Ki amari organizacija nane amen platime učitelija. Namesto adava, isto sar ko sobranie taro prvo veko, avdive da tane čhivde nadglednikija te grižinen pe bašo e Devleskoro sobranie (Dela 20:28). Akala starešine tane duhovno zrela murša kola so vodinena o sobranie hem grižinena pe leske, ,na so mora, nego adaleske so mangena; na bašo love, nego celo vilea‘ (1. Petrovo 5:1-3). So kerena ola amenge?

Grižinena pe amenge hem zaštitinena amen. O starešine dena sovetija tari Biblija hem pomožinena e sobranieske te ačhol paše e Jehovaja. Adaleske so džanena kaj o Jehova dengja len akaja važno zadača ola na mangena te keren pe glavna maškar e Devleskoro narodo, nego, anena dži ko adava sarinenge te ovel šukar hem te oven bahtale (2. Korinkjanite 1:24). Isto sar so jekh manuš so arakhela bakhren šukar grižinela pe sekole bakhreske, agjaar o starešine trudinena pe te grižinen pe sekaske ko sobranie (Izreki 27:23).

Sikavena amen sar te kera e Devleskiri volja. Sekova kurko, o starešine vodinena o sobraniska sostanokija te šaj te ovel zorali amari vera (Dela 15:32). Akala verna murša isto agjaar tane primer bašo propovediba, džana amencar ki služba hem sikavena amen sar pošukar te sikava e javeren.

Ola ohrabrinena sekas amendar. Te šaj te pomožinen sekole amendar te ovel popaše e Jehovaja, o starešine taro amaro sobranie šaj te aven amende khere ili ki dvorana te keren amencar lafi te šaj te den amen pomoš hem uteha tari Biblija (Jakov 5:14, 15).

O starešine grižinena pe na samo e sobranieske, nego isto agjaar, pobuter lendar džana ki buti hem grižinen pe ple familijake. Adaleske, amen valjani te počitujna len (1. Solunjanite 5:12, 13).

• So kerena o starešine ko sobranie?

• Sar o starešine sikavena kaj grižinena pe sekaske amendar?

Tari Biblija dikhaja kaj o ,nadglednikija hem o sluge pomošnikija‘ grižinena pe bašo sobranie (Filipjanite 1:1). Ko sekova sobranie isi nekobor asavke phralja so služinena. Save zadače isi e sluge-pomošnikon?

Ola pomožinena e starešinenge. O sluge-pomošnikija, terne ili phure, tane duhovno zrela phralja hem šukar kerena ple zadače. Ola kerena važna zadače so mora te keren pe ko sekova sobranie. Adaleske, e starešinenge tano polokho hem isi len pobuter vreme te keren pli zadača te sikaven hem te grižinen pe e phralenge.

Ola tane korisna ko sobranie. Nesave sluge-pomošnikija služinena sar redarija te dodžaren okolen so avena ko sostanok. Javera služinena ko ozvučuvanje, delinena literatura, grižinena pe bašo sobraniska smetke ili dena podračja baši služba e phralenge hem e phenjenge ko sobranie. Ola, isto agjaar, pomožinena te održinel pe i dvorana. O starešine šaj te pučen len te pomožinen e pophurenge. O sluge-pomošnikija tane spremna te keren sekoja žadača so i lenge dendi, a o sobranie počitujnela len adaleske so spremno služinena (1. Timotej 3:13).

Ola tane šukar primer ko sobranie. O sluge-pomošnikija tane birime adaleske so isi len šukar hristijanska osobine. Ola bajrarena amari vera keda isi len učestvo ko sostanokija. Ola tane primer bašo propovedibe hem agjaar kerena te ova porevna. Adaleske so ola složno kerena buti e starešinencar, anena dži ko adava te ovel radost hem edinstvo (Efešanite 4:16). Sar so nakhela o vreme, ola da šaj te pheren o uslovija te služinen sar starešine.

• Save tane o sluge-pomošnikija?

• Sar ola pomožinena ko sobranie?

