O Jehova ka pomožinel tuke te borine tut protiv o lošna duhija

1. Sprema Efešanite 6:10-13, kova tano jekh način sar sikavela o Jehova kaj grižinela pe amenge? Objasnin.

JEKH način sar sikavela o Jehova kaj grižinela pe amenge tano agjaar so pomožinela amenge te borina amen protiv amare dušmanja. Amare najbare dušmanja tane o Satana hem o demonija. O Jehova vakerela amenge kaj akala dušmanja tane but opasna hem dela amen sa so valjani amenge te šaj te borina amen protiv lende. (Čitin Efešanite 6:10-13.) Amen šaj uspešno te borina amen protiv o Beng ako prifatinaja i pomoš taro Jehova hem ako isi amen celosno doverba ki leste. Isto sar o apostol Pavle, amen da siem uverime ko akala lafija: „Ako o Devel tano amencar, koj ka ovel protiv amende?“ (Rim. 8:31).

2. So ka dikha ki akaja statija?

² Sar čačutne hristijanja, amen na mangaja previše te interesina amen bašo Satana hem bašo demonija. Amenge tano najvažno te sikljova bašo Jehova hem te služina leske (Ps. 25:5). Ama, valjani te džana kola bukja kerela o Satana. Soske? Te šaj te na hovavel amen (2. Kor. 2:11). Ki akaja statija ka dikha jekh glavno način sar o Satana hem o demonija probinena te hovaven e manušen. Isto agjaar, ka dikha sar šaj uspešno te borina amen protiv lende.

SAR O LOŠNA DUHIJA HOVAVENA E MANUŠEN

3-4. a) Soj tano o spiritizam? b) Kobor tano raširimo o veruvanje ko spiritizam?

³ Jekh glavno način sar o Satana hem o demonija probinena te hovaven e manušen tano preku o spiritizam. Okola so kerena spiritizam vakerena kaj džanena ili kerena bukja kola so o manuša normalno našti te džanen len ili te keren len. Na primer, nesave vakerena kaj šaj te dikhen so ka ovel ki idnina agjaar so koristinena različna bukja, sar soj i astrologija. Javera vakerena kaj šaj te komunicirinen e mulencar. A nesave kerena magie.b

⁴ Kobor tano raširimo o veruvanje ko spiritizam? Jekh anketa koja so sine kerdi ko 18 phuvja ki Latinsko Amerika hem ko Karibija sikavgja kaj skoro jekh tretina taro manuša so učestvujngje ki late verujnena ko magie, hem skoro isto doborom manuša verujnena kaj šaj te komunicirinel pe e duhoncar. Jekh javer anketa sine kerdi ko 18 phuvja ki Afrika. Adari, ko prosek, poviše taro ekvaš so učestvujngje ki anketa vakergje kaj verujnena ko magie. Džangjola pe, bizi razlika kote živinaja, valjani te arakha amen taro spiritizam soske o Satana probinela te hovavel celo sveto (Otk. 12:9).

5. Sar dikhela o Jehova ko spiritizam?

⁵ O Jehova tano o Devel e čačipaskoro (Ps. 31:5). Sprema adava, sar dikhela ov ko spiritizam? Ov mrzinela le! O Jehova vakergja e Izraelconge: „Ki tute ma te arakhljovel nijekh so ka nakhavel tari jag ple čhave ili ple čhaja, nijekh so dikhela so ka ovel ki idnina, nijekh so kerela magija, nijekh so prorokujnela sprema o znakija, ni magišari, nijekh so vikinela duhija,.. nijekh so pučela e mulen. Soske sekoj so kerela asavko nešto tano odvratno e Jehovaske“ (5. Moj. 18:10-12). O hristijanja na valjani te ikeren o Zakoni so dengja o Jehova e Izraelconge. Ama, džanaja kaj leskoro stavi bašo spiritizam na meningja pe (Mal. 3:6).

6. a) Sar koristinela o Satana o spiritizam te šaj te kerel lošnipe e manušenge? b) Sprema Propovednik 9:5, so čače ovela e manušencar keda merena?

⁶ O Jehova vakerela amenge te arakha amen taro spiritizam soske džanela kaj o Satana koristinela le te šaj te kerel lošnipe e manušenge. O Satana koristinela o spiritizam te šaj te širinel ple hovajba, kote soj vklučimo o hovajbe kaj o mule živinena ko nesavo javer than. (Čitin Propovednik 9:5.) Ov isto agjaar koristinela o spiritizam te šaj te ikerel e manušen ki dar hem te cidel len taro Jehova. I cel e Satanaskiri tani te terinel e manušen so kerena spiritizam te ovel len doverba ko lošna duhija namesto ko Jehova.

SAR ŠAJ TE BORINA AMEN PROTIV O LOŠNA DUHIJA

7. So vakerela amenge o Jehova?

⁷ Sar so dikhlem angleder, o Jehova vakerela amenge sa adava so valjani te džana te šaj te na hovaven amen o Satana hem o demonija. Te dikha nekobor bukja kola so šaj te pomožinen amenge te borina amen protiv o lošna duhija.

