But manuša čhinavge te džan ko crkve ili džamie soske adari na arakhle uteha hem duhovno vodstvo. Tegani, soske valjani te ave ko sostanokija so e Jehovaskere svedokija ikerena? Sar ola ka koristinen tuke?

Ka arakhe radost so ka ove maškar o šukar manuša so grižinena pe javerenge. Ko prvo veko, o hristijanija khedena pe sine ko sobranija, ikerena sine sostanokija ko kola so slavinena sine e Devle, proučinena i Biblija hem ohrabrinena pe sine maškar peste (Evreite 10:24, 25). Maškar lende sine mangipe, sine but paše amala — sar duhovna phralja hem phenja (2. Solunjanite 1:3; 3. Jovanovo 14). Amen džaja palo lengoro primer hem siem radosna sar lende.

Ka sikljove sar te ikere o bibliska načela. Isto sar so sine ko purano vreme, avdive da murša, džuvlja hem čhave, sarine khedaja amen zaedno. O iskusna phralja koristinena i Biblija te pomožinen amen te haljova sar te primenina lakere načela ko amaro dživdipe (5. Mojseeva 31:12; Neemija 8:8). Ko amare sostanokija sarine šaj te komentarina hem te giljava, a agjaar sikavaja amari nadež (Evreite 10:23).

Ka ovel tli vera ko Devel panda pozorali. Ko prvo veko, o apostol Pavle e phralenge taro jekh sobranie vakergja: ,But mangava te dikhav tumen, . . . zaedno te ohrabrina amen, me tumare a tumen mle veraja‘ (Rimjanite 1:11, 12). Adava so zaedno khedaja amen amare phralencar ko sostanokija, kerela amari vera te ovel panda pozorali hem poodorig da spremno te dživdina sar so vakerela i Biblija.

Šaj li te ave ko amare sostanokija hem tu da te osetine akaja radost? But šukar ka ove dodžardo sarinendar. Sa amare sostanokija tane bilovengoro — na rodaja love.

• Palo kaskoro primer džaja keda khedaja amen ko amare sostanokija?

• Savi korist ka ovel amen ako džaja ko sostanokija?

Hem ko lošno hem ko šukar vreme, amen redovno džaja ko amare sostanokija. Iako isi amen problemija hem šaj siem umorna tari buti, amen but mangaja te družina amen amare duhovno phralencar. Soske keraja agjaar?

Adava tano bašo amaro šukaripe. ,Te razmislina jekh jekheske‘, pišingja o Pavle, mislingja andalenge so i ko amaro sobranie (Evreite 10:24). Ov manglja te phenel kaj amen mora šukar te pendžara amen jekh jekheja. Leskere lafija ohrabrinena amen te sikava griža javerenge. Keda ka pendžara pošukar e javeren taro sobranie, ka dikha kaj nesave lendar sine len slična problemija sar amare hem kaj šaj te pomožinen amenge.

Ka oven amen but paše amala. Amare duhovna phralja nane samo nesave manuša so avena ko sostanokija, nego ola tane amare paše amala. Amen družinaja amen hem nakhaja amenge šukar lencar ko javera da prilike. Sar koristinela amenge adava so družinaja amen lencar? Sikljovaja te cenina jekh jekhe hem amaro mangipe maškar amende bajrovela. Tegani, keda amare duhovna phralen isi problemija, amen siem spremna te pomožina lenge soske siem lencar paše amala (Izreki 17:17). Adalea so družinaja amen sarinencar ko amaro sobranie, sikavaja kaj grižinaja amen jekh jekheske (1. Korinkjanite 12:25, 26).

Ohrabrinaja tu te rode tuke amala maškar adala so kerena e Devleskiri volja. Tu šaj te arakhe asavke amala maškar e Jehovaskere svedokija. Ma mukh ništo te sprečinel tu te družine tu amencar.

• Soske tano korisno amenge so družinaja amen ko sostanokija?

• Keda šaj te ave hem te zapoznajne e javere svedokon taro amaro sobranie?

Ko sostanokija so ikerena sine o prva hristijanija sine gilja, molitve, čitinena sine i Biblija hem diskutirinena sine baši late. Na kerena pe sine nisave ritualija (1. Korinkjanite 14:26). Amare sostanokija tane slična sar lengere.

