O cari tari Sirija, o Ven-Adad, počmingja te borinel pe e Izraelea. Ama, sekova puti keda o Sirijcija mangena sine te napadinen e care taro Izrael, o Ilija predupredinela le sine bašo adava, hem agjaar ov stalno spasinela pe sine. Adaleske, o Ven-Adad manglja te astarel e Eliseje hem te phandel le. Keda šungja kaj o Elisej tano ki diz Dotan, bičhalgja pe vojska te astaren le.

O vojnikija resle ko Dotan rakjate. O tajsutno dive, e Elisejeskoro sluga iklilo avri hem dikhlja kaj celi diz sine opkolimi bare vojskaja. Ov darandilo but hem vakergja: „Elisej, so ka kera akana?“ O Elisej vakergja leske: „Amari vojska tani pobari, nego lengiri“. Ko adava momenti, o Jehova kergja o sluga e Elisejeskoro te dikhel kaj o planine okolu i diz tane pherde grastencar hem kočiencar tari jag.

Keda o siriska vojnikija mangle te astaren e Eliseje, ov molingja pe: „Jehova, ker te na dikhen“. Tegani o vojnikija doborom sine bunime so našti sine te haljoven kaj tane. O Elisej vakergja e vojnikonge: „Tumen sien ki pogrešno diz. Aven mancar, ka ingarav tumen ko manuš so rodena le“. Ola gele palo Elisej hem ov ingargja len ki Samarija, i diz kote so živinela sine o cari taro Izrael.

O Sirijcija halile kote tane, ama sine kasno. O cari taro Izrael pučlja e Eliseje: „Te mudarav li len?“ Dali o Elisej koristingja akaja prilika te iranel lenge lošnipaja sar ola so mangle te keren leske? Na. O Elisej vakergja: „Ma mudar len. De len te han hem mukh len te džan peske.“ Adaleske, o cari kergja bari gozba hem ko krajo mukhlja len te džan peske.

E Jezavela sine la čhaj so vikinela pe Gotolija, oj sine but lošno isto sar pi daj. I Gotolija sine ženimi e carea tari Juda. Keda mulo lakoro rom, počmingja te vladinel lakoro čhavo. Ama, keda mulo ov da, i Gotolija kergja oj te ovel carica ki Juda. Tegani oj trudingja pe te uništinel celo carsko familija, adalea so mudarela sine sarinen so šaj sine te oven carija ko lakoro than. Oj čak mudarela sine pe unukon! Sarine darana sine latar.

O prvosvešteniko o Jodaj hem leskiri romni i Josaveta, džanena sine kaj adava so kerela i Gotolija tano but lošno. Ola čhivgje ki opasnost pumare životija adalea so garavgje jekhe taro unukija e Gotolijakere. Leskoro anav sine Joas. Ola bajrargje le ko hrami.

Keda o Joas sine le efta berš, o Jodaj vikingja sa e zapovednikon hem e leviten hem vakergja lenge: „Tergjoven anglo udara e hrameskoro hem ma mukhen nikas te khuvel andre“. Tegani, o Jodaj čhivgja e Joase te ovel cari ki Juda hem čhivgja leske kruna ko šero. O manuša tari Juda počmingje te vikinen: „Te živinel o cari!“

I carica, i Gotolija, šungja i galama taro manuša hem odma geli ko hrami. Keda dikhlja e neve care počmingja te vikinel: „Kergjen plani protiv mande!“ O zapovednikija astargje e lošno carica, ikalgje la taro hrami hem mudargje la. Dali o narodo počmingja te služinel e Jehovaske palo lakoro meribe?

O Jodaj pomožingja e narodoske te kerel sojuz e Jehovaja kolea so vetingje kaj ka služinen samo leske. O Jodaj vakergja lenge te rušinen o hrami e Vaaleskoro hem te phagjen o idolija ko kotora. Ov čhivgja e sveštenikon hem e leviten te služinen ko hrami te šaj o narodo palem te obožavinel e Jehova adathe. O Jodaj isto agjaar, čhivgja stražarija te arakhen o hrami te šaj te na khuvel nekoj so nane čisto. Palo adava, o Jodaj hem o zapovednikija ingargje e Joase ki palata hem čhivgje le ko prestol. O narodo taro carstvo Juda sine but radosno. Akana i lošno Gotolija više na sine hem ola šaj sine palem te služinen e Jehovaske, a na e hovavne devleske, e Vaaleske. Adalea so sine hrabro, o Jodaj pomožingja bute manušenge.