8. a) Kova tano o glavno način sar šaj te borina amen protiv o lošna duhija? b) Sar ko Psalm 146:4 tano otkrimo e Satanaskoro hovajbe bašo mule?

⁸ Čitin e Devleskoro Lafi hem razmislin baši leste. Akava tano glavno način sar šaj te otfrlina o hovajba so širinena len o lošna duhija. E Devleskoro Lafi otkrinela e Satanaskere hovajba (Ef. 6:17). Na primer, otkrinela o hovajbe kaj o mule šaj te komunicirinen e dživdencar. (Čitin Psalm 146:4.) Isto agjaar, e Devleskoro Lafi setinkerela amen kaj samo o Devel šaj točno te vakerel so ka ovel ki idnina (Isa. 45:21; 46:10). Ako redovno čitinaja e Devleskoro Lafi hem ako razmislinaja bašo adava so čitinaja, ka šaj te otfrlina hem te mrzina o hovajba ko kola so o lošna duhija mangena te verujna.

9. Taro kola bukja valjani te arakha amen?

⁹ Ma ker bukja kolende so isi spiritizam. Adaleske so siem e Devleskere sluge, amen na keraja bukja kolende so isi spiritizam. Na primer, na probinaja te ava ko kontakt e mulencar preku nekaste ili ko bilo savo javer način. Sar so dikhlem ki angluni statija, na učestvujnaja ko adetija so kerena e mulenge kola so temelinena pe ko veruvanje kaj palo meribe živinena ko nesavo javer than. Isto agjaar, na valjani te koristina astrologija ili nesave javera slična bukja te šaj te džana so ka ovel ki idnina (Isa. 8:19). Džanaja kaj sa akala bukja tane but opasna hem kaj šaj te anen amen ko direktno kontakt e Satanaja hem e demonencar.

10-11. a) So kergje nesave ko prvo veko keda šungje bašo čačipe? b) Sprema 1. Korinkjanite 10:21, soske valjani te dža palo primer e hristijanengoro taro prvo veko, hem sar šaj te kera adava?

¹⁰ Uništin sa adava soj tano povrzimo spiritistička bukjencar. Ko prvo veko, nesave manuša ko Efes kerena sine spiritizam. Keda šungje o čačipe bašo Devel, but džene lendar kergje bare promene. Ko Dela 19:19 pišinela: „But džene so kerena sine magie, khedingje pumare lila hem thargje len anglo sarinende“. Akala manuša kergje sa te šaj te borinen pe protiv o lošna duhija. Lengere lila bašo magie sine but skupa. Ama, ola na dengje len nikaske, a ni na bikingje len, nego uništingje len. Lenge na sine važno kobor vredinena sine adala lila. Soske? Považno sine lenge te keren e Jehovaskiri volja.

¹¹ Sar šaj te dža palo primer adale hristijanengoro taro prvo veko? Ako isi amen nešto soj povrzimo spiritistička bukjencar, ka ovel mudro te uniština le. Ko akava tane vklučime amajlie hem javera bukja kola so o manuša phiravena len ili arakhena len ko nesavo than te šaj te zaštitinen pe taro lošna duhija. (Čitin 1. Korinkjanite 10:21.)

12. Kola pučiba valjani te puča amen bašo adava savi zabava birinaja?

¹² Šukar razmislin savi zabava birinea. Puč tut: „Dali čitinava lila, spisanija ili statie ko internet kolende so isi spiritizam? Save gilja šunava, save filmija hem emisie dikhava ki televizija, ili save videoigre khelava? Dali ki nesavi taro akala bukja isi spiritizam? Dali ki lende sikavena pe vampirija, zombija ili nesave natprirodna sile? Dali ki lende o magie tane sikavde sar zabava so nane opasno?“ Džangjola pe, na valjani te značinel kaj ki sekoja zabava kote so sikavena pe fantazie ili bajke isi spiritizam. Keda razmislinea savi zabava te birine, ov odlučno te arakhe tut taro sa so mrzinela o Jehova. Amen mangaja te da sa amendar te ovel amen čisto sovest anglo amaro Devel (Dela 24:16).c

13. So na valjani te kera?

¹³ Ma vaker paramisa soj povrzime demonencar. Ki akaja buti amen valjani te dža palo e Isuseskoro primer (1. Pet. 2:21). Angleder te avel ki Phuv, o Isus živinela sine ko nebo, hem adaleske but džanela sine bašo Satana hem bašo demonija. Ama, ov na našavela sine plo vreme te vakerel paramisa bašo adava so kergje akala lošna duhija. O Isus manglja te sikavel e manušen bašo Jehova, a na bašo Satana. Amen šaj te dža palo e Isuseskoro primer agjaar so nane te vakera paramisa bašo demonija. Namesto adava, amare lafencar sikavaja kaj o čačipe tano amenge hor ko vilo (Ps. 45:1).

