O manuša ki Juda but puti bistrena sine e Jehova hem služinena sine hovavne devlenge. O Jehova but berša trudinela pe sine te pomožinel len. Ov bičhalela sine but prorokija te predupredinel len, ama ola namesto te šunen len asana lenge sine. Sar sikavgja lenge o Jehova kaj na valjani te služinen idolenge?

O Navuhodonosor, o cari taro Vavilon, počmingja te pobedinel bute narodon. Keda prvo puti osvojngja o Erusalim, ov zarobingja e care e Joahine, e knezon, e vojnikon, e manušen so sine zanaetčie, hem ingargja len ko Vavilon. Isto agjaar, ov lelja celo barvalipe taro e Jehovaskoro hrami. Palo adava, o Navuhodonosor čhivgja e Sedekija te ovel cari ki Juda.

Ko početok, o Sedekija šunela sine e Navuhodonosore. Ama, o narodija so sine okolu lende hem o hovavne prorokija vakerena sine e Sedekijaske te ovel protiv o Vavilon. O Eremija predupredingja le: „Ako ovea protiv o Vavilon, ki Juda ka ovel baro mudaribe, bokhalipe hem nasvalipe“.

Palo efta berš vladibe, o Sedekija odlučingja te protivinel pe e Vaviloneske. Ov rodingja pomoš tari egipetsko vojska. Ama, o Navuhodonosor bičhalgja ple vojska te napadinel o Erusalim, hem i vojska opkolingja celi diz. O Eremija vakergja e Sedekijaske: „O Jehova vakerela kaj ako predajnea tut e Vavilonconge, tu ka ačhove dživdo hem i diz nane te ovel uništimi. Ama ako na predajnea tut, o Vaviloncija ka tharen o Erusalim, a tute ka len tut sar robo“. O Sedekija vakergja: „Nane te predajnav man!“

Palo jekh tekvaš berš, i vavilonsko vojska rušingja o zidija taro Erusalim hem thargja celi diz. Thargja o hrami, mudargja bute manušen hem but džene sine zarobime.

O Sedekija našlja taro Erusalim, ama o Vaviloncija gele pali leste. Astargje le paše uzo Erihon hem ingargje le ko Navuhodonosor. O vavilonsko cari naredingja o Sedekija te dikhel sar mudarena leskere čhaven angli leste. Palo adava, o Navuhodonosor korjargja e Sedekija hem čhivgja le ko zatvor, hem pokasno adathe mulo. Ama, o Jehova e manušenge tari Juda vetingja: „Palo 70 berš palem ka iranav tumen ko Erusalim“.

So ulo e ternencar so sine ingarde ko ropstvo ko Vavilon? Dali ačhile verna e Jehovaske? Ajde te dikha.

Keda o Navuhodonosor zarobingja e knezon tari Juda hem ingargja len ko Vavilon, čhivgja e Asfenaze kova so služinela sine ko carsko dvoro, te nadgledinel len. O Navuhodonosor vakergja e Asfenazeske lendar te birinel e najsasten hem e najmudra terne čhaven. Akala terne čhave valjangje te školujnen pe trin berš, te šaj palo adava te služinen ko carsko dvoro ko Vavilon. Ola valjangje te sikljoven te čitinen, te pišinen hem te keren lafi ki čhib koja so kerela pe sine ko Vavilon. Isto agjaar, ola valjani sine te han taro adava hajbe so hala sine o cari hem leskere manuša. Štar taro adala terne sine o Daniel, o Ananija, o Misail hem o Azarija. O Asfenaz dengja len vavilonska anava: Valtazar, Sedrah, Misah hem Avdenago. Dali adava so sine školujme ko carsko dvoro kergja te na služinen više e Jehovaske?

Akala štar terne odlučingje te oven poslušna e Jehovaske. Ola džanena sine kaj na valjani te han taro hajbe kova so hala sine o cari, soske o zakoni e Jehovaskoro zabraninela sine te han pe nesave životne. Adaleske ola vakergje e Asfenazeske: „Molinaja tut ma čhiv amen te ha taro carsko hajbe“. O Asfenaz vakergja lenge: „Ako na halen hem o cari dikhela kaj izgledinena sar nasvale, ka mudarel man!“

O Daniel sine le jekh idea. Ov vakergja e Asfenazeske: „Molinaja tut de amen deš dive samo zelenčuk hem pani. Palo adava, dikh sar izgledinaja amen, a sar izgledinena o terne so hana taro carsko hajbe“. O Asfenaz soglasingja pe.

Palo deš dive, o Daniel hem leskere trin amala izgledinena sine but posaste taro javera terne. O Jehova but radujngja pe so ačhile leske poslušna. Ov čak dengja e Danieleske mudrost te haljol vizie hem sune.

Keda završingje e školujbaja, o Asfenaz ingargja e ternen anglo Navuhodonosor. Ov kergja lafi lencar hem dikhlja kaj o Daniel, o Ananij, o Misail hem o Azarij tane pogogjaver hem pošukar haljovena o bukja taro javera terne. Tegani biringja lende te keren buti ko carsko dvoro. Keda valjani sine te anel važna odluke, o cari često rodela sine lendar sovet. O Jehova akale štare ternen dengja len mudrost koja so sine pobari taro sa o mudra manuša hem magioničarija e careskere.

Iako sine ki tugjo phuv, o Daniel, o Ananij, o Misail hem o Azarij na bistergje kaj o Jehova tano lengoro Devel. Dali tu da ka ove sekogaš poslušno e Jehovaske, čak keda te roditelija nane tuja?