Jekh rat, o cari o Navuhodonosor dikhlja jekh čudno suno. Doborom darandilo so našti sine više te sovel. Vikingja ple magioničaren hem vakergja lenge: „Objasninen mange so dikhljum ko suno“. Ola pučle le: „A so dikhljan ko suno?“ O Navuhodonosor vakergja lenge: „Na! Tumen ka vakeren mange so dikhljum ko suno! Ili ka mudarav tumen!“ Ola palem pučle le: „Vaker amenge so dikhljan ko suno, hem tegani ka vakera tuke so značinela to suno“. Tegani, ov phengja lenge: „Tumen mangena te hovaven man. Vakeren mange so dikhljum ko suno!“ Ola vakergje leske: „Nane manuš ki Phuv so šaj te vakerel tuke to suno. Adava so rodea našti te kera le“.

O Navuhodonosor but holjangja hem naredingja sa o magioničarija hem o mudra manuša te oven mudarde ki celi phuv. Maškaro adala mudra manuša sine o Daniel, o Sedrah, o Misah hem o Avdenago. O Daniel rodingja taro cari te del le hari vreme. Palo adava, ov hem leskere amala molingje pe e Jehovaske hem rodingje pomoš taro Jehova. So kergja o Jehova?

Ki jekh vizija, o Jehova sikavgja e Danieleske so dikhlja o Navuhodonosor ko suno hem so značinela adava. O tajsutno dive, o Daniel gelo ko e careskoro sluga hem vakergja leske: „Ma mudar e mudro manušen. Me šaj te objasninav o suno e careske“. O sluga ingargja e Daniele ko Navuhodonosor. O Daniel vakergja e careske: „O Devel sikavgja so ka ovel tuja ki idnina. Akava tano tlo suno: Dikhljan jekh baro kipi. O šero leskoro sine taro zlato, o kolin hem o vasta taro srebro, o vogi hem o butija taro bakari, o čanga taro železo, a o pre tele sine taro sastrn mešimo glinaja. Tegani tari jekh planina otkačingja pe jekh bar hem khuvgja e kipe ko pre. O kipi sa phagilo ulo prašina koja so ingargja la i balval. A o bar ulo bari planina, koja so širindili ki celi Phuv.

Palo adava, o Daniel vakergja: „Ake so značinela o suno: O šero taro zlato tano tlo carstvo. O srebreno delo tano o carstvo so ka avel pali tute. Palo adava, ko celo sveto ka vladinel jekh carstvo kova soj pretstavimo bakarea. Pali leste ka avel carstvo so ka ovel zoralo sar železo. A o posledno carstvo so ka vladinel ka ovel delimo — nesave delija ka oven zorale sar železo, a nesave kovle sar glina. O bar so ulo planina tano e Devleskoro Carstvo. Akava Carstvo ka uništinel sa o javera carstvija hem ov ka vladinel zasekogaš“.

Keda šungja akala lafija, o Navuhodonosor pokloningja pe e Danieleske. O Cari vakergja: „Tlo Devel sikavgja tuke so značinela o suno. Nane javer Devel sar leste“. Palo akava, o Navuhodonosor na mudargja e Daniele. Ov čhivgja le te ovel glavno nadgledniko upro sa o mudra manuša hem te ovel vladeteli ko Vavilon. Dali šaj te dikhe sar o Jehova odgovoringja e Danieleske ki molitva?

Palo nesavo vreme, otkeda o Navuhodonosor dikhlja o čudno suno, kergja jekh baro kipi taro zlato. O kipi čhivgja le ko jekh pole so vikinela pe sine Dura hem vikingja sa e važna manušen taro leskoro carstvo te aven adathe. Maškar lende sine o Sedrah, o Misah hem o Avdenago. O cari naredingja: „Keda ka šunen i muzika taro trube, harfe hem gajde pokloninen tumen anglo kipi! Sekoj so nane te pokloninel pe, ka ovel frdimo ki pečka jagaja“. Dali akala trin Evreija pokloningje pe anglo akava kipi ili ačhile verna e Jehovaske?

Tegani o cari naredingja i muzika te počminel. Sarine pokloningje pe, samo o Sedrah, o Misah hem o Avdenago na kergje adava. Nekoj taro manuša primetingja adava hem vakergje e careske: „Okola trin Evreija na pokloningje pe anglo kipi“. O Navuhodonosor naredingja te anen len angli leste hem vakergja lenge: „Ka dav tumen panda jekh šansa te pokloninen tumen anglo kipi. Ako palem na pokloninena tumen, tegani ka frdav tumen ki pečka. Nane devel so ka spasinel tumen mandar“. Ola vakergje leske: „Na valjani amenge dujto šansa. Amaro Devel ka spasinel amen. Ama, čak te na kerel da adava, amen palem nane te poklonina amen anglo kipi“.

O Navuhodonosor sine but holjamo. Vakergja pe slugenge: „Keren i jag ki pečka te ovel efta puti potati taro obično!“ Tegani naredingja pe vojnikonge: „Phanden akale manušen hem frden len ki pečka!“ I pečka sine doborom tati so o vojnikija mule ko isto momenti keda frdingje e trine Evreen ki jag. Ama, o Navuhodonosor keda dikhlja andre ki pečka, ov dikhlja štare dženen sar phirena, a na trinen. Tegani but darandilo hem pučlja pe službenikon: „Neli frdingjem trine dženen andre ki jag? Andre isi štar džene, a jekh lendar ličinela sar angeli!“

O Navuhodonosor gelo popaše uzi pečka hem vikingja: „Ikljoven avri tumen so služinena e Najbare Devleske!“ Sarine sine iznenadime keda dikhle e Sedraho, e Misaho hem e Avdenago sar ikljovena tari pečka dživde hem saste. Lengiri koža, o bala hem o šeja na sine thare, hem čak ni na khandena sine ko dumani tari jag.

O Navuhodonosor vakergja: „O Devel e Sedrahoskoro, e Misahoskoro hem e Avdenagoskoro tano Baro. Ov bičhalgja ple angele hem spasingja len. Nane devel sar lengoro“.

Dali sian odlučno sar akala trin Evreija te ačhove verno e Jehovaske bizi razlika so ka ovel?