Jekh rat, o Navuhodonosor sine le strašno suno. Adaleske vikingja sa e mudra manušen te vakeren leske so značinela o suno. Ama, nikoj našti sine te vakerel leske. Ko krajo, o cari kergja lafi e Danielea.

O Navuhodonosor vakergja e Danieleske: „Ko suno dikhljum jekh kaš. Barilo doborom but učo so reslja dži ko nebo. Šaj sine te dikhel pe tari sekoja strana ki Phuv. Sine le šuže listija hem but plodija. O životne odmorinena pe sine teli leskiri senka hem o ptice kerena sine gnezdo ko leskere granke. Tegani hulilo taro nebo jekh angeli. Ov vakergja: ‘Čhinen o kaš hem leskere granke. Ama, mukhen o steblo e korenoncar, hem okolu leste čhiven sastrnale hem bakarna obračija. O vilo e kašteskoro ka meninel pe taro manušikano ko životinsko, hem adava ka trajnel efta vremija. Sa o manuša ka dikhen kaj o Devel tano Vladeteli hem ov dela o carstvo kaske so mangela‘“.

O Jehova sikavgja e Danieleske so značinela o suno. Keda o Daniel halilo so značinela o suno, ov but darandilo. Ov vakergja e careske: „Pošukar akava suno te ovel sine te dušmanenge, ama, akava tano tuke. O baro kaš so sine čhindo, sian tu. Ka našave o carstvo hem ka ha čar ko livade sar divo životno. Ama, adava so vakergja o angeli te mukhel pe o steblo e korenoncar značinela kaj palem ka ove cari“.

Palo jekh berš, o Navuhodonosor phirela sine ko ramno krovi ki pli palata, hem dikhela sine kobor tano šužo o Vavilon. Ov vakergja: „Kobor šuži diz gradingjum! Čače sium but važno manuš!“ Džikote kerela sine lafi, jekh glaso taro nebo vakergja leske: „Navuhodonosor! Akana o carstvo nane više tlo“.

Ko adava momenti, o Navuhodonosor našavgja pi godi hem ulo sar divo životno. Mora sine te džal peske tari palata hem te živinel e divo životnencar. O bala leskere barile sar perduvija e orloskere, a leskere nokte sar o kandže e pticengere.

Keda nakhle efta berš, o Navuhodonosor ulo palem normalno hem o Jehova kergja le te ovel cari ko Vavilon. O Navuhodonosor vakergja: „Falinava e Jehova, o Cari e neboskoro. Akana džanava kaj o Jehova tano o Vladeteli. Sikavela e gorda manušen te oven ponizna, hem čhivela cari kas mangela“.

Sar so nakhela sine o vreme, o Valtazar ulo cari ko Vavilon. Jekh rat, ov vikingja ki jekh bari gozba e najvažna manušen taro celo carstvo. Ov naredingja ple slugenge te anen o zlatna čaše so lelja len o Navuhodonosor taro e Jehovaskoro hrami. O Valtazar hem leskere gostija piena sine taro adala čaše hem slavinena sine pumare devlen. Taro jekh puti, pojavingja pe manušikano vas hem počmingja te pišinel čudna lafija ko zido.

O Valtazar but darandilo. Ov vikingja pe magioničaren hem vetingja lenge: „Ako nekoj tumendar vakerela mange so značinena akala lafija, ka kerav le te ovel o trito najmokjno manuš ko Vavilon“. Ola trudingje pe te objasninen o lafija, ama ni jekh lendar našti sine te kerel adava. Ali i carica hem vakergja leske: „Isi jekh manuš so vikinela pe Daniel, ov objasninela sine o bukja e Navuhodonosoreske. Ov šaj te objasninel tuke da so značinena akala lafija“.

O Daniel alo ko cari. O Valtazar vakergja leske: „Ako šaj te čitine hem te objasnine mange akala lafija, ka dav tut jekh zlatno lanco hem ka kerav tut te ove o trito najmokjno manuš ko Vavilon“. O Daniel phengja leske: „Na mangava te de man ništo, ama ka vakerav tuke so značinena akala lafija. Tlo dad, o Navuhodonosor, sine but gordo, ama o Jehova kergja le te ovel ponizno. Tu džanea sa bašo adava, a palem piea taro zlatna čaše taro e Devleskoro hrami. Adaleske o Devel vakerela akala lafija: MENE, MENE, TEKEL hem FARSIN. Akala lafija značinena kaj o Medijcija hem o Persijcija ka osvojnen o Vavilon, a tu nane te ove više cari“.

Ko adava vreme, o manuša mislinena sine kaj o Vavilon našti nikoj te osvojnel le. Akaja diz sine zaštitimi bare zidoncar hem okolu late sine hor reka. Ama, ki isto rat, o Medijcija hem o Persijcija napadingje o Vavilon. O Persisko cari, o Kir, kergja i reka te thavdel ki javer strana hem agjaar o vojnikija šaj sine te resen dži ko e dizjakere porte. Keda i vojska reslja dži ko porte, ola sine phravde! I vojska khuvgja ki diz, osvojngja o Vavilon, hem mudargje e care. Tegani o Kir ulo cari ko Vavilon.

Panda ko prvo berš, o Kir objavingja: „O Jehova vakergja mange te obnovinav leskoro hrami ko Erusalim. Sarine so služinena e Jehovaske, šaj te džan adari hem te pomožinen ako mangena“. Sar so vetingja o Jehova, but Evreija irangje pe ko Erusalim, palo 70 berš otkeda sine uništimi akaja diz. Dali dikhea sar o Jehova koristingja e Kire te šaj te pomožinel ple narodo?