O najphureder čhavo e Sauleskoro, vikinela pe sine Jonatan hem sine but hrabro vojniko. O David vakergja kaj o Jonatan sine pobrzo taro orlo hem posilno taro lavi. Jekh dive, o Jonatan dikhlja ko jekh brego 20 filistejska vojnikija. Pe vojnikoske so ingarela sine leskoro štiti vakergja: „Ka napadina len samo ako o Jehova dela amen znako. Ako o Filistejcija vakerena amenge te dža ki lende, tegani ka napadina len.“ O Filistejcija vikingje: „Aven te borina amen!“ Tegani, o Jonatan hem o manuš so phiravela sine leskoro štiti gele hem pobedingje e filistejsko vojnikon.

Adaleske so o Jonatan sine najphureder čhavo e Sauleskoro, ov valjani sine te ovel o javer cari palo po dad. Ama, o Jonatan džanela sine kaj o Jehova biringja e Davide te ovel o javer cari ko Izrael hem ov na sine ljubomorno bašo adava. O Jonatan hem o David ule but paše amala. Ola vetingje peske kaj ka zaštitinen hem kaj ka braninen jekh jekhe. O Jonatan dengja e Davideske pli nametka, o mači, i strela hem po pojas sar znako bašo amalipe.

Jekh puti, džikote o David garavela pe sine taro Saul, o Jonatan gelo ki leste hem vakergja leske: „Ov hrabro, hem ma dara. O Jehova biringja tut te ove cari. Čak mo dad džanela adava“. Mangea li te ovel tut doborom šukar amal sar o Jonatan?

But puti, o Jonatan čhivgja plo životo ki opasnost samo te pomožinel pe amaleske. Ov džanela sine kaj o dad leskoro o Saul, mangela te mudarel e Davide adaleske vakergja leske: „Ka kere grevo ako mudarea e Davide, ov na kergja ništo lošno“. Keda šungja akava o Saul but holjangja e Jonataneske. Palo nesave berša, o Saul hem o Jonatan mule ki jekh vojna.

Keda mulo o Jonatan, palo adava, o David rodingja leskere čhave e Mefivosteje. Keda angje le ki leste, o David vakergja: „Adaleske so sium sine te dadea paše amala, me ka grižinav man tuke celo tlo životo. Ka živine ki mli palata hem ka ha tari mli sofra“. O David nikogaš na bistergja pe amale e Jonatane.

Keda mulo o Saul, o David ulo cari. Tegani sine le 30 berš. Nakhle nekobor berša otkeda ulo cari, jekh dive iklilo ko krovi tari pli palata hem adathar dikhlja jekhe šuže romnja. O David doznajngja kaj lakoro anav tano Vitsavea hem kaj tani ženimi jekhe vojnikoja so vikinela pe Urija. O David vakergja te anen la ki palata. Tegani ov sukja laja hem oj ačhili khamni. O David manglja te garavel adava so kergja. Ov vakergja e zapovednikoske e vojskakoro te čhivel e Urija ko prva redija keda ka džan te borinen pe, hem palo adava sarine te ciden pe palal, te mukhen le korkori. Tegani e Urija mudargje le ki vojna, a o David lelja e Vitsavea romnjake.

Ama, o Jehova dikhlja sa o lošna bukja so kergja len. So kergja o Jehova? Ov bičhalgja ple proroko e Natane ko David. O Natan vakergja leske: „Jekh barvalo manuš sine le but bakhre, a jekh čorolo manuš sine le samo jekh bakhro so mangela le sine but. Ama, o barvalo manuš lelja o bakhro e čoroleskoro“. O David holjangja hem vakergja: „Adava barvalo manuš valjani te merel!“ Tegani o Natan vakergja e Davideske: „Tu sian adava barvalo manuš!“ Adava but pogodingja e Davide hem priznajngja e Nataneske: „Grešingjum e Jehovaske“. Bašo akava grevo so kergja le, o David hem leskiri familija sine len but nevolje. O Jehova kazningja e Davide ama mukhlja le dživdo adaleske so sine iskreno hem ponizno.

Pokasno, o David manglja te gradinel hrami e Jehovaske, ama o Jehova biringja leskere čhave e Solomone te gradinel leske hrami. O David počmingja te spreminel materijali e Solomoneske te šaj te gradinel o hrami. O David vakergja: „O hrami e Jehovaskoro mora te ovel but šužo. O Solomon tano panda terno, ama me ka pomožinav le. Ka spreminav sa so valjani leske“. O David dengja but pare, arakhlja šukar majstorija hem khedingja but zlato hem srebro. Isto agjaar, ov angja kedrovo kaš taro Tir hem taro Sidon. Angleder te merel, o David dengja e Solomoneske o planija bašo gradibe e hrameskoro. Ov vakergja: „O Jehova vakergja mange te pišinav akala bukja te šaj te dav len tuke. O Jehova ka pomožinel tut. Ma dara ov hrabro hem počmin te gradine“.