14-15. a) Soske na valjani te dara taro lošna duhija? b) So sikavela kaj o Jehova zaštitinela ple slugen avdive?

¹⁴ Ma dara taro lošna duhija. Ko akava nesovršeno sveto sarinenge šaj te slučinen pe lošna bukja. Šaj iznenadeno te pogodinel amen nesavi nesrekja, nasvalipe pa čak meribe. Ama, na valjani te mislina kaj adala bukja kerena len o lošna duhija. I Biblija vakerela kaj sekole jekheske šaj te slučinen pe nepredvidena bukja (Prop. 9:11). Osven adava, o Jehova sikavgja kaj tano but pomokjno taro lošna duhija. Na primer, o Devel na dozvolingja e Satanaske te mudarel e Jove (Jov 2:6). Ko e Mojseeskoro vreme, o Jehova sikavgja kaj tano pomokjno taro egipetska sveštenikija so kerena sine magie (2. Moj. 8:18; 9:11). Pokasno ko nebo, o Jehova dengja e Isuseske vlast upro Satana hem upro demonija. Adaleske o Isus šaj sine te frdel len taro nebo. A panda hari, ola ka oven frdime ki bezdna, kote so nikaske našti te keren lošnipe (Otk. 12:9; 20:2, 3).

¹⁵ Isi but dokazija kaj o Jehova zaštitinela ple slugen avdive. Razmislin bašo akava: amen propovedinaja hem sikavaja e manušen bašo čačipe ko celo sveto (Mat. 28:19, 20). Agjaar otkrinaja o lošna bukja so kerela len o Beng. Sigurno, te šaj sine, o Satana celosno ka čhinavel sine o propovedibe — ama našti. Adaleske na valjani te dara taro lošna duhija. Džanaja kaj „o Jehova ple jakhencar rodela ki celo phuv te sikavel pli sila ki korist okolenge so služinena leske celo vilea“ (2. Let. 16:9). Ako siem verna e Jehovaske, o demonija našti te keren amenge trajno šteta.

PRIFATIN I POMOŠ TARO JEHOVA HEM KA DOBINE BUT BEREKETIJA

16-17. Soske valjani amenge hrabrost te šaj te borina amen protiv o lošna duhija? Vaker primer.

¹⁶ Valjani amenge hrabrost te šaj te borina amen protiv o lošna duhija, posebno keda nekoj tari amari familija ili amala so isi len šukar namere terinena amen te kera nesave bukja kolende so isi spiritizam. Ama o Jehova dela bereketi okolen so sikavena asavki hrabrost. Razmislin bašo primer jekhe phenjakoro so vikinela pe Erika, koja so živinela ki Gana (Afrika). I Erika počmingja te proučinel i Biblija keda sine la 21 berš. Adaleske so lakoro dad sine svešteniko so kerela sine magie, latar adžikerela pe sine te učestvujnel ko spiritistička adetija kolende so valjani sine te hal mas so sine žrtvujmo e devlenge ko kola so verujnela sine lakoro dad. Keda i Erika odbingja, lakiri familija mislinela sine kaj adalea vredžinela e devlen. Isto agjaar, verujnena sine kaj o devela ka kazninen len psihičko hem fizičko nasvalipaja.

¹⁷ E Erikakiri familija probingja silaja te čhivel la te učestvujnel ko adetija, ama oj odlučno odbingja iako bašo adava mora sine te džal peske kher­aldan. Nesave Svedokija primingje la ko plo kher. Adalea, o Jehova nagradingja e Erika neve familijaja — manuša tari isto vera kola so ule lake phralja hem phenja (Mar. 10:29, 30). Iako lakiri familija otkažingja pe latar, pa čak thargje lakere bukja, i Erika ačhili verno e Jehovaske, krstingja pe hem akana služinela sar opšto pionerka. Oj na darala taro demonija. A baši pli familija, i Erika vakerela: „Sekova dive molinava man te zapoznajnen amare ljubezno Devle e Jehova hem te osetinen i sloboda so isi okolen so služinena leske“.

18. Save bereketija dobinaja keda isi amen doverba ko Jehova?

¹⁸ Nane sekole jekhe amendar te ovel le doborom baro ispit baši pli vera. Ama, sekova jekh amendar valjani te borinel pe protiv o lošna duhija hem te ovel le doverba ko Jehova. Adava ka anel amenge but bereketija hem ka pomožinel amenge te na ova zavedime taro e Satanaskere hovajba. Isto agjaar, nane te mukha i dar taro demonija te čhinavel amen te služina e Jehovaske. A soj panda považno, ka kera pozoralo amaro amalipe e Jehovaja. Ki Biblija pišinela: „Oven podložna e Devleske, a protivinen tumen e Bengeske, hem ov ka našel tumendar. Oven paše e Devlea, hem ov ka ovel paše tumencar“ (Jak. 4:7, 8).