Ko Hristijanska grčka spisija but puti pišinela bašo Varnava hem o apostol Pavle. Ola služinena sine sar pokrainska nadglednikija hem posetinena sine o prva sobranija. Soske? Adaleske so čače interesinena pe sine te ovel šukar lengere duhovno phralenge hem phenjenge. O Pavle vakergja kaj mangela te ,iranen pe hem te posetinen e phralen‘ te dikhen sar tane. Ov sine spremno te nakhavel but baro drumo te šaj te ohrabrinen len (Dela 15:36). Isto adava kerena avdive o pokrainska nadglednikija.

Ola avena te ohrabrinen amen. Sekova pokrainsko nadgledniko duj puti ko berš posetinela okolu 20 sobranija hem ko sekova ačhovela po jekh kurko. Šaj but te sikljova lendar hem lengere romnjendar, ako tane prandime. Ola trudinena pe te zapoznajnen sarinen, ternen hem phuren, hem but mangena te aven amencar ko podračje hem ko amare bibliska studie. Akala nadglednikija, zaedno e starešinencar taro sobranie, džana ko phralja te pomožinen len te oven duhovno zorale hem ohrabrinena amen ple govorencar ko sostanokija hem ko kongresija (Dela 15:35).

Ola grižinena pe sarinenge. Ola čače interesinena pe baši sarinengiri duhovnost ko sobranie. Khedena pe e starešinencar hem e sluge-pomošnikoncar te dikhen sar duhovno napredujnela o sobranie hem dena len sovet sar šaj panda pošukar te keren ple zadače. Ola pomožinena e pioneren te oven pošukar ki služba hem isto agjaar but mangena te zapoznajnen e neven ko sobranie hem te šunen sar ola duhovno napredujnena. Sekova taro akala phralja spremno mangela te služinel bašo e phralengoro šukaripe (2. Korinkjanite 8:23). Amen da valjani te ovel amen sar lengiri vera hem te šuna e Devle ko sa (Evreite 13:7).

• Soske o pokrainska nadglednikija posetinena o sobranija?

• So šaj te sikljova taro lengere posete?

Keda ovena prirodna katastrofe, e Jehovaskere svedokija sigate organizirinena pe te pomožinen ple phralenge ko adava than. Adava sikavela kaj čače mangaja amen jekh jekheja (Jovan 13:34, 35; 1. Jovanovo 3:17, 18). Sar pomožinaja?

Pomožinaja lovencar. Keda sine baro bokhalipe ki Judea, o prva hristijanija tari Antiohija bičhalge love ple duhovna phralenge (Dela 11:27-30). Isto sar lende, keda šunaja kaj amare phralja ko disave thana tane ki nevolja, amen preku amaro sobranie bičhalaja dobrovolna prilogija te šaj te ovel len adava so valjani lenge (2. Korinkjanite 8:13-15).

Džaja adari te pomožina. O starešine ko thana kote so uli i katastrofa rodena te arakhen sekole taro sobranie te dikhen dali sarine tane šukar. Šaj te kerel pe odbor baši pomoš so ka organizirinel te ovel hajbaske, čisto pani pibaske, šeja, than sojbaske hem medicinsko pomoš. But Svedokija džana ko plo trošako te pomožinen ili te poprajnen e phralengere khera hem o dvorane. Adaleske so siem složna sar organizacija hem so isi amen iskustvo te kera zaedno buti, šaj sigate te pomožina keda valjani. Iako pomožinaja ,amare phralenge ki vera‘, keda šaj, amen pomožinaja javerenge da taro javera religije (Galatite 6:10).

Daja uteha tari Biblija hem ohrabrinaja len. Posebno valjani uteha okolenge so nakhle nesavi katastrofa. Ko asavko pharo vreme ,o Devel sekole utehakoro‘, o Jehova, šaj te del amen sila (2. Korinkjanite 1:3, 4). Sa okolenge so i bizi nadež amen spremno vakeraja bašo adava so o Devel vetinela hem uverinaja len kaj e Devleskoro Carstvo ka anel krajo sa e prirodna katastrofenge so anena dukh hem pharipa (Otkrovenie 21:4).

• Soske e Jehovaskere svedokija šaj sigate te pomožinen keda isi prirodna katastrofe?

• Savi uteha tari Biblija šaj te da okolenge so nakhle nesavi katastrofa?