Sikljovaja tari Biblija, a adava tano korisno amenge. Sekoja sabota ili nedela, ko sekova sobranie ikerela pe biblisko govor taro 30 minutija. Agjaar sikljovaja sar i Biblija pomožinela amen hem so vakerela oj bašo vreme ko kova so dživdinaja. Sarine siem ohrabrime te pratina ko amare Biblije o stihija so čitinena pe. Palo govor, jekh saati isi amen Proučibe i „Stražarska kula“, kote so šaj sarine te den komentarija džikote proučinaja nesavi statija tari i Stražarska kula — izdanie za proučuvanje. Akava pomožinela amen te ikera o Bibliska sovetija. I isto statija proučinela pe ko pobuter taro 110.000 sobranija ki celo Phuv.

Pomožinena amenge pošukar te sikava javeren. Javer dive isi amen panda jekh sostanok kote so i programa tani ko trin delija. Akava sostanok vikinela pe Amaro životo hem služba sar hristijanja. O materijali bašo akava sostanok lendo tano tari publikacija Amaro životo hem služba — listija spremibaske koja so ikljola sekova masek. O prvo delo taro akava sostanok, Barvalipa taro e Devleskoro Lafi, pomožinela amenge pošukar te pendžara nesavo delo tari Biblija so valjani angleder te čitina le. Palo adava, ko delo De tutar sa ki služba isi prikazija so sikavena sar šaj te kera lafi e javerencar baši Biblija. Isi jekh phral so dela sovetija hem pomožinela amenge te ova pošukar ko čitibe hem sikajbe e javeren (1. Timotej 4:13). Ko posledno delo, Te živina sar hristijanja, kerela pe lafi sar te primenina o bibliska načelija ko amaro životo. Isto agjaar, ko akava delo isi diskusija koja so bajrarela amaro pendžaribe baši Biblija.

Keda ka ave ko amare sostanokija, sigurno ka ovel tuke but šukar te šune hem te dikhe sar sikljovaja tari Biblija (Isaija 54:13).

• So šaj te šune ko sostanokija so ikerena e Jehovaskere svedokija?

• Ko kova taro amare sostanokija tu bi mangea te ave?

Dikhljan li ko slike tari akaja brošura kobor šukar tane uravde e Jehovskere svedokija keda džana ko sobraniska sostanokija? Soske doborom but pazinaja ko amaro urajbe hem izgled?

Sikavaja kaj počitujnaja e Devle. Čače i adava kaj e Devleske tano považno save siem andral (1. Samoilova 16:7). Ama, keda khedaja amen te slavina le, mangaja te sikava kaj vilea počitujnaja e Devle hem amare duhovno phralen hem phenjen. Keda valjani te ikljova anglo nesavo cari ili predsedateli, amen ka pazina sar ka ova uravde. Slično, adava sar siem uravde keda siem ko sostanok sikavela kobor ceninaja e Jehova, o ,Cari e narodongoro‘, hem o than kote so khedaja amen te obožavina le (Eremija 10:7).

Sikavaja kaj ikeraja o načela tari Biblija. I Biblija ohrabrinela e hristijanen te uraven pe ,skromno hem razumno‘ (1. Timotej 2:9, 10). Te urava amen skromno značinela te na la javerengoro vnimanie adalea so amare šeja ka oven provokativna ili lencar ka istaknina amen. Adava so siem razumna ka pomožinel amenge te birina šuže šeja so nane neuredna ili so džana dži ki krajnost. Akala načela mukhena amenge baro izbor bašo adava sar te urava amen. Bizo te vakera nešto, adava so ka ova uredno hem šukar uravde šaj te ,ukrasinel o sikljojbe amare Spasiteleskoro‘ hem ,slavinela e Devle‘ (Tit 2:10; 1. Petrovo 2:12). Keda siem šukar uravde ko amare sostanokija, o javera šukar ka dikhen ko Jehova hem ko leskoro narodo.

Čak ako mislinea kaj nane tu šeja so odgovorinena bašo sostanokija ma mukh adava te sprečinel tu te ave ki lende. Amare šeja na valjani te oven skupa ili moderna, nego uredna, čista hem pristojna.

• Kobor tano važno adava sar siem uravde keda džaja ko sostanokija?

• Kola načela vodinena amen ko amaro urajbe hem izgled?

Ako proučineja i Biblija e Jehovaskere svedokoncar, šaj trudineja tu angleder te spremine o materijali so ka proučinen. Ka ovel tuke but korisno ako isto adava kereja angleder te dža ko sobraniska sostanokija. Ako redovno keraja agjaar ka ovel amen najšukar rezultatija.

