Pučiba taro čitatelija

So mislingja o apostol Pavle keda vakergja: „Preku o zakoni, mulo sium e zakoneske“? (Gal. 2:19)

O Pavle pišingja: „Preku o zakoni, mulo sium e zakoneske, te šaj te živinav e Devleske“ (Gal. 2:19).

O lafija so pišingja o Pavle sine povrzime e glavno mislaja so manglja te vakerel e phralenge tari Galatija. Nesave phralja taro adava than mukhle upri lende te vlijajnen o hovavne učitelija. Ola sikavena sine e javeren kaj te šaj te oven spasime, mora te ikeren e Mojseeskoro zakoni, posebno o zakoni bašo obrežuvanje. Ama o Pavle džanela sine kaj o Devel na rodela sine više taro hristijanja te oven obrežime. Ov ko jekh logično hem uverlivo način sikavgja kaj akala sikajba tane hovavne hem bajrargja e phralengiri vera ki e Isuseskiri otkupno žrtva (Gal. 2:4; 5:2).

I Biblija jasno vakerela kaj keda nekoj merela, nane svesno bašo ništo, ili ništo našti te vlijajnel upri leste (Prop. 9:5). Keda o Pavle vakergja: „Mulo sium e zakoneske“, ov ustvari manglja te vakerel kaj e Mojseeskoro zakoni na sine le više nisavo vlijanie upro leskoro životo. Namesto adava, o Pavle sine uverimo kaj preku pli vera ki otkupno žrtva, ov živinela sine e Devleske.

Akaja promena ko e Pavleskoro životo ali „preku o zakoni“. Sar? Ov samo so objasningja kaj, „e manušeske na vakerela pe kaj tano pravedno adaleske so ikerela pe ko zakoni, nego baši vera so isi le ko Isus Hristos“ (Gal. 2:16). Sepak, o Zakoni sine but korisno. O Pavle objasningja e Galatjanenge: „Ov sine dodajmo te šaj te dikhjon o greške, džikote na avela o potomstvo kaske so sine dendo o vetuvanje“ (Gal. 3:19). O Zakoni jasno sikavgja kaj o nesovršena manuša, našti sovršeno te ikeren pe ko Zakoni hem kaj valjani lenge jekh sovršeno žrtva. O Zakoni pomožingja e manušenge te haljoven kaj o Isus tano „o potomstvo“. Hem sa okola so ka sikaven vera ko Isus Hristos, ka šaj te oven pravedna anglo Devel (Gal. 3:24). Znači, o Pavle sine pravedno soske o Zakoni pomožingja le te prifatinel e Isuse hem te sikavel vera ki leste. Adaleske, otkeda prifatingja e Isuse, o Pavle šaj sine te vakerel kaj tano mulo e Zakoneske hem kaj počmingja te živinel e Devleske. O Zakoni našti sine više te vlijajnel upri leste, nego o Devel.

O Pavle vakergja jekh slično buti ko plo pismo e Rimjanenge. „Phraljalen, tumen da preku e Hristoseskoro telo mule sien e Zakoneske... A akana siem oslobodime taro Zakoni, soske mule siem okoleske so ikerela amen sine phanle“ (Rim. 7:4, 6). Taro akala stihija hem taro Galatite 2:19, haljovaja kaj o Pavle na kerela sine lafi baši peste sar grešniko kova so sprema o Zakoni mora sine te merel. Nego ov manglja te istakninel kaj tano oslobodimo. O Zakoni na sine le više nisavo vlijanie upri leste hem upro javera hristijanja. Ola sine oslobodime preku i vera ki e Hristoseskiri otkupnina.