Nekobor dive angleder te merel, o Isus sine korkori ko jekh than ple štare učenikoncar — e Petarea, e Jakovea, e Jovanea hem e Andrejea. Keda vakergja kova ka ovel o znako baši leskiri prisutnost ko posledna dive, ov pučlja jekh but važno pučibe: ,Koj tano o verno hem razborito robo kaste so leskoro gospodari čhivgja le upro ple sluge te del len hrana ko pravo vreme?‘ (Matej 24:3, 45; Marko 13:3, 4). O Isus uveringja ple učenikon kaj ov sar lengoro ,gospodari‘ ka birinel okolen so redovno ka den duhovno hrana leskere učenikonge ko posledna dive. Koj tano o ,verno hem razborito robo‘?

Ov tano jekh tikni grupa kerdi taro e Isuseskere pomazime učenikija. O Vodečko telo e Jehovaskere svedokongoro tano o ,robo‘. Ov dela duhovno hrana ko pravo vreme okolenge so služinena e Jehovaske. Amen zavisinaja taro adava verno robo so poodorig da dela amen ,hrana ko pravo vreme‘ (Luka 12:42).

Ov grižinela pe e Delveskere khereske (1. Timotej 3:15). O Isus dengja e ,verno hem razborito roboske‘ bari zadača te grižinel pe sa e bukjenge povrzime e Jehovaskere organizacijaja ki Phuv — te grižinel pe bašo materijalna bukja so isi la, te organizirinel o propovediba hem te sikavel amen preku amare sobranija. Te šaj te del amen baš adava so valjani amenge ko pravo vreme ,o verno hem razborito robo‘ delinela duhovno hrana preku o publikacie so koristinena amenge ki amari služba hem preku o govorija so ikerena pe ko amare sostanokija hem kongresija.

O robo tano verno ko adava so sikavela i Biblija hem ki zapoved te svedočinel o šukar haberi. Ov tano razborito adaleske so mudro grižinela pe sa e bukjenge ki Phuv so o Isus mukhlja leske te grižinel pe (Dela 10:42). Adava so sa pobuter manuša prifatinena o čačipe hem so dobinaja but duhovno hrana sikavela kaj o Jehova blagoslovinela adava so o robo kerela (Isaija 60:22; 65:13).

• Kaste čhivgja o Isus te del duhovno hrana pe učenikonge?

• Sar sikavela o robo kaj tano verno hem razborito?

Ko prvo veko jekh tikni grupa — o ,apostolija hem o starešine ko Erusalim‘ — služinela sine sar vodečko telo hem anela sine važna odluke bašo celo hristijansko sobranie taro pomazanikija (Dela 15:2). Angleder te anen nesavi odluka ola dikhena sine so vakerela i Biblija baši adaja buti hem mukhena sine te vodinel len e Jehovaskoro duho (Dela 15:25). Agjaar kerela pe avdive da.

O Devel kerela pli volja preku o Vodečko telo. O pomazime phralja so služinena ko Vodečko telo hor proučinena i Biblija hem isi len baro iskustvo sar šaj te kera amari služba e Jehovaske hem sar te rešinen disave pučiba bašo duhovna bukja. O Vodečko telo khedela pe sekova kurko te dikhel so valjani e phralenge ko celo sumnal. Isto sar ko prvo veko, ola dena sovetija tari Biblija preku pismija, preku o patuvačka nadglednikija hem javera phralja. Akava pomožinela sa e Devleskere slugenge te oven jekh ko adava so mislinena hem so kerena (Dela 16:4, 5). O Vodečko telo grižinela pe te ovel spremimi i duhovno hrana, ohrabrinela amen te čhiva ko prvo than o propovediba hem grižinela pe te oven dende odgovornostija e phralenge.

O Vodečko telo mukhela te vodinel le e Devleskoro duho. O Vodečko telo bašo sa rodela vodstvo taro Najbaro, o Jehova, hem taro e sobranieskoro Poglavari, o Isus (1. Korinkjanite 11:3; Efešanite 5:23). Adala so i ko Vodečko telo na mislinena kaj tane glavna maškar e Devleskoro narodo. Ola, isto sar o javera pomazanikija ki Phuv, ,džana palo o Bakhro [o Isus] bilo kaj te džal‘ (Otkrovenie 14:4). O Vodečko telo ceninela keda molinaja amen lenge.

• Koj sine ko vodečko telo ko prvo veko?

• Sar o Vodečko telo avdive rodela te ovel vodimo taro Devel?

