Pomoš okolenge so doživinena nasilstvo ki familija

„O nasilstvo upro džuvlja tano problemi ko celo sveto kova so širinela pe sar epidemija. Adaleske tano važno te kerel pe nešto te šaj te čhinavel pe akava“, vakerela i Svetsko zdravstveno organizacija. Akaja organizacija proceninela kaj 30 posto „taro sa o džuvlja so sine ko brako ili ki vrska doživingje fizičko hem/ili seksualno nasilstvo“ taro lengoro partneri. A ko jekh izveštaj taro ON proceninela pe kaj jekhe beršeske, sekova dive, po 137 džuvlja sine mudarde taro lengoro partneri ili nekastar tari familija.a

I statistika šaj sikavela kobor tano baro akava problemi, ama ni najhari našti te opišinel i emocionalno hem i fizičko dukh so sekoja žrtva doživinela la.

Dali doživinea nasilstvo ki familija? Ili, dali pendžarea nekas so doživinela akava? Ako tano agjaar, dikh akala misle tari Biblija so šaj te pomožinen tuke.

Tu na sian krivo

Šaj te dobine pomoš

Na sian korkori

Jekh dive nane više te ovel nasilstvo ki familija

Sar šaj te pomožine nekaske so doživinela nasilstvo ki familija

Tu na sian krivo

So vakerela i Biblija: „Sekova jekh amendar mora peske te odgovorinel anglo Devel“ (Rimjanja 14:12).

Ma bistre: Okova so maltretirinela tut tano odgovorno bašo ple postapke.

Ako tlo partneri vakerela kaj tu sian krivo bašo adava so ov tano tuja nasilno, adava nane točno. O romnja zaslužinena te oven mangle, a na maltretirime (Kološanja 3:19).

Nesave taro adala so maltretirinena pumare partneren šaj isi len psihička problemija, šaj barile ki familija kote so sine nasilstvo ili šaj tane alkoholičarija. Bizi razlika koja tani i pričina, okova so maltretirinela tut tano odgovorno anglo Devel bašo adava sar postapinela tuja. Hem mora te kerel sa so valjani te šaj te meninel pe.

Šaj te dobine pomoš

So vakerela i Biblija: „O planija uspejnena keda isi but sovetnikija“ (Izreki 15:22).

Ma bistre: Ako na osetinea tut bezbedno ili na džanea so te kere, o javera šaj te pomožinen tuke.

Soske valjani tuke pomoš taro javera? O nasilstvo ki familija nane ednostavno problemi. Šaj ka ovel tuke pharo te odlučine soj tano najšukar te kere džikote razmislinea bašo akala bukja:

• Tli lično bezbednost

• So ka ovel najšukar tle čhavenge

• Tli finansisko situacija

• O mangipe sprema tlo partneri

• Šaj ka mange te spasine i vrska tle partnerea ako ov meninela pe

Normalno tano ako osetinea tut bunimi hem ako i situacija izgledinela tuke but komplicirano. Kastar šaj te rode pomoš?

Nesavo amal ili nekoj tari familija koleste so isi tut doverba šaj praktično te pomožinel tuke hem te poddržinel tut ko emocionalno pogled. Adava so ka kere lafi nekasaja so grižinela pe tuke, šaj but te pomožinel tut.

O SOS telefonska broja bašo žrtve so doživinena nasilstvo ki familija, šaj te pomožinen tuke ko sekova vreme. Okola so kerena buti athe šaj te den tut predlogija sar te zaštitine tut. Ako tlo partneri priznajnela plo problemi hem iskreno mangela te meninel pe, o SOS broja šaj te pomožinen leske te kerel o prva čekorija bašo adava.

Javera itna službe šaj te pomožinen tuke ako arakhljovea ki opasno situacija. Ko asavke službe tane vklučime doktorija, medicinska sestre hem javera stručna manuša.

Na sian korkori

So vakerela i Biblija: „O Jehovab tano paše uzo adala soj phage vilea hem spasinela adalen soj phage duhoja“ (Psalm 34:18).

Ma bistre: O Devel vetinela kaj ka pomožinel tuke.

O Jehova čače grižinela pe tuke (1. Petareskoro 5:7). Ov haljola tle najhor misle hem čuvstvija. Šaj te utešinel tut preku plo Lafi, i Biblija. Hem, mangela te moline tut leske. Keda molinea tut, šaj te rode lestar mudrost hem sila te šaj te ikljove ko krajo e situacijaja kolate so arakhljovea (Isaija 41:10).

Jekh dive nane više te ovel nasilstvo ki familija

So vakerela i Biblija: „Sekova jekh ka bešel teli pli drakh hem teli pli smokva hem nikoj nane te daravkerel len“ (Mihej 4:4).

Ma bistre: I Biblija vetinela kaj panda hari ka avel vreme keda sekova jekh ka osetinel baro mir ko plo kher.

Samo o Devel o Jehova šaj celosno hem zasekogaš te rešinel amare problemija. I Biblija vetinela: „Ov ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha“ (Otkrovenie 21:4). Ko adava vreme, nane više te setina amen ko lošna bukja so doživingjem len, namesto adava ka šaj te radujna amen ko šuže momentija (Isaija 65:17). I Biblija vetinela kaj tute da šaj te ovel tut asavki šuži idnina.