8 LEKCIJA
Reslja o Mesija
POBUTER taro 500 berša palo e Danieleskoro proroštvo, e Devleskoro meljaiko o Džebraili alo ki jekh terni čhaj i Mejrema (Marija), koja so sine tari e Dauteskiri familija. Ov vakergja lake: „Šukar dive, tu kolake so i sikavdo baro šukaripe, o Jehova tano tuja“ (Luka 1:28). Ama, i Mejrema darandili. So značinena sine adala lafija?
O Džebraili vakergja e Mejremake kaj ka bijanel e Mesija
O meljaiko vakergja lake: „Marija, ma dara, soske arakhljan milost anglo Devel. Ake, ka ačhove khamni hem ka bijane murš čhavo. Ka čhive leske o anav Isus... o Jehova o Devel ka del le o prestol leskere dadeskoro e Davideskoro... hem leskere carstvoske nane te avel krajo“ (Luka 1:30-33). Savo šužo haberi! I Mejrema ka bijanel e Mesija, o „potomstvo“ so but berša adžikerena le sine!
Palo nesavo vreme, o Isa bijandilo ko Vitleem. Adaja rat, jekh meljaiko vakergja e pastirenge: „Ake, anava tumenge šukar haberi so anela bari bah... soske avdive ki e Davideskiri diz bijandilo tumenge Spasiteli — o Hristos, o Gospodari“ (Luka 2:10, 11). Palo adava, e Isaskiri familija geli ko Nazaret kote so ov barilo.
Ko 29 berš amari era — o berš keda valjangja te pojavinel pe o Mesija — o Isa počmingja te služinel sar e Devleskoro pekamberi, tegani sine le „paše trijanda berš“ (Luka 3:23). But manuša halile kaj ov sine bičhaldo taro Devel. Ola vakergje: „Baro proroko iklilo maškar amende“ (Luka 7:16, 17). Ama bašo so sikavela sine o Isa e manušen?
O Isa sikavela sine e manušen te mangen e Devle hem te služinen leske. Ov vakergja: „O Jehova, amaro Devel, tano jekh Jehova, hem mang e Jehova, te Devle, sa te vilea, sa te dušaja, sa te gogjaja, hem sa te silaja“ (Marko 12:29, 30). Ov isto agjaar vakergja: „E Jehova, te Devle, obožavin le hem služin samo leske“ (Luka 4:8).
O Isa ohrabringja e manušen te mangen pe jekh jekhea. Ov vakergja: „Mang te pašutne sar korkori tut“ (Marko 12:31). Ov isto agjaar vakergja: „Sa so tumen mangena o manuša te keren tumenge, keren tumen da lenge. Adava vakerena o Zakon hem o Prorokija“ (Matej 7:12).
O Isa dengja pestar sa te vakerel e javerenge bašo e Devleskoro Carstvo. Ov vakergja: „Me valjani te vakerav o šukar haberi bašo e Devleskoro Carstvo, soske adaleske sium bičhaldo“ (Luka 4:43). Soske e Devleskoro Carstvo tano doborom važno?
E Devleskoro Lafi vakerela kaj adava Carstvo tano vlada ko nebo so ka vladinel upri Phuv. Ko adava Carstvo o Devel čhivgja e Isa o Mesija, te ovel Cari. O pekamberi o Daniel pišingja kaj ko nebo o Devel ka del e Mesijaske „vlast, čest hem carstvo“ (Daniel 7:14). E Devleskoro Carstvo ka kerel celi Phuv te ovel dženeti hem ka nagradinel e Devleskere slugen večno dživdipaja. Nane li akava najšužo haberi?