Ki Hebrejsko čhib Betel značinela „Devleskoro kher“ (1. Mojseeva 28:17, 19, fusnota). Akava anav phiravena sa o zgrade so isi e Jehovaskere svedokon ko celo sumnal kolendar so vodinela pe hem pomožinela pe te kera amari služba. O Vodečko telo služinela tari glavno kancelarija e Jehovaskere svedokongiri so arakhljola ko Njujork (SAD) hem adathar vodinela i buti so kerela pe ko podružnice ko but phuvja. Sar grupa, adala so služinena ko Betel tane pendžarde sar Betelsko familija. Ola dživdinena hem kerena buti zaedno, hana zaedno, hem zaedno proučinena i Biblija (Psalm 133:1).

Posebno than kote so i Betelsko familija služinela celo vilea. Ko sekova Betel isi murša hem džuvlja so spremno kerena e Devleskiri volja hem dena sa po vreme bašo Carstvo (Matej 6:33). Nijekh lendar na lela plata, ama sarinenge tane obezbedime nekobor bukja — soba, hajbaske, hem tikni suma love te učharen plo lično hardži. Sarinen ko Betel isi len nesavi zadača. Nesave kerena buti ki kancelarija, ki kujna ili ki trpezarija. Javera kerena buti ko than kote so pečatinena pe lila, thovena pe šeja ili čistinena hem održinena o Betelska zgrade ili disave javera zadače.

Than kote so kerela pe but buti te šaj te propovedinel pe o Carstvo. I glavno cel ko sekova Betel tani so pobuter manuša te džanen o čačipe tari Biblija. Akaja brošura tani jekh primer bašo adava. Celo pišibe akale brošurakoro sine vodimo taro Vodečko telo, palo adava sine kompjuterski bičhaldi ko but timija so prevedinena ko celo sumnal, pečatimi ko nekobor betelska pečatnice hem ko krajo bičhaldi ko pobuter taro 110.000 sobranija. Adalea so kerena sa akava, o betelska familie but pomožinena te kerel pe i najvažno zadača — te propovedinel pe o šukar haberi (Marko 13:10).

• Koj služinela ko Betel hem kola bukja tane lenge obezbedime?

• Ki koja važno zadača pomožinela sekoja buti so kerela pe ko Betel?

Sarinen tari betelsko familija isi len različna zadače hem pomožinena te šaj te propovedinel pe ki jekh ili ko nekobor phuvja. Ola služinena ko preveduvačka timija, pečatinena spisanija hem lila, redinena i literatura ko betelsko magacini, kerena audio hem video snimke, ili grižinena pe javere bukjenge so i potrebna ko adava podračje.

O Odbor e podružnicakoro tano odgovorno baši buti so kerela pe ki late. O Vodečko telo ki sekoja podružnica birinela jekh Odbor e podružnicakoro ko kova so služinena trin ili pobuter sposobna starešine. Akava Odbor redovno dela e Vodečko teloske izveštaj sekole phuvjake baši koja tano odgovorno — sar napredujnela duhovno hem save problemija šaj isi ki late. Adala izveštaija pomožinena e Vodečko teloske te odlučinel baši koja tema te kerel pe lafi ko neve publikacie, ko sostanokija hem ko kongresija. Phralja bičhalde taro Vodečko telo redovno posetinena o podružnice hem dena sovetija e Odborenge sar te keren pumare zadače (Izreki 11:14). Ki adaja poseta adava phral ikerela jekh govor kolea so ohrabrinela e phralen taro adava than.

Pomožinela pe e sobranienge. O odgovorna phralja tari podružnica odobrinena te keren pe neve sobranija. Isto agjaar, dena upatstva e pionerenge, misionerenge hem e pokrainsko nadglednikonge so služinena ko adava podračje. Ola organizirinena o kongresija hem o sobirija, grižinena pe te oven kerde neve dvorane hem bičhalena literatura kobor so valjani sekole sobranieske. Sa so kerela pe ki podružnica pomožinela te ova organizirime ko propovedibe (1. Korinkjanite 14:33, 40).

• Sar o Odbor e podružnicakoro pomožinela e Vodečko teloske?

• Bašo kola bukja grižinela pe i podružnica?

