Keda ka vladinel e Devleskoro Carstvo „ka ovel baro mir“

Panda hari e Devleskoro Carstvo, kova so adžikeraja le but berša, i vlada koja so kergja la o Devel ka anel mir ki celi phuv hem o manuša ka živinen ko jekhipe hem sloga. I Biblija vakerela: „Ka ovel baro mir“ (Psalm 72:7). Ama, keda hem sar o Carstvo ka vladinel upri celi phuv? Hem, so šaj adava te značinel tuke?

KEDA KA AVEL E DEVLESKORO CARSTVO?

I Biblija prorokujngja kaj valjani te slučinen pe nesave bukja, kola so ka oven znako kaj panda hari ka avel e Devleskoro Carstvo. Ka oven vojne ko razna thana, bokhalipe, nasvalipe, bare zemjotresija hem but manuša ko celo sveto nane te ikeren pe ko zakonija (Matej 24:3, 7, 12; Luka 21:11; Otkrovenie 6:2-8).

Jekh javer proroštvo vakerela: „Ko posledna dive ka ovel but pharo vreme. Soske o manuša ka mangen korkori pes, ka mangen o pare... nane te šunen ple roditelen, nane te oven blagodarna, nane te oven verna, nane te mangen ple familija, nane te oven spremna bašo bilo savo dogovor, klevetnikija, nane te kontrolirinen pe, surova, nane te mangen o šukaripe... gorda, ka mangen o zadovolstvija, a na e Devle“ (2. Timotej 3:1-4). Točno tano kaj sekogaš sine nesave manuša so sine len asavke osobine. Ama, avdive pobaro delo taro manuša tane asavke.

Akala proroštvija počmingje te ispolninen pe ko 1914 berš. But istoričarija, državnikija hem pisatelija pišingje kaj o sveto palo adava berš but meningja pe. Na primer, o dansko istoričari Peter Munk pišingja: „I vojna ko 1914 berš but meningja i manušikani istorija. Taro jekh vreme kote so džala sine sa šukar... khuvgjem ko veko kote so isi katastrofe, lošnipa, omraza hem vreme kote so na siem bezbedna“.

Ama, sar so palo bršim avela o kham, agjaar o lošna uslovija so isi avdive ko sveto sikavena kaj panda hari ka avel nešto pošukar — e Devleskoro Carstvo ka vladinel upri celi phuv. Ustvari, o Isus spomningja jekh pozitivno buti koja soj tani delo taro znako bašo posledna dive. Ov vakergja: „Akava šukar haberi bašo Carstvo ka propovedinel pe ko celo sveto, te šaj o manuša taro sa o narodija te šunen le, hem tegani ka avel o krajo“ (Matej 24:14).

Adava šukar haberi bašo Carstvo tani i glavno poraka so propovedinena e Jehovaskere svedokija. Ustvari o anav da lengere glavno spisanieskoro tano Stražarsko kula objavinela e Jehovaskoro Carstvo. Ki leste but puti kerela pe lafi bašo but šukar bukja so e Devleskoro Carstvo ka kerel len e manušenge hem e phuvjake.

SAR E DEVLESKORO CARSTVO KA VLADINEL UPRI CELI PHUV?

Ko odgovor bašo akava pučibe tane vklučime akala štar važna bukja:

1. O Carstvo nane te koristinel avdisutne politička vodačen džikote vladinela.

2. O politička vodačija nane te mangen te otkažinen pe tari pli vlast hem ka mangen te protivinen pe bašo e Devleskoro Carstvo, ama nane te uspejnel lenge adava (Psalm 2:2-9).

3. E Devleskoro Carstvo ka uništinel sa o manušikane vlade kola so ka mangen ponadari da te vladinen upro manuša (Daniel 2:44; Otkrovenie 19:17-21). Akaja posledno vojna, koja so ka ovel ko celo sveto, vikinela pe Armagedon (Otkrovenie 16:14, 16).

4. Sa adala so ka prifatinen e Devleskoro Carstvo ka oven spasime ko Armagedon hem ponadari da ka živinen ko jekh sveto kote so ka ovel mir. Ola ka oven delo taro „baro mnoštvo“ soj spomnimo ki Biblija, koleste so verojatno ka oven milionja manuša (Otkrovenie 7:9, 10, 13, 14).

SO ŠAJ TE ZNAČINEL E DEVLESKORO CARSTVO TUKE?

Te šaj te ovel nekoj delo taro e Devleskoro Carstvo, prvo valjani te ovel le pendžaribe. Ustvari, o Isus vakergja e Devleske ki molitva: „Te šaj [e manušen] te ovel len večno životo valjani šukar te pendžaren tut, e jekhe čačutne Devle, hem okole so bičhalgjan le, o Isus Hristos“ (Jovan 17:3).

Ako šukar pendžarea e Devle e Jehova sar ličnost, adava ka koristinel tuke ko but bukja. Te dikha duj. Prvo, ka ovel tut zorali vera ki leste. Asavki vera koja so temelinela pe ko dokazija, ka uverinel tut kaj e Devleskoro Carstvo tani čačutni vlada koja so panda hari ka vladinel ki phuv (Evreija 11:1). Dujto, tlo mangipe sprema o Devel hem sprema o pašutne sa poviše ka bajrol. Tlo mangipe sprema o Devel ka pottikninel tut te ove leske poslušno taro vilo. A o mangipe sprema o pašutne ka motivirinel amen te primenina o pendžardo Zlatno pravilo kova so dengja le o Isus keda vakergja: „Sa so tumen mangena o manuša te keren tumenge, agjaar keren tumen da lenge“ (Luka 6:31).

Sar jekh dad so mangela ple čhaven, amaro Stvoriteli da mangela amenge o najšukar. Ov mangela te dobina „o čačutno životo“ (1. Timotej 6:19). Avdive nane amen „o čačutno životo“ bašo kova so kerela lafi i Biblija. Poviše manuša sekova dive borinena pe te preživinen. Ama, savo ka ovel „o čačutno životo“? Te dikha samo nesave taro šuže bukja so e Devleskoro Carstvo ka kerel len e manušenge.