Keda o Solomon ulo cari ko Izrael, o Jehova pučlja le: „So mangea te dav tut?“ O Solomon vakergja: „Me sium terno hem na džanava so te kerav. Molinava tut te de man mudrost te šaj šukar te vodinav te narodo“. O Jehova vakergja: „Adaleske so rodingjan mandar mudrost, ka kerav tut te ove najmudro manuš ki celo Phuv. Isto agjaar, ka kerav tut te ove but barvalo. Hem ako sian mange poslušno ka živine but berša“.

O Solomon počmingja te gradinel o hrami. Ov koristingja o najšužo zlato, srebro, kaš hem bar. But iskusna murša hem džuvlja kergje buti ko hrami. Palo efta berš, o hrami sine završimo hem spremno te posvetinel pe e Jehovaske. Adathe sine žrtveniko hem ki leste sine žrtve. O Solomon bešlja ko kočija anglo žrtveniko hem molingja pe: „Jehova akava hrami nane tuke dovolno baro ili dovolno šužo, ama molinava tut prifatin amare žrtve hem šun amare molitve“. So mislinela sine o Jehova bašo hrami hem baši molitva e Solomoneskiri? Keda završingja o Solomon e molitvaja, o Jehova mukhlja jag taro nebo hem thargja o žrtve ko žrtveniko. Adalea o Jehova sikavgja kaj prifatinela o hrami so kergje le. Keda o Izraelcija dikhle akava, ola but radujngje pe.

O cari o Solomon sine pendžardo sar but mudro manuš ko celo Izrael hem ko but javera thana. O manuša avena sine ko Solomon te šaj te pomožinel len te rešinen pumare problemija. Čak i carica tari Sava ali ki leste te pučel le phare pučiba te šaj te dikhel dali tano čače adava so vakerena baši leste. Keda šungja leskere odgovorija, oj phengja: „Me na verujngjum ko adava so vakerena sine o manuša baši tute, akana dikhava kaj sian pomudro taro adava so vakerena. To Devel, o Jehova, nagradingja tut“. O manuša ko Izrael živinena sine but šukar hem srekjno. Ama o bukja meningje pe.

Džikote o Solomon služinela sine e Jehovaske, ko Izrael sine mir. Ama, o Solomon lelja peske but romnja taro javera phuvja hem adala romnja služinena sine idolenge. Hari pohari, o Solomon meningja pe hem ov da počmingja te služinel idolenge. Adaleske o Jehova holjangja leske. Ov vakergja e Solomoneske: „Ka lav o Izrael tari tli familija hem ka delinav le ko duj delija. O pobaro delo ka dav le jekhe tle slugaske, a ti familija ka vladinel samo e potikne deloja“.

O Jehova ko javer da način sikavgja kaj čače ka kerel adava. Jekh taro sluge e Solomoneskere, o Jerovoam, džikote džala sine ko drumo arakhlja e proroko e Ahija. O Ahija pharavgja pli nametka ko 12 kotora hem vakergja e Jerovoameske: „O Jehova ka lel o cartsvo Izrael tari familija e Solomoneskiri hem ka delinel le ko duj delija. Le deš taro akala kotora soske tu ka ove cari upro deš plemija“. Keda o Solomon šungja bašo akava, manglja te mudarel e Jerovoame! Adaleske o Jerovoam našlja ko Egipet. Palo nesavo vreme, o Solomon mulo, a leskoro čhavo o Rovoam ulo cari. O Jerovoam dikhlja kaj šaj te iranel pe palem ko Izrael.

O starešine ko Izrael vakergje e Rovoameske: „Ako sian šukar e manušencar, ola ka oven tuke verna“. Ama, leskere poterne amala vakergje leske: „Mora te ove strogo e manušencar! Čhiv len te keren panda pophari buti!“ O Rovoam šungja o sovet ple poterne amalengoro. Ov sine e manušencar lošno hem adaleske ola ule protiv leste. Ola čhivgje e Jerovoame te ovel cari upro deš plemija kola so ule pendžarde sar carstvo taro Izrael. O javera duj plemija ule pendžarde sar carstvo tari Juda hem ačhile verna e Rovoameske. Agjaar o 12 plemija taro Izrael sine delime.

O Jerovoam na manglja leskoro narodo te džal ko Erusalim te obožavinel e Jehova, soske o Erusalim sine ko carstvo e Rovoameskoro. Ov darala sine kaj o narodo ka cidel pe lestar hem ka ovel tari e Rovoameskiri strana. Adaleske, kergja duj zlatna telcija hem vakergja pe narodoske: „O Erusalim tano but dur. Akate obožavinen e Devle“. O manuša počmingje te obožavinen e zlatna telcon hem palem bistergje e Jehova.