Te šaj najšukar te propovedina o ,šukar haberi sekole narodoske, plemeske, čhibjake hem manušeske‘, isi amen literatura ko pobuter taro 750 čhibja (Otkrovenie 14:6). Sar resaja sa adava te kera? Agjaar so ko celo sumnal isi amen manuša so pišinena amari literatura hem preveduvačija so prevedinena la — sarine tane e Jehovaskere svedokija.

Oj tani prvo pišimi ki anglisko čhib. O Vodečko telo nadgledinela i buti so kerela o Oddel pišibaske ki amari glavno kancelarija kotar so vodinela pe o propovedibe ko celo sumnal. Akava Oddel dela zadače okolenge so pišinena i literatura so služinena ki glavno kancelarija ili ko nekobor javera podružnice. Adaleske so o phralja so pišinena amari literatura tane taro različna kulture, ki late isi teme so interesinena različna manušen.

Oj bičhalela pe te prevedinel pe. Keda o anglisko teksto tano gotovo hem proverimo, ov tano kompjuterskri bičhaldo dži ko preveduvačka timija ki celo Phuv, kola so prevedinena, proverinena hem popravinena o prevedimo teksto. Ola trudinena pe te arakhen ,točna lafija bašo čačipe‘ te šaj točno te prevedinen i smisla taro anglisko teksto ki lengiri čhib (Propovednik 12:10).

O kompjuterija pomožinena te prevedinel pe posigate. O kompjuterija našti te zameninen e manušen so pišinena hem so prevedinena. Ama, adala manuša šaj posigate te keren pli buti adaleske so koristinena kompjuterska rečnikija hem razna programe so pomožinena polokhe te arakhen adava so rodena. E Jehovaskere svedokija kerge jekh kompjutersko programa — MEPS (Multilanguage Electronic Publishing System) — koja šaj te koristinel pe ko but čhibja. Adathe čhivela pe o prevedimo teksto, spoinela pe slikencar, hem spreminela pe te šaj te ovel pečatimo.

Soske doborom trudinaja amen te prevedina ko but čhibja, čak ko čhibja so kerena lafi nekobor milja manuša? Adaleske so e Jehovaskiri volja tani ,različna manuša te oven spasime hem šukar te pendžaren o čačipe‘ (1. Timotej 2:3, 4).

• Sar tani pišimi amari literatura?

• Soske prevedinaja amari literatura ko but čhibja?

Amari organizacija sekova berš pečatinela hem delinela but milionija Biblie hem javera publikacie, bizo te lel love bašo adava. Gradinaja hem održinaja o dvorane hem o podružnice. Isto agjaar, pomožinaja milja phralenge so služinena ko Betel ili sar misionerija, hem daja pomoš keda isi prirodna katastrofe. Šaj pučea tut kotar laja love bašo sa akava?

Na lela pe desetok, na platinela pe članarina hem nikoj nane dolžno te del love. Iako trošinela pe but bašo amaro propovedničko delo, amen na rodaja love e manušendar. Angleder jekh veko, ko dujto izdanie taro spisanie Stražarska kula tergjola sine kaj amen verujnaja kaj o Jehova bešela pali amari buti, adaleske ,niked nane lovenge te molina e manušen‘ — hem niked na kergjem adava (Matej 10:8).

Sa so keraja tano finansirimo taro dobrovolna prilogija. But džene ceninena so sikavaja e manušen tari Biblija hem adaleske dena prilogija. Korkori amen radosno daja amaro vreme, sila, love hem javera bukja te šaj te kerel pe e Devleskiri volja ki celo Phuv (1. Letopisi 29:9). Ko amare dvorane hem ko amare kongresija isi kutie bašo dobrovolna prilogija kote sa okola so mangena te mukhen love šaj te keren adava. Ili, šaj te del pe dobrovolno prilog preku amari internet-stranica jw.org. Pobaro delo taro love avena adalendar so nane barvale. Ola tane slična sar i vdovica kola so o Isus falingja, soske iako sine čoroli spremno dengja taro vilo (Luka 21:1-4). Adaleske, sekoj šaj redovno te ,cidel peske nešto ki strana‘ hem te del ,sar so rešingja ko plo vilo‘ (1. Korinkjanite 16:2; 2. Korinkjanite 9:7).