Odlučin keda hem kote ka proučine. Keda tuke najšukar te spremine tu? Dali tano adava rano sabajle, angleder te dža ki buti ili rakjate keda o čhave sovena? Ako našti pobuter vakti te proučine, odlučin kobor šaj hem ma mukh ništo te ačhavel tu taro adava. Rode tuke mirno than proučibaske hem ačhav sa o bukja so šaj te smetinen tu, sar so i o radio, i televizija hem o mobilno telefoni. Adalea so ka moline tu angleder te proučine, ka ovel tuke polokhe te misline ko adava so čitineja tari Biblija, a na ko tle problemija (Filipjanite 4:6, 7).

Beležin o materijali hem spremin tu te de komentarija. Počmin agjaar so ka haljove bašo so kerela lafi i tema. Razmislin bašo naslov e statijakoro ili e poglavjeskoro, dikh sar sekova podnaslov tano povrzimo e temaja, dikh o slike hem o pučiba bašo povtoruvanje so sikavena o glavna misle. Tegani čitin sekova pasus hem rode o odgovor bašo dendo pučibe. Rode hem čitin o dende stihija tari Biblija, hem razmislin sar tane povrzime adalea so čitineja ko pasus (Dela 17:11). Keda ka arakhe o odgovor, beležin nekobor lafija ili misle ko pasus so ka pomožinen tu te setine tu ki leste. Tegani, ko sostanok, te mangljan šaj te vazde to vas hem te de kratko komentari tle lafencar.

Adalea so ka proučine različna teme so ka oven ko sekova sostanok, tu ka šaj duhovno te barvaljove bibliska mislencar (Matej 13:51, 52).

• Keda ka ovel tuke najšukar te spremine tu bašo sostanokija?

• Sar šaj korkori te spremine tu te de komentarija ko sostanok?

Panda ko purano vreme, o Jehova manglja sekoja familija te nakhel vreme zaedno, te šaj te ovel popaše e Jehovaja hem popaše sar familija (5. Mojseeva 6:6, 7). Adaleske e Jehovaskere svedokija sekova kurko odvojnena peske vreme sar familija bašo Jehova — kerena lafi bašo duhovna bukja kola so i potrebna lenge. Čak ako sian korkori, tu isto šaj te odvojne vreme bašo Devel agjaar so ka proučine nesavi tema tari Biblija so tu ka birine.

Adava tano vreme te ove popaše e Jehovaja. ,Oven popaše e Devlea, hem ov ka ovel popaše tumencar‘ (Jakov 4:8). Ka pendžara pošukar e Jehova keda tari Biblija sikljovaja pobuter bašo adava savo tano ov hem sar ov postapinela sine. Jekh lokho način sar te počminen tumari Familijarno rat tano agjaar so zaedno ka čitinen ko glaso delo tari Biblija. Šaj te čitinen adava delo tari Biblija so i dendo ko raspored ko Amaro životo hem služba — listija spremibaske adale kurkeske. Sarine šaj te čitinen po jekh delo hem posle te vakeren so siklilen tari Biblija.

Adava tano vreme te ovel popaše i familija. O rom hem i romni, isto agjaar o roditelija hem o čhave, ovena popaše jekh jekheja keda proučinena i Biblija zaedno. I Familijarno rat valjani te ovel radosno vreme kova so sarine edvaj ka adžikeren. O roditelija šaj te birinen te keren lafi ple čhavencar bašo nesave bukja so ka odgovorinen e čhavenge taro amare publikacie, sar so i Stražarska kula ili Razbudete se! ili tari amari internet-stranica, jw.org. Šaj te keren lafi bašo nesavo problemi so isi e čhaven ki škola hem te pomožinen lenge sar te ikljon ko krajo lea. Isto agjaar, šaj te dikhen programa tari amari televizija JW Broadcasting (tv.jw.org), hem palo adava keren lafi baši late. Šaj te vežbinen o gilja so ka giljaven pe ko sostanokija hem palo adava šaj zaedno te han ili te pien nešto.

Akava posebno vreme so sekova kurko zaedno dena e Jehovaske ka pomožinel sarinenge ki familija te uživinen džikote proučinena i Biblija, a o Jehova but ka blagoslovinel adava so kerena (Psalm 1:1-3).

• Soske odvojnana vreme baši i Familijarno rat?

• Sar šaj o roditelija te keren te šaj sarine te uživinen ki Familijarno rat?

Soske o manuša ko akala slike tane doborom radosna? Ola tane ko jekh taro amare kongresija. Sar so sine e Devleskere slugenge ko purano vakti vakerdo te kheden pe trin puti ko berš, amen da edvaj adžikeraja te kheda amen ko amare kongresija (5. Mojseeva 16:16). Sekova berš, isi amen trin kongresija: duj pokrainska kongresija kola tane po jekh dive hem regionalno kongres kova tano trin dive. Savi korist isi amen lendar?

