O Jehova vakergja e Samueleske: „Dža ko kher e Jesejeskoro. Jekh taro leskere čhave ka ovel cari ko Izrael palo Saul“. Tegani o Samoil gelo ko Jesej. Keda dikhlja e najphureder čhave, mislingja peske: „O Jehova sigurno biringja akale“. Ama, o Jehova vakergja e Samoileske kaj na biringja leste. Ov vakergja leske: „Me dikhava savo o vilo e manušeskoro, a na sar izgledinela avrijaldan“.

O Jesej angja anglo Samoil panda pe šove čhaven. Ama, o Samoil vakergja leske: „O Jehova na biringja nijekhe lendar. Isi tut li panda čhave?“ O Jesej vakergja leske: „Isi man panda jekh o najtikno, o David. Ov arakhela e bakhren“. Keda alo o David, o Jehova vakergja e Samoileske: „Leste biringjum!“ O Samoil čhorgja maslo upro leskoro šero hem adalea pomazingja le te ovel o javer cari ko Izrael.

Palo nesavo vreme, o Izraelcija počmingje vojna e Filistejconcar, tari lengiri strana sine jekh but baro vojniko, so vikinela pe sine Golijat. Ov sekova dive asala sine e Izraelconge. Glasno vikinela sine: „Ajde, neka avel nekoj te borinel pe mancar. Ako pobedingja ov amen ka ova tumare robija. Ama, ako pobedinava me tegani tumen ka oven amare robija“.

Jekh dive, o David alo ko than kote so sine i Izraelsko vojska te anel hajbaske pe phralenge kola so sine vojnikija. Keda šungja so vakerela o Golijat, o David vakergja: „Me ka borinav man lea“. O cari o Saul vakergja leske: „Ama tu sian panda tikno“. Ama, o David vakergja: „O Jehova ka pomožinel man“.

O Saul dengja e Davideske pli oprema baši vojna, ama o David phengja: „Našti te borinav man akale opremaja“. O David lelja šelo kolea so frdena pe sine bara hem gelo ki jekh reka. Adathe biringja pandž mazna bara hem čhivgja len ki pli torba. Tegani prastandilo ko Golijat. O Golijat vakergja leske: „Ava ki mande, tiknea. Tuja ka parvarav e pticen hem e diva životnen“. Ama, o David na darandilo. Ov vakergja leske: „Tu avea mange mačea hem kopjea, a me avava tuke e Jehovaskere anavea! Tu na borinea tut protiv amende, nego protiv o Devel. Sarine soj akate ka dikhen kaj o Jehova tano posilno taro mači hem taro kopje. Avdive ov ka predajnel tumen ko amare vasta“.

Tegani, o David čhivgja jekh bar ko šelo, hem počmingja te vrtinel le sa pe silaja. O Jehova pomožingja o bar te khuvel e Golijate pravo ko čekat. Tegani ov pelo ki phuv hem mulo. Keda dikhle adava, o Filistejcija počmingje te našen. Dali isi tut doverba ko Jehova sar so sine e Davide?

Otkeda o David mudargja e Golijate, o cari, o Saul čhivgja le te vodinel e vojska. O David pobedinela sine ko but vojne hem ulo but pendžardo. Sekogaš keda iranela pe sine tari nesavi vojna, o džuvlja khelena sine hem giljavena sine: „O Saul mudargja bute manušen, ama o David panda poviše“. Adaleske o Saul ulo ljubomorno e Davideske hem manglja te mudarel le.

O David but šukar bašalela sine ki harfa. Jekh dive, džikote bašalela sine e Sauleske, o Saul frdingja o kopje te mudarel le. O David sigate cidingja pe hem o kopje khuvgja ko zido. Palo adava, o Saul manglja but puti te mudarel le. Adaleske, o David našlja hem garavgja pe ki pustina.

O Saul lelja 3.000 vojnikija hem gelo te rodel e Davide. Bizo te džanel, khuvgja ki peštera kote so garavela pe sine o David pe manušencar. Tegani e Davideskere manuša vakergje leske: „Ake tuke šansa te mudare le“. O David pohari gelo uzo Saul hem bizo te osetinel le čhingja kotor tari leskiri nametka. Palo adava, e Davideske sine pharo, soske adalea sikavgja kaj na poštujnela e care so sine birimo taro Jehova. Ov na mukhlja ple manušen te napadinen e Saule. Keda iklilo o Saul tari peštera, o David vikingja hem vakergja leske kaj šaj sine te mudarel le ama kaj na kergja adava. Dali o Saul otkažingja pe taro adava te mudarel e Davide?

Na. O Saul panda rodela le sine. Jekh rat, o David pe unukoja e Avisajea ale čorjale ko logori e Sauleskoro. Adathe sarine sovena sine, čak o čuvari e Sauleskoro, o Avenir. O Avisaj vakergja: „Ake amenge šansa. Mukh man te mudarav le!“ Ama, o David odgovoringja: „O Jehova ka iranel e Sauleske. Te la lestar samo o kopje hem o khoro hem te dža“.

Keda o David uklilo ki planina kotar so dikhjola sine o logori vikingja: „Avenir soske na arakhea e care? Kaj tane leskoro kopje hem o khoro?“ O Saul pendžargja o glaso e Davideskoro hem vakergja: „Šaj sine te mudare man, ama na kergjan adava. Džanava kaj pali mande tu ka ove cari ko Izrael“. Palo adava, o Saul irangja pe ki pli palata. Ama, sarine tari e Sauleskiri familija na mrzinena sine e Davide.