So vakerela i Biblija bašo brako hem bašo adava te na ove ko brako?

Ko nesave kulture, o manuša mislinena kaj nekoj našti te ovel bahtalo ako nane ko brako. Ama, okola soj ko brako nane avtomatski pobahtale taro adala so nane ko brako. I Biblija vakerela kaj tano šukar hem te ove ko brako hem te na ove ko brako.

1. Kola tane nesave koristija keda nekoj nane ko brako?

I Biblija vakerela: „Okova so khuvela ko brako kerela šukar, ama okova so na khuvela ko brako kerela panda pošukar“. (Čitin 1. Korinkjanite 7:32, 33, 38.) Ki koja smisla okova so na khuvela ko brako „kerela panda pošukar“? Jekh hristijani so nane ko brako na valjani te grižinel pe bašo bračno partneri. Adava značinela kaj le isi le pobari sloboda. Asavke phralja hem phenja, šaj te keren poviše ki služba bašo Jehova, na primer, agjaar so ka selinen pe ki jekh javer phuv te šaj te propovedinen o šukar haberi. A soj najvažno, ola šaj te nakhaven poviše vreme ko adava te oven popaše e Jehovaja.

2. Kola tane nesave koristija keda nekoj tano ko brako hem tano venčimo?

Isto agjaar, o brako da anela posebna hem šuže bukja. I Biblija vakerela: „Dujenge tano pošukar nego jekheske“ (Propovednik 4:9). Akala lafija posebno važinena e hristijanenge kola so ikerena pe ko bibliska načelija bašo brako. Duj džene kola so venčinena pe anglo zakoni dena zavet kaj ka mangen pe, ka poštujnen pe hem kaj ka grižinen pe jekh jekheske. Adaleske ola osetinena pe posigurna ko pumaro brako, nego taro duj džene kola so živinena zaedno, ama nane venčime. Agjaar, lengoro brako ka ovel jekh stabilno sredina kote so šaj te bajraren pumare čhaven.

3. Sar dikhela o Jehova ko brako?

Keda o Jehova kergja o prvo brako, ov vakergja: „O manuš ka mukhel ple dade hem ple daja hem ka spojnel pe ple romnjaja“ (1. Mojseeva 2:24). O Jehova mangela o rom hem i romni te mangen pe hem te ačhoven zaedno sa džikote tane dživde. Ov dozvolinela te razvedinen pe samo ako jekh lendar kerela preljuba. Ki asavki situacija, o Jehova dela pravo e bračno partnereske kova so nane krivo, te odlučinel dali ka razvedinel pe ili naa (Matej 19:9). O Jehova na dozvolinela e hristijanenge te ovel len poviše tari jekh romni (1. Timotej 3:2).

DOZNAJN POVIŠE

4. Šukar koristin adava so na sian ko brako

O Isus vakergja kaj adava so nekoj nane ko brako šaj te ovel poklon (Matej 19:11, 12). Čitin Matej 4:23, a palo adava keren lafi bašo akava pučibe:

• Sar o Isus koristingja adava so na sine ko brako te služinel ple Dadeske hem te pomožinel e javerenge?

O hristijanja so nane ko brako šaj te oven bahtale ako isto sar o Isus šukar koristinena pumare okolnostija. Dikh o VIDEOKLIPI, a palo adava keren lafi bašo akava pučibe:

VIDEOKLIPI: Okola so nane ko brako tane verna e Jehovaske (3:11)

• Kola šukar bukja šaj te keren o hristijanja so nane ko brako?

Dali džanljan?

I Biblija na vakerela ko kobor berš nekoj valjani te khuvel ko brako. Ama, i Biblija ohrabrinela e ternen te adžikeren sa džikote na nakhela o vreme keda počminena te pojavinen pe lenge seksualna želbe hem keda adala želbe tane najsilna. Palo adava periodi, ola ka šaj pošukar te razmislinel hem te anen pomudra odluke (1. Korinkjanite 7:36).

5. Mudro birin tle bračno partnere

Te birine tuke bračno partneri tani jekh taro najvažna odluke so valjani te ane. Čitin Matej 19:4-6, 9, a palo adava keren lafi bašo akava pučibe:

• Soske jekh hristijani na valjani te sigjarel te khuvel ko brako?

I Biblija šaj te pomožinel tuke te džane save osobine valjani te rode ko tlo idno bračno partneri. Najvažno tano te rode tuke bračno partneri so mangela e Jehova.b Čitin 1. Korinkjanite 7:39 hem 2. Korinkjanite 6:14, a palo adava keren lafi bašo akala pučiba:

• Soske valjani te khuva ko brako samo nekasaja so služinela e Jehovaske?

• So mislinea, sar ka osetinel pe o Jehova ako khuvaja ko brako nekasaja so na služinela leske hem na mangela le?

6. Dikh ko brako sar o Jehova so dikhela

Ko purano Izrael, nesave roma razvedinena pe sine taro pumare romnja taro sebična pričine. Čitin Malahija 2:13, 14, 16, a palo adava keren lafi bašo akava pučibe:

• Soske o Jehova mrzinela keda o manuša razvedinena pe tari bilo koja javer pričina osven tari preljuba?

Dikh o VIDEOKLIPI, a palo adava keren lafi bašo akava pučibe:

VIDEOKLIPI: O brako — trajno vrska (4:30)

• Ako sian ko brako nekasaja so na služinela e Jehovaske, so šaj te kere te šaj tlo brako te ovel bahtalo?

7. Iker e Jehovaskere merilija bašo brako

VIDEOKLIPI: Tu šaj te ikere e Jehovaskere merilija bašo brako (4:14)

Čitin Evreite 13:4, a palo adava keren lafi bašo akala pučiba:

• So mislinea, dali e Jehovaskere merilija bašo brako tane previše phare te ikeren pe? Soske mislinea agjaar?

Ko but phuvja i vlada rodela taro ple gragjanja zakonsko te registririnen pumaro brako ili pumaro razvod. O Jehova očekujnela taro ple sluge te poštujnen adala zakonija. Čitin Tit 3:1, a palo adava keren lafi bašo akava pučibe:

• Ako sian ko brako, dali sian zakonsko venčimo tle partnerea?

SO SIKLILEM

Bizi razlika dali sian ko brako ili na, ako ikerea tut ko e Jehovaskere merilija ka ove bahtalo hem zadovolno. Solduj bukja tane poklon taro Jehova.

Sar ka odgovorine?

• Sar šaj nekoj najšukar te koristinel adava so nane ko brako?

• Soske i Biblija vakerela te khuva ko brako samo nekasaja so služinela e Jehovaske?

• Sprema i Biblija, koja tani i edinstveno opravdano pričina bašo razvod?

ISTRAŽIN

So značinela te khuve ko brako „samo ko Gospodari“?

„Prašanja od čitatelite“ (Stražarska kula taro 1 juli 2004)

Dikh taro so jekh phral mora sine te otkažinel pe hem sar o Jehova dengja le bereketi bašo adava.

Nadinava man sine kaj oj ka prifatinel o čačipe (1:56)

Bašo kola bukja valjani nekoj te razmislinel angleder te odlučinel te razvedinel pe ili te odvojnel pe taro plo bračno partneri?

„Poštujn o brako sar poklon taro Devel“ (Stražarsko kula taro dekemvri 2018)