O manuša tari asirsko diz Ninevija sine but lošna. O Jehova vakergja ple prorokoske e Jonaske te džal ki Ninevija hem te vakerel lenge te na keren više lošna bukja. Ama, o Jona našlja hem gelo ko javer drumo. Uklilo ko jekh brodi kova so džala sine ko Tarsis hem našlja.

Džikote o brodi sine ko more, taro jekh puti počmingja baro nevreme, hem o mornarija but darandile. Ola molinena pe sine pumare devlenge hem pučena pe sine: „Soske ovela amenge akava?“ Ko krajo, o Jona vakergja lenge: „Me sium krivo. Me našava taro adava so vakergja mange o Jehova te kerav. Frden man ko more, hem i bura ka ačhol“. O mornarija na mangle te frden e Jona ko more, ama ov sine uporno ko adava. Keda frdingje le ko more, i bura ačhili.

O Jona mislingja kaj ka merel. Džikote batinela sine sa pohor hem pohor, ov molinela pe sine e Jehovaske. Tegani, o Jehova bičhalgja jekhe bare mačhe. Gltingja e Jona, ama na mudargja le. Taro e mačheskoro vogi o Jona molingja pe: „Vetinava kaj ka kerav sa so ka vakere mange“. O Jehova kergja o Jona te ačhol dživdo trin dive ko vogi e mačheskoro, hem palo adava kergja o mačho te frdel le ki phuv.

Dali adava so o Jehova spasingja e Jona značingja kaj ov na valjani sine palem te džal ki Ninevija? Na. O Jehova palem phengja e Jonaske te džal adari. Akava puti, o Jona šungja le. Ov gelo ki Ninevija hem e lošno manušenge vakergja: „Bašo 40 dive, i Ninevija ka ovel uništimi“. Ama, tegani ulo nešto so o Jona ni na mislingja kaj ka ovel, o manuša tari Ninevija šungje le hem meningje pe. O cari tari Ninevija phengja ple narodoske: „Roden e Devle, hem kajnen tumen. Šaj agjaar nane te uništinel amen“. Keda o Jehova dikhlja kaj o manuša kajngje pe, ov na uništingja i Ninevija.

O Jona but holjangja so na uništingja o Jehova i diz. Zamislin tuke, o Jehova sine strplivo hem milostivo sprema o Jona, a ov na sine milostivo sprema o manuša so živinena sine ki Ninevija. Namesto adava, gelo avri tari diz hem holjamo bešlja teli jekh senka taro jekh dudum. Ama, o dudum šukilo, hem o Jona but holjangja. Adaleske o Jehova vakergja leske: „Tuke tano poviše žal bašo jekh dudum, nego bašo manuša tari Ninevija. Me prostingjum lenge, hem adaleske ola panda tane dživde“. So manglja o Jehova akalea te sikavel e Jona? Kaj o manuša tari Ninevija vredinena sine poviše taro jekh dudum.

O Asircija osvojngje o carstvo taro Izrael, kova so sine le deš plemija. Akana o Senahirim, o cari tari Asirija, manglja te osvojnel o carstvo tari Juda, kova sine le duj plemija. Ov počmingja te osvojnel o dizja ki Juda jekh palo jekh. Taro sa o dizja, ov najviše manglja te osvojnel o Erusalim. O Senahirim na džanlja kaj o Jehova ka zaštitinel o Erusalim.

O Ezekija, o cari tari Juda, dengja but pare e Senahirimeske te na napadinel o Erusalim. Ama, o Senahirim iako lelja o pare, ov palem bičhalgja pe vojska te napadinel. O manuša so živinena sine ko Erusalim, but darana sine soske o Asircija avena sine sa popaše hem popaše. O Ezekija vakergja lenge: „Ma daran! O Asircija tane silna, ama o Jehova ka kerel amen te ova posilna lendar“.

O Senahirim bičhalgja e rapšako, o sluga so prenesinela sine leskere porake, ko Erusalim te šaj te daravel e manušen. O rapšak tergjola sine avri tari diz hem vikinela sine: „O Jehova našti te pomožinel tumen. Ma mukhen o Ezekija te hovavel tumen. Nane devel so ka šaj te zaštitinel tumen amendar“.

O Ezekija pučlja e Jehova so te kerel. O Jehova odgovoringja leske: „Ma dara taro adava so vakerela o rapšak. O Senahirim nane te osvojnel o Erusalim“. Palo adava, o Ezekija dobingja pismija taro Senahirim. Ki lende pišinela sine: „Otkažin tut. O Jehova našti te spasinel tut“. Tegani, o Ezekija molingja pe: „Jehova, molinava tut, spasin amen, te šaj sarine te džanen kaj samo tu sian o čačutno Devel“. O Jehova odgovoringja leske: „O cari tari Asirija nane te khuvel ko Erusalim. Me ka zaštitinav mli diz“.

O Senahirim sine sigurno kaj ka osvojnel o Erusalim. Ama, jekh rat, o Jehova bičhalgja jekhe angele ko šatorija kote so sovena sine o vojnikija. Akava angeli mudargja 185.000 vojnikija! O cari, o Senahirim, ačhilo bizo ple najšukar vojnikija, adaleske mora sine te iranel pe khere. Sar so vetingja, o Jehova zaštitingja e Ezekija hem o Erusalim. Te živine sine ko Erusalim ko adava vreme, ka ovel tut li sine doverba ko Jehova?