Ko Vavilon ulo javer cari, adava sine o Darij, o Medijco. Ov primetingja kaj o Daniel tano pojaver taro javera. Adaleske čhivgja le te nadgledinel e važna manušen ko carstvo. Ola sine leske but ljubomorna hem mangle te mudaren le. Džanena sine kaj o Daniel molinela pe e Jehovaske sekova dive po trin puti, adaleske phengje e Darijeske: „Care, valjani te ovel zakoni kote so ka pišinel kaj valjani te molinen pe samo tuke. Sekoj so nane te kerel akava, valjani te ovel frdimo ki dupka lavencar.“ E Darijeske svidžingja pe akava hem potpišingja o zakoni.

Keda šungja o Daniel bašo akava, gelo peske khere. Angli jekh phravdi pendžerka, pelo ko kočaka hem molingja pe e Jehovaske. O manuša so sine ljubomorna khuvgje ko leskoro kher hem astargje le sar molinela pe. Sigate gele ko Darij hem vakergje leske: „O Daniel nane tuke poslušno. Molinela pe ple Devleske trin puti ko dive“. O Darij mangela sine e Daniele hem na mangela sine ov te merel. Celo dive razmislinela sine sar te spasinel le. Ama, keda o cari potpišinela sine nesavo zakoni, nikoj našti sine te meninel le, čak ni o cari. Adaleske, naredingja ple manušenge te frden e Daniele ki dupka kote so sine bokhale lavija.

Adaja rat, o Darij sine but sekirimo bašo Daniel hem našti sine te sovel. Sabajle gelo ko Daniel hem vikingja: „Daniel, dali to Devel spasingja tut?“

O Darij šungja glaso. Adava sine o Daniel! Ov vakergja e Darijeske: „E Jehovaskoro angeli phanlja o muja e lavengere. Ola ništo na kergje mange. O Darij sine but radosno! Adaleske naredingja ple slugenge te ikalen e Daniele tari dupka. O Daniel na sine ni pipimo taro lavija. Tegani o cari naredingja: „Frden e manušen so mangle te mudaren e Daniele ki adaja dupka“. Keda frdingje len, o lavija odma hale len.

O Darij bičhalgja akaja naredba ple narodoske: „Sekova manuš valjani te daral taro e Danieleskoro Devel. Ov spasingja e Daniele taro lavija“.

Dali tu da molinea tut e Jehovaske sekova dive sar o Daniel?

I Estira sine Evrejka koja so živinela sine ki persisko diz Suza. Angleder but berša, o Navuhodonosor zarobingja lakere familija hem ingargja len taro Erusalim. Bajrargja la lakoro bratučeti o Mardohej, kova so sine sluga e persisko careske, e Ahasvereske.

O cari, o Ahasver, manglja te birinel peske nevi carica. Leskere sluge angje leske e najšuže čhajen ko celo carstvo, maškar kola sine i Estira da. Taro sa adala, o cari biringja e Estira te ovel carica. O Mardohej vakergja e Estirake te na vakerel kaj tani Evrejka.

Jekh gordo manuš, so vikinela pe sine Aman, sine čhivdo upro sa o knezija. Ov manglja sa o manuša te pokloninen pe leske. Ama, o Mardohej na manglja te kerel adava. O Aman but holjangja hem manglja te mudarel le. Keda o Aman šungja kaj o Mardohej tano Evrei, kergja plani te mudarel sa e Evreen ki phuv. Ov vakergja e careske: „O Evreija tane but opasna. Mora te oslobodina amen lendar. O Ahasver vakergja leske: „Ker adava so mislinea kaj tano najšukar“. Palo adava dengja le vlast te anel zakoni. O Aman angja zakoni te mudaren pe sa o Evreija ko 13-to dive ko masek adar. O Jehova sa adava dikhlja.

I Estira na džanlja bašo adava zakoni. Adaleske o Mardohej bičhalgja lake kopija taro zakoni hem vakergja lake: „Dža ko cari hem ker lea lafi“. I Estira vakergja leske: „Sekoj so ka džal ko cari bizo te ovel vikimo lestar ka ovel mudardo. A mande o cari na vikingja man 30 dive! Ama ka džav. Ako pružinela ki mande plo žezol, ka ačhovav dživdi. A ako na, ka merav“.

I Estira geli anglo cari. Keda dikhlja la, ov pružingja ki late po žezol. Oj ali uzi leste, hem ov pučlja la: „So šaj te kerav baši tute, Estiro?“ Oj vakergja: „Mangava te kaninav tute hem e Amane ki jekh gozba“. Džikote sine ki gozba, oj kaningja len ki panda jekh gozba. Ki adaja gozba, o cari palem pučlja la: „So šaj te kerav baši tute?“ Oj vakergja: „Nekoj mangela te mudarel man hem mle narodo. Molinaja tut, spasin amen“. O cari pučlja la: „Koj mangela te mudarel tumen? Oj vakergja: „Akava lošno Aman!“ O Ahasver doborom holjangja so naredingja odma te mudaren e Amane.

Ama, o zakoni so angja le o Aman našti sine nikoj te poništinel le, čak ni o cari. Adaleske o cari čhivgja e Mardoheje te ovel upro knezija hem dengja le vlast te anel nevo zakoni. O Mardohej angja zakoni kaj o Evreija šaj te braninen pe keda ka oven napadime. Ko 13-to dive taro masek adar, o Evreija pobedingje pumare dušmanen. Ottegani, ola sekova berš slavinena sine akaja pobeda.