Dali o Devel koristingja i evolucija te šaj te stvorinel o različna životna oblikija?
So vakerela i Biblija:
Na. I Biblija jasno vakerela kaj o Devel stvoringja e manušen, hem sa o različna „vrste“ rastenija hem životne (1. Mojseeva 1:12, 21, 25, 27; Otkrovenie 4:11).a Oj vakerela kaj sa o manuša avena taro Adam hem tari Eva, amare prva roditelija (1. Mojseeva 3:20; 4:1). Isi jekh teorija pendžardi sar „teističko evolucija“, koja so vakerela kaj o Devel preku i evolucija stvoringja o različna životna vrste. Ama, i Biblija na poddržinela akaja teorija. Sepak, i Biblija na protivinela pe e naučno dokazencar kaj isi varijacie ki sekoja životno vrsta.b
Dali o Devel koristingja evolucija keda stvoringja?
Ko izraz „teističko evolucija“ tane vklučime poviše teorie bašo adava sar sine stvorimo o sveto. Sprema jekh enciklopedija, jekh taro teorie vakerela kaj o Devel koristingja i prirodno selekcija sar jekh način džikote stvoringja (Encyclopædia Britannica).
Javera teorie soj vklučime ki teističko evolucija tane:
Sa o dživde organizmija avena taro jekh životno oblik kova so živinela sine but odamna.
Jekh životno oblik šaj te evoluirinel ko celosno javer životno oblik, hem akava tano pendžardo sar mikroevolucija.
Ko nesavo način o Devel pottikningja akala procesija.
Dali o izveštaija tari Biblija šaj te objasninen pe evolucijaja?
O sikljojbe baši teističko evolucija sikavela kaj o biblisko izveštaj bašo stvoribe nane celosno točno. Ama, o Isus kergja lafi bašo nastanija tari 1. Mojseeva sar istoriska dokazija (1. Mojseeva 1:26, 27; 2:18-24; Matej 19:4-6). Ki Biblija pišinela kaj angleder te avel ki Phuv, o Isus živinela sine ko nebo hem zaedno e Devlea stvoringja sa so postojnela (Jovan 1:3). Sprema adava, i teorija kaj o Devel koristingja evolucija te stvorinel sa o životna oblikija nane biblisko sikljojbe.
Dali adava so o rastenija hem o životne tane sposobna te prilagodinen pe tano dokaz kaj evoluiringje ki javer vrsta?
I Biblija na kerela lafi bašo adava kobor varijacie šaj te ikljon tari jekh vrsta. Isto agjaar, na protivinela pe kaj isi šanse ki jekh vrsta životne ili rastenija te pojavinen pe varijacie te šaj te prilagodinen pe ko neve okolnostija. Iako nesave vakerena kaj asavko prilagodibe tano dokaz baši evolucija, našti te vakerel pe kaj ko asavko način ule neve vrste.
a O lafi „vrsta“ so koristinela pe ki Biblija isi le poviše značenje, nego o isto lafi so koristinena le o naučnikija. Osven adava, o naučnikija ponekogaš vakerena kaj nesavi vrsta evoluiringja ki nevi. Ama, adava tano ustvari varijacija ki isto vrsta, hem asavko haljojbe tano ko sklad adalea sar koristinela pe o lafi „vrsta“ ki 1. Mojseeva.
b Akava koncept tano pendžardo sar mikroevolucija.