Ola kerena amaro duhovno phralipe panda pozoralo. Isto sar so o Izraelcija radosno slavinena sine e Jehova ,maškar o khedime manuša‘, amen da radosno slavinaja le ko amare kongresija (Psalm 26:12; 111:1). Ki lende isi amen prilika te zapoznajna hem te družina amen amare phralencar hem amare phenjencar taro različna sobranija pa čak taro javera phuvja. Keda isi pauza, amen adathe zaedno haja maro hem uživinaja ki šukar atmosfera ko akava duhovno nastan (Dela 2:42). Adathe šaj te dikha o mangipe so spojnela sa e phralen ko celo sumnal (1. Petrovo 2:17).

Ola pomožinena amenge duhovno te bajrova. O Izraelcija sine but bahtale so šaj sine ,te haljoven o lafija‘ tari Biblija so sine lenge objasnime džikote sine khedime zaedno (Neemija 8:8, 12). Amen da ceninaja adava so sikljovaja tari Biblija ko amare kongresija. Sekova kongres isi le biblisko tema. Preku interesna govorija hem prikazija, amen sikljovaja sar te kera e Devleskiri volja. Ohrabrinela amen keda šunaja bašo adala so ačhovena verna ko akava pharo vreme. Ko regionalna kongresija ikerena pe drame kolendar o nastanija tari Biblija ovena amenge porealna, hem lendar but sikljovaja. Ko sekova kongres, okola so zavetinge pe e Jehovaske šaj te krstinen pe ko pani.

• Soske siem doborom radosna ko amare kongresija?

• Savi korist šaj te ovel tu ako aljan ko kongres?

Nekobor dive angleder te merel, o Isus vakergja: ,Akava šukar haberi bašo carstvo ka propovedinel pe ko celo sumnal, bašo svedoštvo sa e narodonge, hem tegani ka avel o krajo‘ (Matej 24:14). Sar valjani te kerel pe akava? Agjaar so ka džal pe palo e Isuseskoro primer so mukhlja džikote sine ki Phuv (Luka 8:1).

Džaja te propovedina e manušenge taro kher ko kher. O Isus sikavgja ple učenikon te propovedinen o šukar haberi taro kher ko kher (Matej 10:11-13; Dela 5:42; 20:20). E propovednikon taro prvo veko sine len podračja kolende valjani sine te propovedinen (Matej 10:5, 6; 2. Korinkjanite 10:13). Isto sar lende, amen da avdive siem šukar organizirime te propovedina, hem sekole sobranie isi le podračje koleste so propovedinela. Adava pomožinela amenge te kera e Isuseskiri zapoved te ,propovedina e narodoske hem temelno te svedočina‘ (Dela 10:42).

Džaja te propovedina segde kaj so isi manuša. O Isus dengja amenge primer adalea so propovedinela sine e manušenge ko thana kaj so šaj sine te arakhel len, sar na primer, uzo more ili uzo bunari (Marko 4:1; Jovan 4:5-15). Amen da keraja e manušencar lafi baši Biblija ko sekova than — ko ulice, ko dukjanija, ko parkija ili preku telefoni. Isto agjaar, sekogaš keda šaj, propovedinaja amare komšienge, kolegenge ki buti, součenikonge ili familijake. Adaleske so sarine agjaar propovedinaja, milionija manuša ki celo Phuv šaj te šunen i ,šukar vest bašo spasenie‘ (Psalm 96:2).

Dali tekninela tu nekaste kaske so mangea te vakere o šukar haberi bašo e Devleskoro carstvo hem so ka anel ov ki idnina? Adava so džaneja ma iker ki tute. Vaker le e javerenge so posigate!

• Kova ,šukar haberi‘ mora te ovel propovedimo?

• Sar e Jehovaskere svedokija džana palo e Isuseskoro primer bašo propovediba?

O lafi „pioneri“ but puti sikavela ki nekaste kova so istražinela nevo podračje hem phravela drumo e javerenge te džan palo leskoro primer. O Isus sine sar pioneri adaleske so sine bičhaldo ki Phuv te sikavel e manušen hem te phravel lenge o drumo te spasinen pe (Matej 20:28). Avdive, adala so džana palo leskoro primer tane sar leste agjaar so nakhavena kobor so šaj pobuter vreme te ,keren učenikija‘ (Matej 28:19, 20). Nesave šaj te služinen ki jekh posebno služba koja amen vikinaja la pionersko služba.

