar. A palo adava ka džav ko Silo. E Jeftajeskiri čhaj verno služingja ko šatori bašo obožavanje dži ko krajo taro plo životo. Sekova berš lakere amalinka džana sine ko Silo te dikhen la.

O prvosvešteniko, o Ilij sine le duj čhave kola so služinena sine ko šatori sar sveštenikija. Lengere anava sine Ofni hem Fines. Ola na šunena sine e Jehovaskere zapovedija hem but lošno ponašinena pe sine e javerencar. Keda o Izraelcija anena sine žrtve e Jehovaske, o Ofni hem o Fines lena sine peske o najšukar delo taro mas. O Ilij šungja bašo adava so kerena sine leskere čhave, ama na kerela sine ništo. Dali o Jehova mukhlja akala bukja agjaar te ačhoven?

O Samoil sine but poterno taro Ofni hem taro Fines, ama na džala sine palo lengoro primer. O Jehova sine but zadovolno taro Samoil. Jekh rat džikote o Samoil sovela sine, šungja sar nekoj vikinela le ko anav. Uštilo, prastandilo ko Ilij hem vakergja leske: „Ake sium!“ O Ilij vakergja leske: „Me na vikingjum tut. Iran tut te sove“. O Samoil irangja pe te sovel, ama palem šungja adava glaso. Keda šungja o Samoil trito puti palem isto glaso, o Ilij halilo kaj o Jehova tano adava so vikinela le. Tegani ov vakergja e Samoileske keda ka šunel palem akava glaso, te phenel: „Vaker Jehova. Tlo sluga šunela tut“.

O Samoil irangja pe palem te pašljol. Tegani, šungja sar o glaso vikinela: „Samoil! Samoil!“ Ov odgovoringja: „Vaker Jehova. Tlo sluga šunela tut“. O Jehova vakergja leske: „Vaker e Ilijaske kaj ka kazninav, le hem leskere familija. Ov džanela kaj leskere čhave kerena lošna bukja ko mlo šatori, ama ništo na kerela“. O tajsutno dive sabajle, o Samoil phravgja o udar taro šatori, sar so kerela sine adava stalno. Ov darala sine te vakerel e prvosveštenikoske so vakergja leske o Jehova. Ama, o Ilij vikingja le hem pučlja le: „Mo čhavo, so vakergja tuke o Jehova? Vaker mange sa“. Tegani o Samoil vakergja leske sa so phengja leske o Jehova.

Džikote bajrola sine o Samoil o Jehova celo vreme sine lea. Sa o Izraelcija džanena sine kaj o Jehova biringja e Samoile te ovel proroko hem sudija.