Sigurna siem kaj o Jehova poodorig da ka pottikninel okolengere vile so mangena ,te sikaven leske čest adalea so isi len‘ te den prilogija bašo sa so kerela pe e Carstvoske hem agjaar te pomožinen te ovel leskiri volja (Izreki 3:9).

• Sar amari organizacija razlikujnela pe taro javera religie?

• Bašo so koristinena pe o dobrovolna prilogija?

I glavno tema tari Biblija baši koja kerela pe lafi ko e Jehovaskere svedokongere dvorane tani e Devleskoro Carstvo — i glavno tema baši koja o Isus propovedinela sine (Luka 8:1).

Ki lende sikljovaja o čačipe bašo Devel. O dvorane tane thana kolendar e Jehovaskere svedokija organizirinena o propovedibe ko plo podračje (Matej 24:14). O dvorane razlikujnena pe, ama sekoja lendar tani skromno hem šaj te koristinen la pobuter sobranija. Adaleske so isi sa pobaro broj objavitelija hem sobranija, ko posledna berša kergjem nekobor milje neve dvorane, ko prosek po pandž ko dive. Sar keraja akava? (Matej 19:26).

Gradime tane taro dobrovolna prilogija khedime bašo adava. Adala prilogija bičhalena pe ki podružnica te šaj te koristinen len o sobranija so valjani lenge te gradinen ili te renovirinen pli dvorana.

Gradinena len e Jehovaskere svedokija, hem na lena love bašo adava. Ko but phuvja, kerena pe grupe so gradinena dvorane. O phralja hem o phenja so služinena ko akala grupe, džana ko različna sobranija ki adaja phuv — čak ko podur thana — te pomožinen e sobranienge te keren pumare dvorane. Ko javera phuvja, isi nesave phralja kola tane odgovorna bašo keriba hem renoviriba o dvorane ko nesavo podračje. Iako but phralja so i majstorija tari celi oblast pomožinena ko than kote so kerela pe i dvorana, najbuter pomožinena o phralja hem o phenja taro adava sobranie. E Jehovaskoro duho hem adava so leskoro narodo celo vilea pomožinela, kerena te završinel pe adaja buti (Psalm 127:1; Kološanite 3:23).

• Soske gradinaja dvorane hem sar ola izgledinena?

• Sar gradinaja amare dvorane ko celo sumnal?

Sekoja dvorana, ki koja e Jehovaskere svedokija ikerena ple sostanokija, tani povrzimi e Devleskere sveto anavea. Adaleske, amenge tano čest te pomožina oj te ovel čisto hem ki šukar sostojba hem adava tano važno delo tari amari služba e Devleske. Sarine šaj te pomožinen ko akava.

Pomožin ko čistibe palo sostanok. Palo sekova sostanok, o phralja hem o phenja radosno pomožinena te čistinel pe i dvorana. Jekh puti ko masek temelno čistinela pe. Akaja buti vodinela jekh starešina ili sluga-pomošniko kaste so obično isi le spisako bašo bukja so valjani te keren pe. Šaj nekoj ka valjani te kosel ili te šulavel o podi, te usisivinel, te kosel i prašina, te redinel o stolice, šukar te čistinel o toaletija, te kosel o džamija hem o ajne, te frdel o gjubre, ili te čistinel i avlin. Adava so o čhave da ka pomožinen ko čistibe ka sikavel len te ceninen o than kote so sikljovaja bašo Devel (Propovednik 5:1).

Pomožin keda kerena pe popravke ki sala. Sekova berš, kerela pe temelno proverka e salake, andral hem avrijal. Palo adala proverke, ako valjani kerena pe popravke, a adava pomožinela i dvorana te ovel šukar održimi hem te na den pe but love bašo pobare popravke (2. Letopisi 24:13; 34:10). Jekh čisto hem šukar održimi dvorana tani dostojno than kote so slavinaja amare Devle. Keda amen da pomožinaja, tegani sikavaja kaj mangaja e Jehova hem ceninaja o than kote so slavinaja le (Psalm 122:1). Akava dela šukar svedoštvo e javere manušenge (2. Korinkjanite 6:3).

• Soske valjani te grižina amen e thaneske kote so slavinaja e Devle?

• So keraja te šaj te ovel čisto i dvorana?