O pioneri nakhavela pobuter vreme ko propovedibe. Sa e Jehovaskere svedokija vakerena javerenge o šukar haberi. Ama, disave planiringe pumaro vreme te šaj te služinen sar opšta pionerija, agjaar so nakhavena 70 saatija ki služba sekova masek. Te šaj te keren adava, but lendar džana ki buti po nekobor saatija ko dive ili ko kurko. A javera tane birime te služinen sar specijalna pionerija ko thana kote so valjani pobuter te propovedinel pe. Ola nakhavena 130 ili pobuter saatija ki služba sekova masek. O pionerija mangena skromno te dživdinen hem isi len doverba kaj o Jehova ka grižinel pe lenge (Matej 6:31-33; 1. Timotej 6:6-8). Okola so našti te oven opšta ili specijalna pionerija, ako mangena, šaj te služinen sar pomošna pionerija, agjaar so ka džan ki služba 30 ili 50 saatija ko masek.

O pioneri služinela adaleske so mangela e Jehova hem e manušen. Isto sar o Isus, amen dikhaja kaj o manuša but hari džanena bašo Devel hem bašo leskere namere (Marko 6:34). Ama, amen džanaja bukja so šaj te pomožinen lenge akana hem te den len nadež baši pošukar idnina. Adaleske so mangela e manušen, o pioneri mangela te del pobuter taro plo vakti hem sila te šaj duhovno te pomožinel len (Matej 22:39; 1. Solunjanite 2:8). Adaleske so kerela adava, leskiri vera ovela pozorali, ovela panda popaše e Devlea hem tano but bahtalo (Dela 20:35).

• Sar ka objasnine so i pioneri?

• Soske disave služinena sar pionerija?

O Teokratsko školujbe but vreme tano znako kolea so pendžargjona e Jehovaskere svedokija. Te šaj najšukar te keren pli služba, isi posebna škole okolenge so pobuter vreme nakhavena te propovedinen bašo Carstvo (2. Timotej 4:5).

Škola bašo pionerija. Ko krajo taro prvo berš tari pionersko služba, jekh opšto pioneri tano kanimo te ovel ki jekh škola so trajnela šov dive. Oj ikerela pe ki najpaše dvorana. Akaja škola pomožinela e pionerenge te oven popaše e Jehovaja, pošukar te keren i služba, hem te ačhoven ponadari da pionerija.

Škola bašo polnovremena objavitelija. Akaja škola trajnela duj masek hem kerdi tani te školunjel e iskusno pioneren, kola tane spremna te služinen ko thana kote so isi potreba. Ola džana palo e Isuseskoro primer, o najbaro Propovedniko so sine ki Phuv, hem vakerena: „Ake sium! Bičhal ma man!“ (Isaija 6:8; Jovan 7:29). Te gele te služinen ko javer than, tegani šaj ka valjani poednostavno te dživdinen. I kultura, i klima hem o hajbe šaj te oven but pojaver taro adava so i sikle. Čak šaj ka valjani te sikljoven nevi čhib. Ki akaja škola šaj te džan prandime hem biprandime phralja hem phenja, so isi len taro 23 dži ko 65 berš. I škola pomožinela te ovel len duhovna osobine so ka valjanen lenge ko lengere dodelbe hem ka sikavel len sar pošukar te služinen e Jehovaske hem leskere organizacijake.

Škola Gilead. Ki Hebrejsko čhib, o lafi „Gilead“ tano povrzimo e lafea „svedoštvo“. Sar so počmingja i škola Gilead, taro 1943 berš, late gele pobuter taro 8.000 misionerija kola so sine bičhalde te den baro svedoštvo ,dži o najdur thana ki phuv‘ hem sine but uspešna (Dela 13:47). Keda amare misionerija resle prvo puti ko Peru, na sine nijekh sobranie — akana isi pobuter taro 1.000 sobranija. Isto agjaar, keda o misionerija počminge te služinen ki Japonija, adari sine pohari taro deš Svedokija — akana isi pobuter taro 200.000 Svedokija. Akaja škola trajnela pandž masek hem ki late hor proučinela pe i Biblija. Adala so služinena sar specijalna pionerija, misionerija, so služinena ko podružnice, ili tane nadglednikija, šaj te oven kanime ki Škola Gilead. Pali akaja škola, ola šaj but te pomožinen ko propovedibe hem ki organizacija.

• Ko so pomožinela e pioneren i Škola bašo pionerija?

• Koj šaj te džal ki Škola bašo polnovremena objavitelija?