Dali džanljan?
Soske sine šukar so o Jehova prifatinela sine sar žrtva duj različna vrste čiriklja?
SPREMA o Zakoni, hem o grlice hem o gulubija šaj sine te den pe sar žrtva e Jehovaske. Akala duj čiriklja sekogaš spomninena pe sine zaedno ko zakoni bašo žrtve hem jekh izraelco šaj sine te del sar žrtva bilo koja lendar (3. Moj. 1:14; 12:8; 14:30). Soske sine akava šukar? Jekh pričina sine adaja so našti sine lokhe te arakhel pe grlice. Soske?
Grlica
O grlice na ačhovena ko jekh than, ola arakhljovena ko Izrael ko masekija keda tano tato. Ama keda avela o masek oktomvri ola džana ko potate phuvja ko jug hem palem iranena pe ko Izrael keda počminela o prolet (Pesna 2:11, 12; Erem. 8:7). Adava značinela kaj ko purano vreme ko jeven jekhe Izraelcoske sine pharo te del sar žrtva jekh grlica.
Divo gulubi, pešterniko
Tari javer strana o gulubija obično ačhovena ko jekh than hem adaleske o Izraelcija šaj sine ko celo berš lokhe te astaren gulubija. Osven adava, o Izraelcija arakhena sine gulubija khere. (Sporedin Jovan 2:14, 16.) Sprema jekh lil bašo bibliska rastenija hem životne, „ko sa o gava hem dizja ki Palestina o manuša arakhena sine gulubija. Sekova izraelco so arakhela sine gulubija sine le kjumezi, ili kerela sine dupka ko zido te šaj o gulubija athe te živinen“ (Bible Plants and Animals). (Sporedin Isaija 60:8.)
Gulubi ki jekh dupka ko zido
O Jehova sikavgja kaj tano ljubezno hem razumno adalea so prifatingja te den pe sar žrtve čiriklja kola so o Izraelcija šaj sine lokhe te arakhen len ko bilo savo vreme taro berš.