Dali mangea te istražine hem te džane pobuter baši Biblija? Mangea li te džane pobuter bašo nesavo stiho, ličnost, than ili nesavi buti vakerdi ki Biblija? Ili, pučea tu sar šaj i Biblija te pomožinel keda mučinela tu nesavo problemi? Tegani, koristin i biblioteka ki dvorana.

Ki late šaj te arakhe but publikacie. Šaj khere nane tu sa o bibliska publikacie so isi e Jehovaskere svedokon ki čhib so haljovea la. Ama, ki biblioteka ki dvorana isi but publikacie. Ki late šaj isto agjaar te arakhe različna prevodija tari Biblija, šukar rečniko hem javera lila. Šaj te koristine i biblioteka, angleder hem palo sostanokija. Ako ki late isi kompjuteri, ka šaj te koristine i Biblioteka publikaciencar e Jehovaskere svedokongiri (Watchtower Li­brary). Oj tani kompjutersko programa ki koja isi but publikacie, hem lokhe šaj te arakhe disavi tema, lafi ili stiho so rodea.

Oj tani korisno adalenge so učestvujnena ko sostanok Amaro životo hem služba. Šaj te koristine i biblioteka ki dvorana keda spreminea tu bašo zadače so isi tut ko akava sostanok. O nadgledniko akale sostanokoskoro grižinela pe baši biblioteka. Ov tano odgovorno te dikhel dali o neve publikacie tane adathe hem dali tane šukar sredime. Ov ili adava so proučinela tuja i Biblija šaj te sikaven tu sar te arakhe adava so valjani tuke. Ama, nijekh lil tari biblioteka na valjani te lel pe khere. Isto agjaar, valjani šukar te arakhen pe adala lila hem ma te pišinel pe ki lende.

I Biblija vakerela kaj ako mangaja te arakha ,o džandipe bašo Devel‘, mora te roda le ,sar garavdo barvalipe‘ (Izreki 2:1-5). I biblioteka ki dvorana šaj te pomožinel tuke ko akava.

• So isi ki biblioteka ki dvorana?

• Koj šaj te sikavel tu sar te koristine i biblioteka?

O Isus vakergja ple učenikonge: ,Neka svetinel tumari svetlina anglo manuša, te šaj ola te dikhen o šukaripe so kerena hem te slavinen tumare Dade, so i ko nebo‘ (Matej 5:16) Bašo adava, koristinaja i moderno tehnologija sar so i o Internet. Preku amari internet-stranica, jw.org, šaj te dobinen pe informacie bašo adava ko so verujnena hem so kerena e Jehovaskere svedokija. So isi ki late?

Bibliska odgovorija bašo but pučiba. Šaj te arakhe odgovorija bašo but važna pučiba so pobuter manuša pučena pe. Na primer, o traktatija Ka avel li krajo e mukenge? hem Ka dživdinen li palem o mule? tane dostapna ko poviše taro 600 čhibja. Adari šaj te arakhe o Prevod Nov svet ko pobuter taro 130 čhibja hem but publikacie kolencar so proučinela pe i Biblija, sar so i tano o lil So čače sikavela i Biblija? hem o najneve spisanija Stražarska kula hem Razbudete se! But taro akala publikacie šaj te čitine, te šune ili te perave ko MP3, PDF ili EPUB formatija. Šaj čak te printine nekobor strane te sikave e interesentenge ki lengiri čhib! Isi videopublikacie ko but znakovna čhibja. Šaj te perave snimke taro dramsko čitibe i Biblija, bibliska drame hem šuži muzika te šaj te uživine ko tlo slobodno vreme.

Čačutne informacie bašo e Jehovaskere svedokija. Isto agjaar adathe tane čhivde o najneve haberija hem videoklipija baši amari buti ko celo sumnal hem bašo adava sar pomožinaja keda ovena prirodna katastrofe. Adathe šaj te dikhe keda ka oven amare kongresija hem o adrese taro amare podružnice.

Sa akalea, amen širinaja o čačipe dži ko najdur thana ki Phuv. O manuša taro sekova kontinenti, čak taro Antartik, isi len korist akalestar. Amen but mangaja ,e Jehovaskoro lafi sigate te šungjovel‘ ki celo Phuv, te ovel slavimo o Devel (2. Solunjanite 3:1).

• Sar i jw.org pomožinela e manušenge te sikljon o čačipe tari Biblija?

• So bi mangea te rode ki amari internet-stranica?